2 Reyes 14 - DIOSPA QHELQACHISQ

Amasías Judá suyuta kamachin

¹ Joacazpa churin Joás Israel suyuta iskay watataña kamachishajtin, Joaspa churin Amasías Judá suyupi kamachiyta qallarerqa.

² Kamachiyta qallarishaspa, iskay chunka phishqayoj watayoj karqa. Jerusalén llajtamantapachataj Judá suyuta kamacherqa iskay chunka jisq'onniyoj watata. Paypa mamantaj Jerusalenmanta Yoadán karqa.

³ Amasiasqa tatan Joás jina Tata Diospa munasqanman jina allinta ruwarqa, manapis ñawpa tatan David jinapunichu ruwarqa.

⁴ Chaywanpis, orqo patapi lanti yupaychana altarkunata mana thuñerqachu. Runaqa chaykunapi uywa ñak'asqata chantá inciensotawan q'oshñichispa jaywashallarqankupuni.

⁵ Amasías kamachiyninta sumajtaña sayachiytawan, tatanta wañuchejkunata tukuyninkuta wañucherqa.

⁶ Tatanta wañuchejkunaj wawankukunatarí mana wañucherqachu, imaraykuchus Tata Dios Moisesnejta nisqa: Tatakunataqa mana wawankoj juchankurayku wañuchinkichejchu, nitaj wawakunatapis tatankoj juchankumanta wañuchinkichejchu. Aswanpis sapa runa juchanmanta wañuchisqa kachun, nispa.

⁷ Jinallataj Amasiasqa Kachi valle nisqapi, Edom llajtayojkunamanta chunka waranqata wañuykucherqa, maqanakupi atipaspataj Sela llajtata jap'erqa. Suticharqataj “Yoctel”, nispa. Kunankama chay llajtaqa chay sutiwan rejsisqa kashan.

⁸ Chantá chay qhepata Amasiasqa Israel suyuta kuraj kamachej Joasman kachakunata kacharqa. Joasqa Joacazpa churin karqa, Jehujpa allchhintaj. Paykunanejtataj kay jinata nerqa: Noqawan maqanakoj llojsimuy, nispa.

⁹ Israel suyuta kuraj kamachej Joastajrí Judata kuraj kamachej Amasiasman kuticherqa: Uj kuti ithapalloqa Libanopi jatun cedro sach'aman nichimusqa: Ususiykita churiytawan casarachina, nispa. Chaywanpis Libanomanta k'ita animal chayninta purispa, ithapalluta sarurparisqa.

¹⁰ Yachani edomitakunata atipasqaykita, chayraykutaj runaykachashasqaykita. Walejpacha, runaykachallay ari. Chaywanpis wasillaykipi qhepakunayki aswan walej kanman. Imapajtaj maqanakuyta mask'awajri? Chayqa qanpajpis, Judá suyupajpis llakiyllata apamonqa, nispa.

¹¹ Judá suyuta kuraj kamachej Amasiasrí mana kasuta ruwarqachu. Chayrayku Israel suyuta kuraj kamachej Joasqa maqanakoj llojsimorqa, Judá suyupitaj Bet Semes cheqanejpi maqanakorqanku.

¹² Chantá israelita soldadonkunaqa Amasiaspa soldadonkunata atipaykorqanku. Chayrayku Judamanta soldadokuna sapa uj wasinkuman ayqerqanku.

¹³ Israel suyuta kuraj kamachej Joasqa Bet Semespi Judá suyuta kuraj kamachej Amasiasta jap'ispa, Jerusalenman rerqa. Amasiasqa Joaspa churin chantá Ocoziaspa allchhin karqa. Kuraj kamachej Joasqa Jerusalén llajtaj perqanta, Efraín nisqa punkunmantapacha, Esquina nisqa punkukama, 180 metrota jina thuñiykorqa.

¹⁴ Chantá Tata Diospa Templonpi tukuynin qorita, qolqe metalta, jinataj tukuy imachus kajta, jinallataj kuraj kamachejpa wasinpi kaj imakunatawan apakaporqa. Chantá wakin runakunata jap'ispa, Samariaman kutiporqa.

¹⁵ Joás kamachishaspa tukuy imatachus ruwasqan, atiyniyoj kasqan, Judá suyuta kuraj kamachej Amasiaswan maqanakusqan ima Israel suyuta kuraj kamachejkunaj ruwasqankumanta willaj qhelqapi qhelqasqa kashan.

¹⁶ Joás wañupojtintaj, Samaria llajtapi, Israel suyuta kuraj kamachejkunaj covachankupi ayanta p'amparqanku. Paypa cuentanmantataj churin Jeroboán kuraj kamachej jina tiyaykorqa.

¹⁷ Joacazpa churin Israel suyuta kuraj kamachej Joás wañupusqanmanta, Joaspa churin Judá suyuta kuraj kamachej Amasiasqa chunka phishqayoj watatawanraj kawsarqa.

¹⁸ Amasías kamachishaspa tukuy imatachus ruwasqan Judá suyuta kuraj kamachejkunaj ruwasqankumanta willaj qhelqapi qhelqasqa kashan.

¹⁹ Jerusalenpi wakinkunaqa Amasiaspa contranpi oqharikorqanku, paytaj Laquis llajtaman ayqekorqa. Chaywanpis oqharikojkunaqa Laquiskama payta qhatiykuspa, chaypi wañucherqanku.

²⁰ Chantá ayanta caballopi Jerusalenman apamuspa, Davidpata llajtan nisqapi p'amparqanku.

²¹ Chaymantataj Judá suyumanta tukuy runaqa Amasiaspa churin Azariasta kuraj kamachejninkupaj churarqanku. Azarías tatanpa cuentanmanta kamachinanpaj tiyaykushaspa, chunka sojtayoj watayojllaraj karqa.

²² Azariastaj tatanpa wañupusqanmanta qhepata, Elat llajtata watejmanta sayarichispa, chay llajtata Judá suyuman kutichimporqa.

Joaspa churin Jeroboán Israel suyuta kamachin

²³ Joaspa churin Amasías Judá suyuta chunka phishqayoj watataña kamachishajtin, Joaspa churin Jeroboán Samaria llajtamantapacha Israel suyuta kamachiyta qallarerqa. Kamacherqataj tawa chunka ujniyoj watata.

²⁴ Jeroboanqa mana Tata Diospa munasqanman jinachu ruwarqa, imajtinchus Nabatpata churin Jeroboán jinallataj ruwaspa, israelitakunata juchallicherqa.

²⁵ Payqa Israel suyoj jap'iyninpa mojonninta, Jamatman yaykunamanta Arabá mama qochakama watej jatunyacherqa. Ajinata ruwarqa Amitaypa churin Diospa sut'inchajnin Jonasman, Tata Dios willasqanman jina. Jonasqa Gat Jéfer llajtamanta karqa.

²⁶ Tata Diosqa israelitakunata sonqo nanayta ñak'arishasqankuta rikorqa, manataj pipis paykunata yanapaj karqachu.

²⁷ Tata Diosqa israelitakunata kay pachamanta chinkachinanta manaraj nisqachu. Chayrayku paykunata Joaspa churin Jeroboannejta kacharicherqa.

²⁸ Jeroboán kamachishaspa tukuy imatachus ruwasqan, wapu kasqan, chay chhika maqanakusqan, imaynatachus Damascota, Jamatta ima Judá suyumanta qhechuspa, Israel suyuman kutichimusqan imaqa Israel suyuta kuraj kamachejkunaj ruwasqankumanta willaj qhelqapi qhelqasqa kashan.

²⁹ Jeroboán wañupojtintaj, Israel suyuta kuraj kamachejkunaj covachankupi ayanta p'amparqanku. Paypa qhepantataj churin Zacarías kuraj kamachej jina tiyaykorqa.