2 Reyes 13 - DIOSPA QHELQACHISQ

Joacaz Israel suyuta kamachin

¹ Judá suyupi Ocoziaspa churin Joás iskay chunka kinsayoj watataña kamachishajtin, Jehúj churin Joacaz Israel suyuta kamachiyta qallarerqa. Samariamantapachataj chunka qanchisniyoj watata kamacherqa.

² Joacazqa mana Tata Diospa munasqanman jinachu ruwarqa, imajtinchus Nabatpa churin Jeroboán imata ruwaspachus israelitakunata juchallicherqa, chay jinallatataj ruwarqa. Mana chaykunamanta karunchakorqachu.

³ Chayrayku Tata Diosqa israelitakunapaj sinch'ita phiñakorqa, jinataj Siria suyuta kuraj kamachej Jazaelman, chantá churin Ben Adadman ima unaypaj israelitakunata jaywaykorqa.

⁴ Chantá Joacazqa Tata Diosmanta mañakorqa. Diostaj mañakusqanta uyarerqa, imaraykuchus Siria suyuta kuraj kamachej, israelitakunata imaynatachus ñak'arichisqanta rikorqa, chayrayku.

⁵ Jinaspa Tata Diosqa israelitakunaman uj kacharichejta kachamorqa, paywantaj Siria llajtayojkunaj makinkumanta kacharichikorqanku. Ajinamanta israelitakunaqa, ñawpajta jina, wasinkupi mana imamanta manchachikuspa tiyakorqanku.

⁶ Chaywanpis israelitakunaqa manapuni saqerqankuchu, Jeroboanpa ayllun imata ruwaspachus israelitakunata juchallichisqa, chaykunata. Aswanpis Asera sutiyoj diospa lantenqa Samariapi kakushallarqapuni.

⁷ Joacazpa soldadonkunaqa manaña ashkhachu karqanku. Phishqa chunka caballopi purej soldadokuna, chunka carretakuna, chantá 10.000 soldadokuna imallaña karqanku, imaraykuchus Siriata kuraj kamachej Jazael tukuynintapuni wañuchichispa, erapi pajata jina chinkarparichisqa.

⁸ Joacaz kamachishaspa imaynatachus kawsasqan, imatachus ruwasqan, chantá may jina wapupuni kasqanmantawan Israel suyuta kuraj kamachejkunaj ruwasqankumanta willaj qhelqapi qhelqasqa kashan.

⁹ Joacaz wañupojtintaj, Samariapi ayanta p'amparqanku, paypa cuentanmantataj churin Joás kamacherqa.

Joás Israel suyuta kamachin

¹⁰ Judá suyupi kuraj kamachej Joás kinsa chunka qanchisniyoj watataña kamachishajtin, Joacazpa churin Joás Israel suyupi kamachiyta qallarerqa. Samaria llajtamantapacha chunka sojtayoj watata kamacherqa.

¹¹ Paypis manallataj Tata Diospa munasqanman jinachu ruwarqa, imajtinchus Nabatpa churin Jeroboán, imata ruwaspachus israelitakunata juchallicherqa, chaymanta mana karunchakorqachu. Payqa chay juchallapipuni purerqa.

¹² Joás kamachishaspa imaynatachus kawsasqan, imatachus ruwasqan, chantá mana manchachikuspa Judá suyuta kuraj kamachej Amasiaswan maqanakusqan ima Israel suyuta kuraj kamachejkuna imatachus ruwasqankumanta willaj qhelqapi qhelqasqa kashan.

¹³ Joás wañupojtintaj, Samariapi Israel suyuta kuraj kamachejkunaj covachankupi ayanta p'amparqanku. Paypa cuentanmantataj Jeroboán kamachinan tiyanapi tiyaykukorqa.

Eliseo wañupun

¹⁴ Eliseo onqoykuspa, wañupunan patapiña kasharqa. Chayrayku Israel suyuta kuraj kamachej Joasqa payta watukoj rerqa, waqaspataj, Eliseota nerqa: Tatáy, tatitáy. Qanqa Israel suyupaj carretakunamanta, caballokunamanta nisqa aswan karqanki, nispa.

¹⁵ Chantá Eliseo Joasta nerqa: Jap'iy flechana arcota, flechakunatawan, nispa. Joastaj arcota, flechakunatawan jap'erqa.

¹⁶ Chantá Eliseo nerqa: Flechana arcota jap'iy, nispa. Paytaj arcota jap'erqa. Chantá Eliseo kuraj kamachejpa makin pataman paypa makinta churarqa.

¹⁷ Chantá nerqa: Kunantaj inti llojsimuynej qhawarisqa ventanata kichariy, nispa. Paytaj ventanata kicharerqa. Eliseotaj nerqa: Flechata kachariy, nispa. Kuraj kamachejtaj arcowan flechata kacharerqa. Chantá Eliseo qhaparerqa: Chay flechaqa Tata Diospa señalninmin. Paymin Siria suyuta atipanaykipaj yanapasonqa. Afecpi siriokunata atipanki, paykunata tukuchinaykikama, nispa.

¹⁸ Chantá Eliseo watej kuraj kamachejta nillarqataj: Flechakunatañataj oqhariy, nispa. Joás oqharejtintaj, payta nerqa: Kunanqa pampata wajtay, nispa. Paytaj pampata kinsa kutita wajtaspa, manaña astawan wajtarqachu.

¹⁹ Chantá Diosmanta sut'inchaj Eliseo phiñakuspa kuraj kamachej Joasta nerqa: Sichus phishqata, sojtatapis pampata wajtawaj karqa chayqa, siriokunata tukuchinaykikama atipaykuwaj karqa. Kunanrí, kinsa kutillata siriokunata atipanki, nispa.

²⁰ Chantá chay qhepata Eliseo wañuporqa, ayantataj p'amparqanku. Sapa wata Moab suyumanta suwa runakunaqa Israel suyuman yaykumoj kanku.

²¹ Uj kuti, israelitakuna uj runata p'ampashaspa, Moabmanta suwakuna jamushajta rikorqanku. Chayrayku chay ayata Eliseoj covachanman choqaykuytawan, ayqekorqanku. Chantá chay aya Eliseoj tullunman llankharispa, chaypacha kawsarispa sayarerqa.

²² Joacaz kawsanankama Siriata kuraj kamachej Jazaelqa israelitakunata ñak'arichillarqapuni.

²³ Chaywanpis Tata Diosqa paykunamanta khuyakorqa, Abrahamwan, Isaacwan, Jacobwan ima tratota ruwasqanraykutaj, israelitakunata mana saqerpayarqachu. Chayrayku Tata Diosqa ñawpaqenmanta mana paykunata wijch'uyta, nitaj chinkachiytapis munarqachu. Kunankama ajina kashan.

²⁴ Siria suyuta kuraj kamachej Jazael wañupojtin, paypa cuentanmanta churin Ben Adad kuraj kamachej jina tiyaykorqa.

²⁵ Joacazpa churin Joastaj, Jazaelpa churin Ben Adadmanta, tatan Joacazta maqanakupi atipaspa qhechusqan llajtakunata qochikaporqa. Joasqa kinsa kutita Ben Adadta atipaspa, chay llajtakunata watej jap'ikaporqa.