2 Reyes 12 - DIOSPA QHELQACHISQ

Joás Judá suyuta kamachin

¹ Israel suyupi Jehú qanchis watataña kamachishajtin, Joasqa Judá suyupi kamachiyta qallarerqa. Jerusalenmantapacha tawa chunka watata kamacherqa. Paypa mamantaj Bersebamanta Sibiá sutiyoj karqa.

² Sacerdote Joyadá yuyaychasqanrayku, Joasqa Tata Diospa munasqanman jina allin kajta ruwaspa purerqa.

³ Chay tukuywanpis, orqo patapi lanti yupaychana altarkunata mana thuñerqachu. Runaqa chaykunapi uywa ñak'asqata jaywallajpuni kanku, chantá inciensotawan q'oshñichej kanku.

⁴ Uj kuti Joasqa sacerdotekunata nerqa: Tata Diospa Templonman runakunaj apamusqanku tukuy ofrendata tantaychej: Sapa uj paymanta paganan kajta, sonqomanta munaspa churasqanku ofrendatapis.

⁵ Sacerdotekunataj qolqe jallch'ajkunamanta qolqeta jap'ichunku, Diospa Templonta allinchanankupaj, nispa.

⁶ Chaywanpis Joás iskay chunka kinsayoj watata kamachinankama, sacerdotekunaqa manarajpuni Diospa Templonta allinchasqankuchu.

⁷ Chayrayku Joasqa kuraj kaj sacerdote Joyadata, chantá waj sacerdotekunatawan wajyachispa, nerqa: Imaraykutaj Diospa Templonta kunankama mana allinchankichejchuri? Kunanmantaqa jallch'ajkunamanta amaña qolqeta jap'iychejñachu, aswanpis jap'isqaykichej qolqeta qoychej, pikunachus Diospa Templonta allinchashanku, chaykunaman, nispa.

⁸ Chantá sacerdotekunaqa Joasta kasukuspa, manaña qolqeta runamanta jap'erqankuchu, nitaj Diospa Templonta allinchanapis makinkupichu karqa.

⁹ Sacerdote Joyadataj uj cajata jap'ispa, kirpananta jusk'orqa, chantá altar qayllanman, Tata Diospa Templonman yaykuna punkupi pañanejman churarqa. Chantá punkuta qhawaj sacerdotekunaqa Diospaj apamusqanku tukuynin qolqeta chay cajaman churarqanku.

¹⁰ Cajapi ashkhataña qolqeta rikuspa, kuraj kamachejpa qhelqerin, kuraj kaj sacerdotewan ima, Tata Diospa Templonpi mashkhachus qolqe karqa, chayta yupaykuspa waqaychaj kanku.

¹¹ Chantá Diospa Templonta allinchachejkunaman qolqeta jaywarqanku. Paykunataj k'aspita llajllajkunaman, Tata Diospa Templonpi waj imakunata allinchajkunaman ima pagarqanku.

¹² Jinataj albañilkunaman, rumita ch'eqojkunaman ima pagarqanku. Jinallataj kurkuta, ch'eqosqa rumita, waj imakunata ima rantinankupaj qolqeta qorqanku, chaywan Tata Diospa Templonta allinchanankupaj.

¹³ Qolqeta Tata Diospa Templonman apamusqankumantaqa mana vasokunata, pábilo k'utunata, jatuchaj vasokunata, nitaj trompetakunata ima ruwarqankuchu. Manallataj qorimanta, qolqe metalmanta waj imakunatapis Tata Diospa Templonpaj ruwarqankuchu.

¹⁴ Chay qolqetaqa Tata Diospa Templonta allinchajkunaman qorqanku, chaywan Templota allinchanankupaj.

¹⁵ Templota jallch'aspa llank'ajkunaman pagajkunamantaqa mana cuentata mañajchu kanku, imaraykuchus paykunaqa tukuy imata cheqanta ruwarqanku.

¹⁶ Chaywanpis israelitakuna juchanku pampachasqa kananpaj chantá juchallisqankumanta, apasqanku qolqetaqa mana Tata Diospa Templonman apajchu kanku. Chayqa sacerdotekunapaj karqa.

¹⁷ Chaypachata Siriamanta kuraj kamachej Jazael Gat llajtaj contranpi maqanakoj jamuspa, chay llajtata jap'erqa. Chay jawataj Jazaelqa Jerusalenpa contranpiñataj maqanakoj rerqa.

¹⁸ Chayrayku Judamanta kuraj kamachej Joasqa tantarqa, ima valorniyoj kajtachus ñawpa kuraj kamachejkuna Josafat, Jorán, Ocoziaspiwan ima Diosman qosqanku, chayta. Chantá imatachus paypis Diosman qollasqataj, chayta yaparispa, chay tukuyta Siriamanta kuraj kamachej Jazaelman apacherqa. Apachillarqataj Tata Diospa Templonpi, chantá kuraj kamachejpa wasinpiwan waqaychasqa karqa, chay qoritawan. Ajinamanta Jazaelqa Jerusalenta jap'inanpaj manaña maqanakorqachu.

¹⁹ Joás kamachishaspa imaynatachus kawsasqan, jinataj imatachus ruwasqan imaqa Judá suyuta kuraj kamachejkunaj ruwasqankumanta willaj qhelqapi qhelqasqa kashan.

²⁰ Joás Silaman urayk'amushajtin, yanapajninkunallataj contranpi oqharikuspa, Milo nisqa wasi qayllapi wañucherqanku.

²¹ Joasta wañuchejkunaqa Simeatpata churin Josacar chantá Somerpata churin Jozabadwan ima karqanku. Runakunataj Joasta p'amparqanku ñawpa tatan Davidpa llajtan nisqapi. Paypa cuentanmantataj churin Amasías kuraj kamachej jina kamacherqa.