2 Reyes 11 - DIOSPA QHELQACHISQ

Atalía sutiyoj warmi Judá suyuta kamachin

¹ Ocoziaspa maman Atalia churin wañusqanta yachaspa, kuraj kamachejpa tukuy ayllunta wañuchicherqa.

² Kuraj kamachej Joranpata ususin Yosebarí, turan Ocoziaspa churin Joasta pakayllamanta ayqechispa, uywajnin warmitawan puñuna wasiman Ataliamanta pakaykamorqa. Ajinamanta Joasta mana wañucherqankuchu.

³ Jinapi chay uywajnin warmiwan Joasqa Tata Diospa Templonpi sojta watata pakasqa karqa. Chaykamataj Ataliaqa Judá suyuta kamacherqa.

⁴ Qanchis kaj watapitaj sacerdote Joyadaqa soldadokunata, kamachejkunata, chantá kamachina wasita qhawaj soldadokunatawan ima Tata Diospa Templonman wajyacherqa. Chaypi tiluchispataj, paykunawan uj tratota ruwarqa. Chaymantataj kuraj kamachej Ocoziaspa churin Joasta rikhurichimorqa.

⁵ Chantá paykunata kamacherqa: Qankuna kayta ruwanaykichej tiyan. Ujnin kaj t'aqaqa samarina p'unchaypi kuraj kamachejpa wasinta qhawankichej.

⁶ Ujnin kaj t'aqataj uranej punkuta qhawankichej. Ujnin kaj t'aqataj soldadokunaj tiyananku wasanejta qhawankichej. Ajinata ama pipis yaykumunanmanta qhawankichej.

⁷ Qankunamanta iskay t'aqa samarina p'unchaypi llojsejkunaqa Tata Diospa Templonta qhawankichej.

⁸ Sapa ujniykichejtaj arma oqharisqa kuraj kamachejpa muyuyninpi kankichej. Pillapis qankuna ukhuman qayllaykamojqa wañuchisqa kachun. Kuraj kamachej llojsichunpis, yaykuchunpis qankunaqa paywanpuni kankichej, nispa.

⁹ Chantá soldadokunata kamachejkunaqa sacerdote Joyadáj kamachisqanman jina ruwarqanku. Sapa ujtaj soldadonkuna pusarisqa, samarina p'unchaypi qhawaj yaykojkuna, chantá llojsejkunapiwan ima sacerdote Joyadaman jamorqanku.

¹⁰ Soldadokunata kamachejkunamantaj sacerdote Joyadaqa Davidpa ruwachisqan escudokunata, lanzakunata ima jaywarqa. Chaykunaqa Tata Diospa Templonpi waqaychasqa karqanku.

¹¹ Qhawaj soldadokunaqa sapa uj arma jap'irisqa sinrulla sayaspa, Tata Diospa Templonpa pañannejpi, lloq'ennejpi, chantá altar qayllanejpi ima kuraj kamachejpa muyuyninpi karqanku.

¹² Chantá sacerdote Joyadá kuraj kamachejpa churin Joasta orqhomuytawan, umanman pilluta churarqa, jinataj kuraj kamachej imachus ruwananmanta qhelqasqatawan jaywarqa. Chantá aceitewan umanman jich'aykuspa, kuraj kamachej kananpaj churarqa. Chaymantataj tukuyninku t'ajllarikuspa, qhaparerqanku: Jallalla, jallalla kuraj kamachej, nispa.

¹³ Templota qhawaj soldadokunata chantá runakunata ima ch'ajwashajta uyarispa, Ataliaqa Tata Diospa Templonman rerqa.

¹⁴ Chantá kuraj kamachej Joasta sayanta qayllapi sayashajta rikorqa, kuraj kamachejta churanapaj usunkuman jina. Kuraj kamachejpa qayllanpitaj kurajkuna, trompetata tocajkunawan ima kasharqanku. Jinallataj trompetata waqachispa, mayta kusikusharqanku. Chayta rikuspa, Ataliaqa sinch'ita qhaparerqa, p'achantataj llik'ikorqa: Wasanchawanku, wasanchawanku, nispa.

¹⁵ Chantá sacerdote Joyadaqa soldadokunata kamacherqa: Ataliata Temploj pationmanta jawaman orqhoychej. Chantá paytawan, pichus payman kutikojtawan wañuchiychej, nispa. Ajinata ruwarqanku, imaraykuchus sacerdote kamachisqa ama Tata Diospa Templonpi Ataliata wañuchinankuta.

¹⁶ Chayrayku Ataliata jap'iytawan, caballokunaj yaykunan punkumanta kuraj kamachejpa wasinman rej ñanta pusarqanku, chantá chaypi wañucherqanku.

¹⁷ Chaymanta Joyadaqa Judamanta kajkunawan, kuraj kamachejwan ima Tata Dioswan uj tratota ruwarqa, Tata Diosta kasuspallapuni kawsanankupaj. Jinallataj kuraj kamachejwan, Judamanta kajkunawan ima uj tratotawan ruwallarqankutaj.

¹⁸ Chantá tukuyninku Baalta yupaychana wasiman rispa, thuñiykorqanku. Altarnintapis, lantinkunatapis phirerqanku. Baalpa sacerdoten Matantapis altar qayllapi wañuchillarqankutaj. Chantá Joyadá sacerdoteqa Tata Diospa Templonta qhawanankupaj soldadokunata churarqa.

¹⁹ Chaymantataj soldadokuna kamachejkuna, kamachina wasita qhawaj soldadokuna, chantá tukuy runawan ima kuraj kamachejta pusarqanku Tata Diospa Templonmantapacha kamachina wasikama. Qhawaj soldadokuna yaykunku chay punkunejta yaykuspataj, Joasta kamachina tiyanaman tiyaykucherqanku,

²⁰ tukuy runataj maytapuni kusikorqanku. Atalía kamachina wasi chaynejpi wañuchisqa kasqanmanta qhepanejmantaj, Jerusalén llajtapi allin kawsay karqa.

²¹ 21 (12.1) Joás kamachiyta qallarishaspa, qanchis watayojllaraj karqa.