2 Reyes 10 - DIOSPA QHELQACHISQ

Jehuqa Ajabpa ayllunta wañuchin

¹ Samariapi Ajabpata churinkunaqa qanchis chunka karqanku. Jehutaj chay llajtapi kamachejkunaman, Jezrelmanta kurajkunaman, Ajabpa churinkunata yachachejkunaman ima cartata apacherqa, ajinata nispa:

² Qankuna wiraqochiykichej Ajabpa churinkunata uywashankichej, jinallataj caballonkunata, carretankunata jap'ishankichej, perqawan muyuykuchisqa llajtapitaj kashankichej, armankunapis qankunawan kashan. Chayrayku kay cartata jap'ispa ñawiriytawan,

³ wiraqochiykichejpa churinkunamanta ajllaychej aswan sumaj kajta kuraj kamachejniykichej kananpaj, tatanpa kamachinan tiyanaman tiyaykuchinaykichejpaj. Chantá wiraqochiykichejpa ayllunrayku contrayta maqanakuychej, nispa.

⁴ Chay kurajkunarí maytapuni mancharispa, ninakorqanku: Paytaqa iskay kuraj kamachejkuna mana atipayta aterqankuchu. Imaynatataj paywan maqanakoj sayaykusunmanri? nispa.

⁵ Jinapi Ajabpa wasinta qhawaj, llajtata kamachej, kurajkuna, wawakunata yachachejkunapiwan ima Jehuman kachaspa, nicherqanku: Noqaykoqa qanpa kamachiyki kayku. Imatachá kamachiwasqaykuta ruwasqayku, manataj waj kuraj kamachejta churasqaykuchu. Imatachá munasqaykita ruwallay ari, nispa.

⁶ Chantá Jehuqa ujtawan cartata apachillarqataj: Sichus noqajta kankichej chayqa, Ajabpata churinkunaj umankuta qholuraspa, q'aya kunanta jina Jezrelman apamuwaychej, nispa. Chaypacha Ajabpata qanchis chunka wawankunaqa llajtamanta kurajkunawan kasharqanku, paykunaj uywasqanku kasqankurayku.

⁷ Kurajkunaj makinkuman chay carta chayajtinkama, Ajabpata churinkunata wañucherqanku. Chantá umankuta qholuspa canastaman churaytawan, Jezrelman apacherqanku.

⁸ Chantá uj kacha chayaspa Jehuman willarqa: Ñawpa kuraj kamachejpata churinkunaj umankuta kayman chayachimunku, nispa. Jehutaj nerqa: Llajtaman yaykuna punkuman iskay qotuta churaychej, chaypitaj q'aya paqarinkama saqellaychej, nispa.

⁹ Q'ayantin paqarin Jehú llojsiytawan, tukuy runata nerqa: Qankunaqa mana juchayojchu kankichej. Noqamá wiraqochiypa contranpi oqharikuspa, payta wañucherqani. Chaywanpis kay qanchis chunkatarí, pitaj wañuchinri?

¹⁰ Kayta yachaychej: Tata Dios imatachus Ajabpa ayllunpa contranta parlasqanmanta mana imapis mana junt'akuspaqa kanqachu. Kamachin Eliasnejta parlasqanta Tata Diosqa junt'anqapuni, nispa.

¹¹ Chayta niytawantaj, Jehuqa Jezrelpi Ajabpa ayllunmanta qhepakojkunata tukuyninkuta wañucherqa. Wañuchillarqataj Ajabta yanapajkunata, kawsaqenkunata, sacerdotenkunata ima, manataj ujtapis kawsashajta saqerqachu.

¹² Chantá Jehú Samariaman rerqa, ñanta rishaspataj, Oveja Michejkunaj Tantakunanku nisqa wasiman chayarqa.

¹³ Chaypitaj Judá suyuta kuraj kamachej Ocoziaspa wawqenkunawan tinkukuspa, Jehú taporqa: Pikunataj qankuna kankichejri? nispa. Paykunataj kuticherqanku: Noqaykoqa Ocoziaspa wawqenkuna kayku. Jamorqaykutaj kuraj kamachej Ajabpata chantá warmin Jezabelpata ima wawankunata waturikoj, nispa.

¹⁴ Chantá Jehuqa kamachinkunata kamacherqa: Paykunata jap'iychej, nispa. Jap'iytawantaj, Oveja Michejkunaj Tantakunanku wasi chaynejpi, yaku pujyu qayllapi, tawa chunka iskayniyoj qharikunaj umankuta qholurparerqanku. Mana ujtapis kawsashajta saqerqankuchu.

¹⁵ Chaymanta ripuspa, Jehuqa Recabpa churin Jonadabwanñataj tinkukorqa. Jonadabqa Jehuta watukoj jamushasqa. Chantá Jehú napaykuspa, nerqa: Qanqa noqapaj allin sonqochu kashanki, imaynachus noqa qanpaj allin sonqo kashani, ajinata? nispa. Jonadabtaj nerqa: Arí, ajinapuni kashan, nispa. Chantá Jehú nerqa: Jina kajtenqa, q'apiriway, nispa. Jonadabtaj Jehuta q'apiykurerqa. Chantá Jehuqa Jonadabta carretanpi pusarqa.

¹⁶ Nerqataj: Jaku noqawan, rikunkitaj imaynachus Tata Diospaj sonqoy kasqanta, nispa. Jinaspataj, carretanpi pusarqa.

¹⁷ Jehutaj Samariaman chayaytawan, Ajabpata ayllunmanta kawsashajraj puchojkunata tukuyninkutapuni wañucherqa, Tata Dios Eliasnejta sut'inchasqanman jina.

Jehú Baalta yupaychanata chinkachin

¹⁸ Chaymantataj Jehuqa tukuy llajtantinta tantaykuchispa, nerqa: Ajabqa pisillata Baal sutiyoj diosta yupaycharqa. Noqarí astawanraj yupaychasaj.

¹⁹ Chayrayku Baalpa tukuynin sut'inchajninkunata, yupaychajninkunata, tukuynin sacerdotenkunata ima wajyaychej, imaraykuchus Baalpaj ashkha jaywanata wakichini. Ama ujpis mana jamuspa kachunchu. Pichus mana jamojqa wañuchisqa kanqa, nispa. Jehuqa ajinata nispa q'otiyananta yuyaychakusqa, Baalta tukuynin yupaychajkunata wañuchinanpaj.

²⁰ Chantá Jehú nillarqataj: Baalpa sutinpi jatun raymita ruwanapaj uj p'unchayta ajllaychej, nispa. Paykunataj chay p'unchaypaj runakunata wajyacherqanku.

²¹ Chantá Jehuqa tukuynin Israel suyuman willajkunata kacharqa. Baalta yupaychajkunataj tukuypuni tantakamuspa, Baalta yupaychana wasiman junt'aykorqanku.

²² Jinataj Jehuqa pichus p'achata waqaychajta nerqa: Baalta tukuy yupaychajkunapaj p'achata orqhomuy, nispa. Paytaj kasuspa, p'achata orqhomorqa Baalta tukuy yupaychajkuna chaywan p'achallikunankupaj.

²³ Chaymanta Jehuwan, Recabpata churin Jonadabwan ima Baalta yupaychana wasiman yaykorqanku. Chantá Jehuqa Baalta yupaychajkunata nerqa: Allinta qhawaychej, Tata Diosta yupaychajkunamanta ama ujpis kaypi kanankumanta. Kaypeqa Baalta yupaychajkunalla kananchej tiyan, nispa.

²⁴ Chantá Baalta yupaychajkunaqa uywa ñak'asqata q'olachispa jaywanankupaj yupaychana wasinman yaykorqanku. Chaykamataj Jehuqa jawaman pusaj chunka soldadokunata churaspa, paykunata kamacherqa: Sichus pillapis kay runakunamanta ujllatapis kawsashajta saqenqa chayqa, pay wañuchisqa kanqa, nispa.

²⁵ Chantá Jehú uywa ñak'asqata jaywayta tukuspa, qhawaj soldadokunata chantá kamachejkunata ima nerqa: Yaykuspa, chaykunata wañuchiychej. Ama ujtapis kawsashajta saqenkichejchu, nispa. Paykunataj Baalta yupaychajkunata espadawan wañuchispa, pampapi mast'allata saqerqanku. Chantá Baalta yupaychana wasiman yaykuspa,

²⁶ yupaychana k'ullukunata ruphaykuchinankupaj orqhomorqanku.

²⁷ Chantá Baalpa lantinta, yupaychana wasintapis thuñirparerqanku. Chay cheqataj jisp'akunallapajña karqa, kunankamataj ajina kashan.

²⁸ Ajinata Jehuqa Israel suyumanta Baal sutiyoj diosta yupaychanata chinkacherqa.

²⁹ Chay tukuywanpis Jehuqa Nabatpata churin Jeroboán jina, juchallispallapuni purerqa. Jehuqa israelitakunata juchallicherqa, imajtinchus Betelpi, Danpi ima qorimanta waka uña lantita yupaychallarqapuni.

³⁰ Chantá Tata Diosqa Jehuta nerqa: Allinta ruwasqaykirayku, Ajabpa aylluntapis nisqayman jina chinkachisqaykirayku, wawaykikuna, allchhiykikuna, allchhiykikunaj wawanku ima Israel suyuta kamachenqankupuni, nispa.

³¹ Chay tukuywanpis Jehuqa Israel suyoj Tata Diosninpata kamachisqanta mana tukuy sonqochu kasorqa. Manachayqa Jeroboán imata ruwaspachus israelitakunata juchallicherqa, chaymanta mana karunchakorqachu.

³² Chaymantapacha Tata Diosqa Israel suyoj jap'iyninta pisimanta pisi juch'uyyachiyta qallarerqa. Siria suyuta kuraj kamachej Jazaelqa Israel suyuman tukuynejmanta yaykuykamorqa.

³³ Inti llojsimuynejman, Jordán mayumantapacha, tukuy Galaad jap'iyta, Gad, Rubén, Manasés jatun ayllukunaj jap'iyninkuta ima maqanakupi atipaspa, jap'erqa. Jinallataj Aroer cheqaman, Arnón wayq'omantapacha, Galaadkama chantá Basankama chayarqa.

³⁴ Jehú kamachishaspa tukuy ruwasqan, chantá waj ruwasqan, chay jina wapu kasqan ima Israel suyuta kuraj kamachejkunaj ruwasqankumanta willaj qhelqapi qhelqasqa kashan.

³⁵ Jehú wañupojtintaj, Samariapi ayanta p'ampaykorqanku. Paypa cuentanmantataj churin Joacaz kamacherqa.

³⁶ Jehuqa Samaria llajtamantapacha iskay chunka pusajniyoj watata Israel suyuta kamacherqa.