2 Reyes 1 - DIOSPA QHELQACHISQ

Ocozías wañupun

¹ Kuraj kamachej Ajab wañusqanmanta qhepata, Moab llajtayojkuna israelitakunaj contranpi oqharikorqanku.

² Israelpi kuraj kamachej Ocoziasrí, Samariapi altopata wasinpa ventananmanta urmaykamusqanrayku, allin nanasqa kasharqa. Chayrayku kamachinkunata kacharqa Ecrón llajtayojkunaj diosninku Baal Zebubta tapunankupaj, onqoyninmanta kutirenqachus manachus, chayta yachayta munaspa.

³ Chantá Tata Diospa angelnenqa Tisbé llajtayoj Eliasta nerqa: Samariamanta kuraj kamachej kachankunata taripaj rispa, paykunata ninki: Ecrón llajtayojkunaj diosninku Baal Zebubta tapukamunaykichejtaqa, imarayku mana Israel suyupi kaj Diosta tapukamunkichejchuri?

⁴ Chayrayku Tata Diosqa kay jinata nisunki: Puñunaykimanta mana sayarinkichu, wañupunkipuni, nispa. Eliastaj rispa, kuraj kamachejpa kachankunaman kikinta willarqa.

⁵ Chantá kachakuna kuraj kamachejpaman kutimpojtinku, pay taporqa: Imaraykutaj kutimpunkichejri? nispa.

⁶ Paykunataj kuticherqanku: Ñanpi uj runawan tinkorqayku, paytaj niwarqayku: Kutispa, kachamusorqachej chay kuraj kamachejman kay jinata niychej: Ajinata Tata Dios nisunki: Ecrón llajtayojkunaj diosninku Baal Zebubta tapuchikamunaykipaj, manachu Israel suyupi Dios tiyan? Chayrayku kunanqa puñunaykimanta mana sayarinkichu, wañupunkipuni, nispa.

⁷ Chantá kuraj kamachej paykunata taporqa: Imayna rijch'ayniyojtaj karqa, chayta nisorqachej, chay runari? nispa.

⁸ Paykunataj kuticherqanku: Chay runaqa qaramanta p'achayoj, qaramanta chumpiyoj ima karqa, nispa. Chantá kuraj kamachej nerqa: Chayqa Tisbé llajtamanta Elías karqa, nispa.

⁹ Chaypacha kuraj kamachej Ocozías phishqa chunka soldadokunata, capitannintawan ima kacharqa. Chay capitantaj orqo pataman wicharerqa, maypichus Diosmanta sut'inchaj Elías tiyasqa kasharqa, chayman. Chantá nerqa: Diosmanta sut'inchaj, kuraj kamachej nisunki, noqaykuwan kuraj kamachejpaman rinaykita, nispa.

¹⁰ Eliastajrí capitanta nerqa: Sichus Diosmanta sut'inchaj kani chayqa, janaj pachamanta nina urayk'amuspa, qanta, soldadoykikunatawan ruphaykusuchun, nispa. Ninataj janaj pachamanta urayk'amuspa, capitanta, chantá soldadonkunatawan ima ruphaykuspa wañuracherqa.

¹¹ Chantá kuraj kamachejqa waj capitanta, phishqa chunka soldadokunatawan ima kachallarqataj. Capitantaj Eliasta nerqa: Diosmanta sut'inchaj, kuraj kamachej nisunki: Kunanpacha noqaykuwan kuraj kamachejpa ñawpaqenman rinayki tiyan, nispa.

¹² Eliastajrí kuticherqa: Sichus Diosmanta sut'inchaj kani chayqa, janaj pachamanta nina urayk'amuspa, qanta, soldadoykikunatawan ima ruphaykusuchun, nispa. Chantá janaj pachamanta ujllata nina urayk'amuspa, capitanta, soldadokunatawan ima ruphaykorqa.

¹³ Chaymanta kuraj kamachej ujtawan phishqa chunka soldadokunata, capitannintawan ima kachallarqataj. Kaytawanqa kinsa kutitaña kacharqa. Chay capitanrí Eliaspaman chayaspa, qonqoriykukuytawan mañakorqa: Diosmanta sut'inchaj, mañakuyki, noqata chantá kay phishqa chunka soldadoykunatawan ima ama wañuchinawaykuta.

¹⁴ Yachani ñawpajta jamoj capitankunata, soldadonkunantinta ima janaj pachamanta nina urayk'amuspa ruphaykusqanta. Chayrayku ari mañarikuyki khuyarikunawaykuta, nispa.

¹⁵ Jinapi Tata Diospa angelnenqa Eliasta nerqa: Paywan rillay, amataj manchachikuychu, nispa. Eliastaj urayk'uspa, capitanwan kuraj kamachejpa ñawpaqenman rerqa.

¹⁶ Kuraj kamachejpaman chayaspataj, Elías payta nerqa: Tata Dios ajinata nisunki: Qanqa Ecrón llajtayojkunaj diosnin Baal Zebubta tapumojta kacharqanki, manapis Israel suyupi Dios kanmanchu karqa jina. Chayrayku kunanqa mana qhaliyankichu, wañupunkipuni, nispa.

¹⁷ Ajinata Tata Dios Eliasnejta nisqanman jina, kuraj kamachej Ocozías wañuporqa. Ocoziaspa churinkuna mana ujpis kasqanraykutaj, paypa cuentanmanta wawqen Jorán kamacherqa, Josafatpa churin Jorán Judá suyupi iskay watataña kamachishajtin.

¹⁸ Ocozías kamachishaspa tukuy imata ruwasqan, jinataj waj imakunata ruwasqanpiwan, Israel suyuta kuraj kamachejkunaj ruwasqankumanta willaj qhelqapi qhelqasqa kashan.