2 Pedro 2 - DIOSPA QHELQACHISQ

Mana cheqanta yachachejkuna

¹ Unay israelitakuna ukhupi mana cheqanta yachachej sut'inchajkuna rikhurerqanku. Ajinallatataj qankuna ukhupipis mana cheqanta yachachejkuna rikhurenqanku. Paykuna mana reparaylla, pantachej yachachiyninkuta yachachenqanku, jinataj Tukuyta Kamachej Jesucristotapis qhesachanqanku, pichus ashkha preciowan paykunata ranterqa, chayta. Chayrayku paykuna manaraj imapi chinkachisqa kanqanku.

² May chhikataj paykuna jina millayta kawsanqanku, chay millay kawsajkunaraykutaj runakunaqa cheqan kajpa contranta millayta rimanqanku.

³ Mana cheqanta yachachejkunaqa qolqemanta wañurisqa kaspa, tukuy imaymana llulleriyota wakichisqankuwan qankunamanta qolqeykichejta ch'uskisonqachej. Paykunapaj jasut'iyrí unaymantaña wakichisqa kashan, chinkachisqa kanankutaj patallankupiña.

⁴ Diosqa wakin juchallikoj angelkunaj juchankuta mana pampacharqachu. Aswanpis paykunata ukhu pachaman wijch'uykorqa, tuti laqhapi wisq'asqa kanankupaj juzgasqa kananku p'unchay chayamunankama.

⁵ Jinallataj Diosqa ñawpa runakunaj juchankutapis manallataj pampacharqachu, maypachachus paywan churanakojkunata jatun musphay parawan chinkacherqa, chaypacha. Manachayqa Diospa cheqan justicianmanta willaj Noeta waqaycharqa, qanchis runakunatawan khuskata.

⁶ Jinallatataj Dios Sodomapi, chantá Gomorrapi tiyakoj runakunatapis chinkachisqa kanankupaj juchacharqa, ushphaman tukunankukama ninawan paykunata ruphachispa. Ajinamanta Dioswan churanakojkuna qhepanejman imapichus tukukunankuta yachacherqa.

⁷ Chaywanpis Dios cheqanta ruwaj Lotta chay wañuymanta ayqecherqa, pichus sonqonpi mayta llakikorqa millayta ruwajkunaj p'enqay ruwasqankumanta, chayta.

⁸ Chay cheqan runa paykuna ukhupi tiyakuspa, sapa p'unchay sonqonpi mayta llakikoj, chay jina millay ruwasqankuta rikuspa, uyarispataj.

⁹ Ajinata reparanchej, Diosta kasuspa purejkuna juchallinaman tanqasqa kashajtinku, Tukuyta Kamachej Diosqa paykunata kacharichiyta yachasqanta. Pay yachallantaj millayta ruwajkunata juzganan p'unchaypi jasut'isqa kanankupaj jallch'ayta.

¹⁰ Astawanqa jasut'enqa, pikunachus khuchichakuspa purinaman qokunku, chaykunata. Paykunaqa Diospa tukuyta kamachej kayninta pisipaj qhawanku. Mana manchachikuyniyoj may kasqankuta yuyakuspataj, paykuna janaj pachapi atiyniyojkunapaj rimaytapis mana manchachikunkuchu.

¹¹ Angelkunarí chaykunamanta aswan kallpayoj, chantá atiyniyoj kashaspapis, Tukuyta Kamachej Diospa ñawpaqenpi janaj pachapi atiyniyojkunata mana juchachankuchu.

¹² Chay runakunarí mana imata yachaspa, mana allinta parlanku. Paykuna animal jina wañuchisqa kanankupaj churasqa kanku, ajinallatataj chinkachisqa kanqanku.

¹³ Ujkunata ñak'arichisqankumanta paykunapis ñak'arichisqallataj kanqanku. Paykuna sut'i p'unchaypi millayta ruwaspa misk'irichikunku. Jinallataj chay yachachejkuna qankunawan khuska mikhuspa, k'achata kawsakuy tantakusqaykichejta ch'ichichanku, kusikunkutaj qankunata q'otiyasqankumanta.

¹⁴ Chay runakunaqa pi warmitapis qhawanku paywan puñuykuyta munaspa, juchallispataj, mana sajsakunkuchu. Chantá Cristopi mana tukuy sonqochu atinikojkunaj sonqonkuta suwaspa, paykunata juchallinaman aysanku. Jinallataj chay yachachejkuna tukuy imata munapayanankupaj churasqa kanku. Chayrayku paykuna Diospa maldicisqan kanku.

¹⁵ Mana cheqanta yachachejkunaqa cheqan ñanmanta pantaykuspa, Beorpa churin Balaampa sarusqanta sarushanku. Payqa millay kajta ruwasqanmanta, qolqeta ganakuyta maytapuni munasqa.

¹⁶ Chaywanpis Balaamqa juchallisqanrayku mana parlaj china burrowan k'amichikusqa. Chay burrotaj runa jina parlaspa, chay mana yuyayniyoj sut'inchajta yuyayninman kutichisqa.

¹⁷ Chay yachachejkunaqa ch'aki pujyu jina kanku, sinch'i wayraj apaykachasqan phuyu jinataj. Paykunapajrí aswan tuti laqhayay wiñaypaj wakichisqa kashan.

¹⁸ Chaykuna paykunamanta manchayllata parlanku, parlasqankurí qhasi manakaj. Chantá paykuna pikunachus kunallanraj pantasqa purinamanta ñak'ayllata ayqekojkunata yuyaychanku munasqankuman jina purispa juchallinaman kutirinankuta.

¹⁹ Chay yachachejkuna wajkunata ninku juchallispa kawsanamanta kacharichisqa kayta atinankuta. Paykunatajrí millay kawsaypa wata runan kanku, imaraykuchus atipachikoj runaqa atipajninpa wata runanman tukun.

²⁰ Paykunaqa Tukuyta Kamachej Jesucristo Qhespichejninchejta rejsisqankurayku, Diosman mana kutirikojkunaj millay ruwasqankuta manaña ruwarqankuchu. Chaywanpis sichus watej ch'ichi kawsaywan ch'ipaykuchikuspa atipachikunku chayqa, aswan qhepaman kawsayninku aswan mana allin kanqa ñawpa kawsayninkumanta nisqaqa.

²¹ Manachus cheqan ñanta rejsinkuman karqa chayqa, paykunapaj aswan allin kanman karqa, chayta rejsispaña Diospa qosqan llimphu kamachisqanmanta qhepaman kutiripunankumanta nisqaqa.

²² Chaywanpis paykunapi runaj nisqanku junt'akun: Alqoqa lansasqanta watej mikhukapullantaj, mayllasqa khuchipis watej t'urupi sunt'imullantaj, nispa.