2 Corintios 8 - DIOSPA QHELQACHISQ

Pisichikoj wawqe panakunata yanapana

¹ Kunanqa wawqe panakuna, qankunaman willayta munayku imaynatachus Dios khuyakuspa Macedoniapi kaj iglesiakunanejta ruwasqanta.

² May sinch'i llakiykunata ñak'arishajtinkupis, kusikuyninkoqa may jatunmin karqa. Jinallataj wajcha kashaspa, qhapajpis kankuman jina, paykuna yanapanankupaj tukuy sonqo qolqeta qorqanku.

³ Noqa testigo kani, paykuna mana atisqankuman jinallachu qosqankumanta. Manachayqa chaymantapis astawanraj qorqanku, sonqomanta munasqankurayku.

⁴ Paykuna kutin kutinta mañarikuwarqayku tantasqanku qolqeta jap'inaykuta, Jerusalén llajtapi kaj wawqe panakunaman apanaykupaj.

⁵ Macedoniapi wawqe panakunaqa mana suyasqaykuman jinallachu ruwarqanku. Aswanpis ñawpajta paykuna kikinkuta Tukuyta Kamachej Jesusman jaywaykukorqanku, chaymantataj noqaykumanpis, Diospa munasqanman jina.

⁶ Ñawpajta Tito yuyaychasorqachej k'acha kaspa yanapanapaj qolqeta oqharinaykichejta. Chayrayku kunan payta mayta nerqayku, imatachus qankuna ukhupi ruwayta qallarisqanta tukuychananta.

⁷ Qankuna tukuy imapi ñawpajpipuni kankichej: Diospi atinikuypi, parlaypi, yachaypi, ruwanapaj k'uchi kaypi, noqaykupaj munakuypi ima. Kunanqa ajinallataj k'acha kaspa yanapanapaj qolqe tantanapi ñawpajpi kaychej.

⁸ Chayta nispaqa, noqa mana kamachishaykichejchu imatachus ruwanaykichejta. Manachayqa yachanaykichejta munani, imaynatachus ujkuna tukuy sonqo yanapanankupaj qolqeta qoshanku, chaymanta. Ajinamanta qankuna reparakuyta atinkichej imayna munakuywanchus wajkunata yanapanaykichejpaj qoshasqaykichejta.

⁹ Ña qankuna rejsinkichejña Tukuyta Kamachej Jesucristoj k'acha yanapayninta. Pay may qhapaj karqa chaypis, qankunata munakuspa wajchaman tukorqa, chay wajcha kayninnejta qankuna qhapajyachisqa kanaykichejpaj.

¹⁰ Qankunaj allinniykichejta munaspa, noqa imatachus ruwanaykichejta yuyaychaykichej: Walej kanman, imatachus qayna watamantapacha qallarerqankichej, chayta junt'anaykichejta. Chaypacha qankuna yanapata qoyta munarqankichej, manataj nillarqankichejchu, aswanpis qankuna ñawpajta qoyta qallarerqankichej.

¹¹ Kunantajrí imatachus ruwayta qallarerqankichej, chayta tukuychaychej. Imaynatachus qallariypi tukuy sonqo yanapata qorqankichej, ajinallatataj kunan tiyapususqaykichejman jina qospa, qolqeta tantaychej.

¹² Sichus pipis tukuy sonqowan qoyta munan chayqa, Dios chay qosqanta kusiywan jap'enqa. Pay munan tiyapuwasqanchejman jinalla qonanchejta, manataj mañakuwanchejchu mana tiyapuwajtinchejqa.

¹³ Chaywanqa mana niytachu munaykichej, chay qosqaykichejwan wakin tukuy imayoj kanankuta, qankunataj pisichikunaykichejta. Manachayqa munayku qankunawan, paykunawan ima mana pisichikuspa kanaykichejta.

¹⁴ Kunanqa qankuna tiyapuyniyoj kaspa, pisichikojkunata yanapayta atinkichej. Aswan qhepamanrí qankuna pisichikushajtiykichej, paykunapis qankunata yanaparillasonqachejtaj. Ajinamanta tukuyniykichej kawsanaykichejpaj kallanqa.

¹⁵ Diospa Qhelqachisqanpi nin jina: Ashkhata pallakojpaj mana puchorqachu, nitaj pisillata pallakojpajpis piserqachu, nispa.

¹⁶ Noqaqa Diosta pachis nini, imaraykuchus pay Titoj sonqonman churarqa qankunamanta yuyarikunanpaj, imaynatachus noqa qankunamanta yuyarikunipuni, ajinallatataj.

¹⁷ Paytaj: Rerqoy, nispa nisqaykuta kasuwarqayku. Payqa tukuy sonqo yanapayta munasunkichej, kunantaj pay munasqanrayku qankunata watukoj jamonqa.

¹⁸ Noqayku Titotawan khuskata uj wawqetapis kachamushallaykutaj. Paymantaqa tukuy iglesiakunapi allinta parlanku Jesucristomanta sumaj willayta willarasqanmanta.

¹⁹ Jinapi iglesiakuna chay wawqeta ajllarqanku noqaykuwan khuska qolqeta apaspa Jerusalenman rinanpaj. Ajinata ruwashayku Tata Dios jatunchasqa kananpaj, chantapis khuyakoj sonqoyoj kasqaykuta rikuchinaykupaj.

²⁰ Chantá ashkha ukhu rishayku ama pipis rimananpaj kay qolqe tantasqaykuta imaynatachus apaykachasqaykumanta.

²¹ Astawanpis tukuy imata cheqantapuni ruwayta munayku, mana Diospa ñawpaqellanpichu, manachayqa runakunaj ñawpaqenpipis.

²² Chantapis paykunawan khuska waj wawqenchejtapis kachamushallaykutaj. Noqayku sapa kuti rikuyku pay tukuy ima ruwanapi k'uchi kasqanta. Kunantaj pay imayna sonqoyojchus kasqaykichejta yachaspa, astawan kusisqa jamushan.

²³ Sichus pipis Titomanta tapukunman chayqa, qankuna willaychej kawsaqey kasqanta, yanapawajniytaj, qankunata yanapananpaj. Chay waj wawqekunamanta pipis tapukojtinkutaj, willaychej paykuna iglesiakunaj kachasqan kasqankuta, paykunataj imaynachus kawsasqankuwan Cristota jatunchasqankuta ima.

²⁴ Chayrayku munakuyniyoj kasqaykichejta paykunaman rikuchiychej, ajinamanta iglesiakuna yachanankupaj imaraykuchus noqayku qankunamanta sonqo junt'asqa kasqaykuta.