2 Corintios 7 - DIOSPA QHELQACHISQ

¹ Ajinaqa, munasqa wawqe panakuna, Dios chay imakunata qonawanchejta nin. Chayrayku tukuy mana allin kajmanta karunchakuna, jinataj sonqonchejtapis tukuy ch'ichi kajmanta llimphuchana. Chantá Diosta may jatun respetowan qhawaspa, atisqanchejta ruwana pay jina llimphupuni kananchejpaj.

Diosman kutirikusqankumanta Pablo kusikun

² Noqaykupaj sonqoykichej kachun ari. Noqayku mana pitapis mana allin kajta ruwarqaykuchu, nitaj pitapis pantacherqaykuchu, nillataj allinniykuta mask'aspa pitapis ch'awkiyarqaykuchu.

³ Chaytaqa mana qankunata juchachanayraykuchu niykichej, imaraykuchus ñawpajtaña nerqaykichej qankunaqa sonqoykupi kashasqaykichejta, wañuspapis, kawsaspapis khuskapuni kananchejpaj.

⁴ Sut'ita parlaykichej, qankunawantaj may sonqo junt'asqa kani. Tukuy llakiyniykupi kashajtiykupis, qankunarayku may sonqochasqa, kusisqataj kani.

⁵ Macedoniaman chayamusqaykumantapacha, mana uj chhikallatapis samarikorqaykuchu aswanpis imaymana llakiykuna qhatiriwarqayku. Muyuyniykupi ch'ajwakuna karqa, sonqoykupitaj manchachikorqayku.

⁶ Chaywanpis Dios, pikunachus llakisqa kashanku, chaykunata sonqochajqa noqaykutapis Titoj chayamusqanwan sonqochawarqayku.

⁷ Mana Titoj chayamusqanllamantachu sonqochakorqayku. Aswanpis imaynatachus qankuna payta sonqochasqaykichejta yachaspa, chayllamantataj sonqochakorqayku. Tito willawarqayku imaynatachus qankuna rikuyta munawasqaykuta, noqamantapis llakikusqaykichejta ima. Jinallataj willawarqayku noqarayku sonqoykichejta nanachikusqaykichejta, chaytaj astawanraj kusichiwarqa.

⁸ Qhelqamusqay cartawanchus noqa llakicherqaykichej chaypis, mana chaymanta pesachikunichu. Chaypacha pesachikorqani, imaraykuchus repararqani apachimusqay carta qankunata uj chhikata llakichisusqaykichejta.

⁹ Kunantajrí kusikuni, mana llakichisusqaykichejraykuchu. Manachayqa kusikuni, imaraykuchus chay llakiyrayku qankuna juchallikusqaykichejmanta Diosman kutirikorqankichej. Qankuna llakikorqankichej, Dios imaynatachus munan pipis juchanmanta llakikunanta, ajinata. Chayrayku chay cartata qhelqaspa, noqayku mana ima mana allintapis ruwarqaykuchu.

¹⁰ Diospa munasqanman jina llakikoyqa runata pusan juchamanta Diosman kutirikunanpaj, ajinamanta qhespichisqa kananpaj. Chaymantaqa mana pesachikunachu. Chaywanpis Diosman mana kutirikojkunaj yuyasqankuman jina llakikoyqa runata Diosmanta karunchachin.

¹¹ Qankunarí Diospa munasqanman jina llakikorqankichej. Kunantaj qhawariychej imachus chaymanta kasqanta: Qankuna mayta munarqankichej mana juchayojpaj qhawasqa kayta. Chay jucharayku phiñakorqankichej, manchachikullarqankichejtaj. Chantá rikuwaytapuni munarqankichej, jinallataj tukuy sonqowan munarqankichej chay juchallej wanananpaj jasut'isqa kananta. Ajinata ruwaspa, sut'ita yachayta qorqankichej imachus mana allinchu kasqanmanta mana juchayoj kasqaykichejta.

¹² Ajinaqa cartata qhelqamushaspa, noqa mana chay juchallikojpichu yuyasharqani, nitaj pejpa contranpichus juchallikorqa, chay runapichu. Aswanpis qhelqamorqaykichej, qankuna Diospa ñawpaqenpi reparakunaykichejpaj noqaykurayku imaynatachus phutikusqaykichejta.

¹³ Chayraykutaj kunan noqayku may sonqochasqa kayku. Chaywanpis astawan kusikuyku Tito kusisqa kasqanmanta, imaraykuchus qankuna sonqonta oqharerqankichej.

¹⁴ Ñawpajta qankunamanta Titowan parlaspaqa, noqa mayta jatuncharqaykichej, qankunataj mana p'enqaypi rikhurichiwarqankichejchu. Imaynatachus mana llullakuspa qankunaman nerqayku, ajinallatataj imatachus qankunamanta Titoman willarqayku, chaytapis manallataj llullakorqaykuchu.

¹⁵ Tito mayta munakusunkichej, imaraykuchus sapa kuti yuyarikun payta kasusqaykichejmanta. Pay chayamojtin, qankuna jatun respetowan jap'erqankichej, manchachikuywan ima.

¹⁶ Kunantaj noqapis mayta kusikullanitaj qankuna tukuy imapi kasukoj kasqaykichejmanta.