2 Corintios 6 - DIOSPA QHELQACHISQ

¹ Ajina ari, Diospa ruwayninpi yanapakojkuna kaspa, noqayku mañarikuyku ama pisipaj qhawanaykichejta Diospa qhasilla k'acha yanapayninta jap'isqaykichejta.

² Diospa Qhelqachisqanpi pay nin: Khuyakunay p'unchay chayamojtin, uyarerqayki, qhespichina p'unchaypitaj yanaparqayki, nispa. Kunanmin khuyakuyta tarina p'unchay, kunanmin qhespichisqa kana p'unchayqa.

³ Noqayku mana pitapis misk'achiykuchu, Diospaj imatachus ruwasqaykumanta ama pipis rimananpaj.

⁴ Aswanpis tukuy ima ruwasqaykupi rikuchiyta munayku Diospa sumaj kamachinkuna kasqaykuta. Ima ñak'ariypis qhatiriwajtiyku, noqayku sonqoykuta tiyaykuchispa ñak'ariyku pisichikuypi, llakiykunapi ima.

⁵ Noqayku jasut'isqa karqayku, carcelmantaj churasqa. Jinallataj runa ch'ajwata jatarichispa, wañuchiyta munawarqayku. Jinataj sinch'ita llank'arqayku wakin kuti mana puñusqa, nitaj mikhusqa.

⁶ Chaywanpis noqaykoqa Diospa sumaj kamachinkuna kasqaykumanta yachayta qoyku llimphu kawsayniyoj kaspa, yachayniyoj kaspa, llamp'u sonqo kaspa, chantá k'acha kaspa ima. Ajinata ruwayku Santo Espíritoj kamachiyninpi kaspa, ch'uwa sonqo munakuywan ima.

⁷ Jinallataj Diospa simi nisqanta mana q'ewispa willayku, Diospa jatun atiynintaj noqaykupi llank'an. Cheqan kajtataj armata jina jap'iyku imapis kajtin kutichikunaykupaj, jinallataj atipanaykupaj.

⁸ Wakin kutipeqa allinpaj qhawasqa kayku, waj kutipitaj mana. Wakin kutipeqa noqaykumanta allinta parlanku, waj kutipitajrí mana. Cheqa kajta parlajtiykupis, llullata jina qhawawayku.

⁹ May rejsisqa kashajtiykupis, wakinkuna mana rejsej tukuwayku. Wañuy patapi kashaspapis, kawsashaykuraj. Sinch'ita jasut'iwayku chaypis, mana wañuchiwaykuchu.

¹⁰ Llakisqa jina kayku, chaywanpis kusisqapuni kashayku. Wajcha jina kayku, chaywanpis wajkunata Diosmanta yachachispa qhapajyachiyku. Mana kapuyniyoj jina kashayku chaypis, tukuy imayoj kayku.

¹¹ Corintomanta munasqa wawqe panakunáy, ajinata nispaqa, sut'ita parlayku, sonqoykupi imachus kajta mana pakaspa.

¹² Noqaykoqa tukuy sonqo qankunata munakuyku, qankunatajrí mana jinatachu munakuwayku.

¹³ Kunanqa wawaykunata jina niykichej: Qankunapis tukuy sonqo munakuwayku ari, imaynatachus qankunata munakuyku, ajinata, nispa.

Kawsaj Diospa templon kanchej

¹⁴ Ama uj yugollapi yananchakuychejchu Diosman mana kutirikojkunawan. Cheqa kajqa mana allin kajwan mana yananchakuyta atinchu, nillataj k'anchaypis laqhawanqa khuska purinkumanchu.

¹⁵ Jinallataj Cristowan, Kuraj Supay Belialwanqa mana kawsakunkumanchu, nillataj Cristopi atinikojpis mana Diosman kutirikojwanqa ujchasqa kawsakunmanchu.

¹⁶ Diospa Templonpeqa ni ima lanti kananchu tiyan, icharí? Qankunamin kawsashaj Diospa templon kankichej. Diosmin kayta nin: Noqaqa paykuna ukhupi tiyakusaj, purisajtaj. Paykunaj Diosninku kasaj, paykunataj aylluy kanqanku, nispa.

¹⁷ Chayrayku Dios nillantaj: Paykunaj chawpinkumanta llojsiychej, t'aqakuychejtaj. Ama ch'ichipaj qhawasqa kajta llankhaychejchu, noqataj qankunata jap'ikapusqaykichej.

¹⁸ Chantá noqa Tataykichej kasaj, qankunataj churiykuna, ususiykunataj kankichej, nispa. Ajinata Tukuy Atiyniyoj Dios nin.