2 Corintios 3 - DIOSPA QHELQACHISQ

Mosoj tratomanta willajkuna

¹ Kay tukuyta mana noqayku kikinmanta allinpi qhawasqa kayta munaspachu parlashayku. Manallataj wakinkuna jina wajkunamanta cartata mañakuykuchu, qankuna ukhupi allin qhawasqa kanaykupaj. Nillataj qankunamanta cartata mañashaykuchu wajkuna allinpaj qhawanawaykupaj.

² Aswanpis wajkuna noqaykuta allinta qhawanawaykupaj qankunamin carta jina kankichej, tukuy runakuna ñawirinankupaj. Kawsayniykichejta rikuspa, reparanku qankuna ukhupi ruwasqayku allin kasqanta.

³ Arí, sut'i kashan, qankuna Cristoj qhelqasqan cartan kasqaykichejta, noqaykutaj chay cartata tukuyman rejsicherqayku. Chay cartaqa mana tintawanchu qhelqasqa, aswanpis kawsaj Diospa Espiritunwan. Manataj rumi tablapichu ch'eqosqa karqa, aswanpis runaj sonqon ukhupi.

⁴ Noqaykoqa Cristonejta, Diospi atinikuspa, kayqa ajinapuni kasqanta yachayku.

⁵ Manataj niykumanchu noqallaykumanta imatapis ruwayta atinallaykuta, manachayqa niyku imatapis ruwanaykupaj chay ateyqa Diosmanta jamusqanta.

⁶ Kikin Diosllataj mosoj tratomanta yachachejkuna kanaykupaj churawarqayku. Chay tratotaj mana qhelqasqa kamachisqaman jinachu, aswanpis Santo Espirituman jina, imaraykuchus qhelqasqa kamachisqakunaqa juchallejta wañuchin, Santo Espiritutajrí kawsachin.

⁷ Rumipi ch'eqosqa kamachisqaqa runata wañuchisqa kananpaj juchacharqa chaypis, Diospa jatun kayninpa lliphipiyninwan jamorqa. Chayrayku israelitakunapis Moisespa uyanta mana qhawariyta aterqankuchu, uyan anchata lliphipishasqanrayku. Chaywanpis, chay k'anchayqa pisimanta pisi chharpuyasharqa.

⁸ Kunanrí Santo Espíritoj ruwayninpi manachu Diospa jatun kayninpa lliphipiynin astawanraj lliphipenqa?

⁹ Runata wañuchisqa kananpaj kamachisqaqa Diospa jatun kayninta rikucherqa. Jina kajtenqa, manachu runata cheqanpaj qhawasqa kanamanta willay astawanraj Diospa jatun kayninta rikuchenqa?

¹⁰ Ajinaqa chay ñawpa kamachisqaqa manaña chaykama lliphipiyniyojchu, imaraykuchus kay mosoj tratoqa astawanpuni lliphipin.

¹¹ Sitajchus tukukoj kamachisqa sinch'i lliphipiyniyoj karqa chayqa, chay wiñaypaj kajqa may jinatarajchus lliphipenqa.

¹² Chay mosoj trato wiñaypaj kasqanta yachasqaykurayku, noqayku mana manchachikuspa sut'inta parlayku.

¹³ Mana Moisés jinachu ruwayku. Payqa velowan uyanta qhataykukorqa, israelitakuna ama reparanankupaj, imachus tukukunan karqa, chay k'anchay chharpuyashasqanta.

¹⁴ Paykunataj chayta mana entiendeyta aterqankuchu yuyayninku laqhayachisqa kasqanrayku. Kunan p'unchaykama israelitakuna chay ñawpa tratota ñawirejtinku, yuyayninkoqa velowan jina qhatasqa. Chaywanpis chay velo qhatarakun, maypachachus Cristopi atinikunku, chaypachalla.

¹⁵ Arí, kunan p'unchaykamapis Moisespa kamachisqanta ñawirejtinku, chay veloqa sonqonkuta qhatan.

¹⁶ Chaywanpis, maypachachus pipis Tukuyta Kamachej Diosman kutirikun, chaypacharaj Dios chay velota qhechun.

¹⁷ Tukuyta Kamachej Dios, nispa Espiritumanta parlashan. Jinataj maypichus Diospa Espíritun kashan, chaypi manaña ima jark'aypis kanchu.

¹⁸ Chayrayku tukuyninchej Diospa jatun kayninpa lliphipiyninta uya qhatarasqa qhawashanchej broncemanta espejopi jina. Jinallataj Diospa Espíritun paypa rijch'ayninman tukuchishawanchej, astawan astawan Diospa jatun kaynin noqanchejpi rikuchikunanpaj.