2 Corintios 12 - DIOSPA QHELQACHISQ

Mosqoypi jina Pabloj rikusqan

¹ Noqa kikiy jatunchakuspaqa, mana imatapis tarinichu. Chaywanpis, kunanqa Tukuyta Kamachej Jesús mosqoypi jina imatachus rikuchiwasqanmanta chantá sut'inchawasqanmanta ima willasaj.

² Noqaqa Cristota qhatikoj uj runata rejsini, pichus chunka tawayoj wata pasayta, kinsa kaj janaj pachakama apasqa karqa, chayta. Mana yachanichu ukhuntinchus, chayrí almallanchus apasqa kasqanta. Chayta Dioslla yachan.

³ Cheqapuni, Tata Dioslla yachan chay runa ukhuntinchus, chayrí almallanchus apasqa kasqanta. Chaywanpis yachani chay runaqa

⁴ Paraíso nisqa cheqaman apasqa kasqanta, maypichus pay mana parlay atinata uyarerqa, chayman. Chaykunamanta runa parlananpaj Dios mana parlananta ninchu.

⁵ Chay jina runamanta noqa jatunchakuyta atiyman. Noqa kikiymantarí mana jatunchakusajchu, manachayqa pisi kallpa kasqallaymanta.

⁶ Jatunchakuyta munayman chaypis, mana wampuchu kayman, imaraykuchus cheqa kajta parlashani. Chaywanpis mana jatunchakusajchu, ama pipis rikuwaspa, chayrí uyariwaspa imachus kasqaymanta astawanraj yuyananpaj.

⁷ Manallataj jatunchakusajchu chay jatuchaj t'ukuna imakunata rikusqaymanta. Chayrayku ama may kasqayta yuyakunaypaj, ukhuypi uj ayjonwan jina t'ojsisqa karqani. Chayqa Satanaspa kachasqan karqa ñak'arichinawanpaj, ama jatunchakunaypaj.

⁸ Noqaqa Tata Diosmanta kinsa kutita mañakorqani, chay ñak'ariymanta kacharichinawanpaj.

⁹ Diostajrí niwarqa: Chay ñak'ariyniykita awantanaykipaj k'acha yanapaynillay yanapasonqa, imaraykuchus atiyneyqa pisi kallpayojkunapi astawan rikuchikun, nispa. Chayrayku kusiywan pisi kallpayoj kasqaymanta jatunchakusaj, Cristoj atiynin noqapi imatachus ruwasqan sut'ita rikukunanpaj.

¹⁰ Chayrayku pisi kallpayoj kasqaymanta kusikuni. Jinallataj p'enqachisqa kasqaymanta, pisichikusqaymanta, qhatiykachasqa kasqaymanta, Cristomanta atinikusqayrayku, sinch'i llakiypi rikhurisqaymanta ima. Chaymanta noqa kusikuni, imaraykuchus pisi kallpayoj kashaspa, Jesusnejta aswan kallpayoj kani.

Pablo Corintopi iglesiamanta phutikun

¹¹ Noqa kikiymanta parlaspaqa, mana yuyayniypichu kashaymanpis jina parlarqani. Chaytarí qankunallataj parlachiwarqankichej. Mana imachu kani chaypis, noqaqa mana imapipis aswan pisichu kani, pikunachus yuyakunku Jesucristoj may sumaj kuraj kachankuna kasqankuta, chaykunamanta nisqaqa. Chayrayku qankunamin noqata jatunchanawaykichej karqa.

¹² Qankuna ukhupi noqa pacienciawan runaj mana jayk'aj rikusqan imakunata ruwarqani, jatuchaj imakunata, t'ukuna ruwanata ima. Ajinamanta yachayta qorqaykichej noqapis Jesuspa kuraj kachankunamanta ujnin kasqayta.

¹³ Qankunataj mana imapipis aswan pisichu karqankichej waj iglesiakunamanta nisqaqa, manachayqa kayllapi: Qankuna ni uj chhika qolqellawanpis yanapawarqankichejchu. Chayrayku qhespichiwaychej, noqa juchayoj kani yanapanawaykichejta mana mañakusqaymanta.

Pablo ujtawan paykunata watukoj jamunanta nin

¹⁴ Kunanqa qankunata ujtawan watukoj jamunaypaj wakichikushani, kaywantaj qankunata watukoj jamusqayqa kinsa kutiña kanqa. Kunanpis manallataj qolqewan yanapanawaykichejta mañakusqaykichejchu, imaraykuchus mana imata jaywanawaykichejtachu mask'ashani, aswanpis qankunatamin mask'ashaykichej. Mana wawakunachu tata mamankuta uywananku tiyan, manachayqa tata mamaqa wawankukunata uywanku. Qankunataj wawaykuna jina kankichej.

¹⁵ Noqaqa may kusiywan tiyapuwasqanta qankunarayku tukuchisaj. Kawsayniytapis tukuchillasajtaj. Sichus qankunata ajinata munakuykichej chayqa, imaraykutaj qankuna astawan pisita munakuwankichejri?

¹⁶ Yachankichej jina, noqa mana imatapis qankunamanta mañakorqaykichejchu. Chaywanpis wakin yuyanku noqa q'otiyaspa, pakayllamanta qankunamanta imatapis qochikusqayta.

¹⁷ Niwaychej, kachamusqay wawqekunamanta mayqentaj qankunamanta qolqeta orqhosorqachejri?

¹⁸ Noqaqa Titota mañakorqani qankunata watukunanta, paywantaj waj wawqeta kachamorqani. Titoqa qankunamanta qolqeta mañakusorqachejchu? Mana, icharí? Manachu Titowan noqawan uj sonqolla kayku? Manachu imatapis ruwanaykupaj uj yuyaylla kayku?

¹⁹ Ichapis qankuna yuyashankichej noqayku ñawpaqeykichejpi allinpi rikhuriyta munaspa kutichikushasqaykuta. Chayqa mana jinachu. Aswanpis noqayku Diospa ñawpaqenpi parlashayku, Cristojta kajkuna jina. Munasqa wawqe panaykuna, tukuy imata ruwayku qankunata yanapasunaykichejpaj, ajinamanta Cristopi astawan atinikunaykichejpaj.

²⁰ Noqa manchachikushani, qankunata watukoj jamuspaqa, ichá mana munasqayman jinachu qankunata taripanaymanta, nitaj qankunapis munasqaykichejman jinachu taripawanawaykichejmanta. Chantá manchachikullanitaj qankuna ukhupi churanakuykuna kananta, qhawanakuykuna, phiñanakuykuna, t'aqanakuykuna ima. Jinallataj kanman qhasimanta tumpanakuykuna, cuento apaykachaykuna, jatunchakuykuna, ch'ajwata sayarichiy ima.

²¹ Manchachikullanitaj, qankunaman watukoj kutimojteyqa, Tata Dios qankunaj ñawpaqeykichejpi p'enqaypi rikhurichinawanmanta. Ichapis waqanay kanqa, pikunachus unayña juchallinku, manataj Diosman kutirikunkuchu, chaykunamanta. Paykuna mana Diosman kutirikunkuchu ch'ichi kawsayninkumanta, khuchichakuspa qhenchachakusqankumanta, munasqankuta ruwaspa kawsasqankumanta ima.