2 Corintios 11 - DIOSPA QHELQACHISQ

Pablo mana cheqanta yachachejkunaman kutichin

¹ Walej kanman, qankuna manapis yuyayniypichu kashayman jina parlasqayta awantarinawaykichej. Arí, pacienciawan awantariwaychej.

² Qankunamanta celosakusqayqa Tata Diosmanta. Qankunaqa qharej mana chayasqan sipas jina kankichej, noqataj uj qharillawan casaranaykichejpaj parlacherqaykichej, chaytaj Cristo.

³ Jinapis kharkani qankunaqa Cristomanta ch'uwa sonqo kaywan yuyasqaykichejmanta pantachisqa kanaykichejta, imaynatachus kataripis Evata q'otiyarqa, ajinata.

⁴ Chayta nini, imaraykuchus pipis jamuspa, noqayku willarqaykuña, chaymanta waj jina Jesusmanta willajtin, qankuna chay willasqanta jap'ikullankichej. Santo Espirituta jap'ikorqanchej chaypis, waj runa waj jina espiritumanta qankunaman willajtin, chaytapis jap'ikullankichejtaj. Kikillantataj pipis Jesuspa sumaj willayninmanta waj jinata yachachejtin, chaytapis jap'ikullankichejtaj.

⁵ Chaywanpis noqaqa mana aswan pisichu kasqayta yuyani, chay pikunachus Jesuspa may sumaj kuraj kachankuna kasqankuta yuyanku, chaykunamanta nisqaqa.

⁶ Noqa mana paykuna jina sumajtachu parlayta atini chaypis, allin yachayniyoj kani, noqaykutaj qankunawan kashaspa, yachayniyoj kasqaykuta tukuy imapi sut'ita rikucherqayku.

⁷ Noqaqa Diosmanta sumaj willayta qankunaman qhasilla willarqaykichej, ni ima pagota suyaspa. Ajinamanta k'umuykorqani qankuna jatunchasqa kanaykichejpaj. Chayta ruwaspaqa, jatuntachu pantaykorqani?

⁸ Waj iglesiakunata wajchayacherqani qowasqanku qolqeta jap'ikuspa, qankunata yanapanaypaj.

⁹ Qankunawan kashaspa imamanta pisichikuspapis, noqa mana suyarqanichu kawsanaypaj qankuna qonawaykichejta. Aswanpis Macedoniamanta wawqekuna chayamuspa, imachus pisiwasqanta qowarqanku. Ajinata ruwaspa, munarqani qankuna noqamanta ama chhikata llakikunaykichejta. Chantá qhepanejmanpis ajinallatapuni ruwasaj.

¹⁰ Noqa allinta yachani Cristomanta cheqa kaj willayta jap'ikusqayta. Jinallataj yachani tukuy Ajaya suyupi Jesusmanta sumaj willayta qhasilla willasqaymanta mana pipis kay kusikuyniyta qhechunawanta.

¹¹ Imaraykutaj chayta nishani? Qankunata mana munakusqaykichejraykuchu? Dios yachan maytapuni qankunata munakusqayta.

¹² Chaywanpis, imatachus kunan ruwasqaytaqa ruwallasajpuni, manataj saqesajchu chay ujkuna jatunchakunankuta, noqayku jinapis kashankuman jina.

¹³ Chaykuna llulla kuraj kachakuna kanku. Paykunataj runata pantachispa, Cristoj kuraj kachankunapis kankuman jina purishanku.

¹⁴ Chaywanpis chaymanta mana t'ukusunmanchu, imaraykuchus Supay Satanaspis k'ancharishaj ángel rijch'akojman tukuriyta yachan.

¹⁵ Chayrayku, manallataj t'ukusunmanchu Supaypa kamachinkunapis cheqanta ruwajkunaman tukusqankumanta. Chaywanpis qhepanejman paykuna millay ruwasqankuman jina jasut'isqa kanqanku.

Pabloqa Cristorayku ñak'arisqanmanta jatunchakun

¹⁶ Watejmanta niykichej: Ama pipis yuyachunchu mana yuyayniypichu kashasqayta. Chaywanpis ajinata yuyashaspapis, mana yuyayniypichu kashajta jina parlajta saqeriwaychej, ajinamanta noqapis uj chhikanta jatuncharikunaypaj.

¹⁷ Jatunchakusqayqa mana Diospa munasqanman jinachu. Aswanpis kayta nishani manapis yuyayniypichu kashayman jina.

¹⁸ Runaj yuyasqankuman jinaqa ashkhaña ruwasqankumanta jatunchakunku. Jina chayqa, noqapis ajinallatataj jatunchakuyta atini.

¹⁹ Qankuna yachayniyoj kasqaykichejta yuyakunkichej. Chaywanpis wampu runata tukuy sonqo uyarinkichej.

²⁰ Jinallataj qankuna ni imata ninkichejchu sichus pipis wata runanman tukuchisunkichej chayqa, chayrí sojsusunkichej, chantapis tukuy imaykichejta qhechusunkichej chaypis. Jinallataj qhawakullankichej pipis k'umuykachachisunkichej chayqa, chayrí uyaykichejpi jinch'asunkichej chaypis.

²¹ Noqa p'enqakuspa, niykichej: Noqayku paykuna jina ruwanaykupajqa pisi kallpayoj karqayku, nispa. Chaywanpis sichus paykuna jatunchakunku chayqa, noqapis jatunchakullasajtaj. Chayta nispaqa, ujtawan mana yuyayniypichu kashaymanpis jina parlashani.

²² Sichus paykuna hebreo miraymanta kanku chayqa, noqapis hebreollataj kani. Israelitakunachu kanku? Noqapis israelitallataj kani. Abrahampa mirayninmantachu kanku? Noqapis chayllamantataj kani.

²³ Cristoj wata runanchu kanku? Noqaqa aswanraj. Ajinata nispaqa, manapis yuyayniypichu kashayman jina parlashani. Chaywanpis paykunaj ruwasqankumanta nisqaqa ruwasqayqa aswan ashkha. Noqaqa aswan ashkha kutita carcelpi wisq'asqa karqani, jinallataj mana yupay atina seq'osqa. Chantapis, aswan ashkha kutita wañuy patapi rikhurerqani.

²⁴ Judío kurajkuna phishqa kutita kinsa chunka jisq'onniyojta jasut'ichiwarqanku.

²⁵ Kinsa kutita k'aspiwanñataj wajtawarqanku. Uj kutipitaj rumiwan ch'anqaykuwarqanku. Jinallataj kinsa kutipi, barcopi rishajtiy, chay barco p'ultiykukorqa. Chantá uj kutipi mama qocha chawpipi barco p'ultiykukusqanrayku uj tutata, uj p'unchaytawan tuytuspa karqani.

²⁶ Noqaqa Jesusmanta willaspa, tukuynejman rerqani. Rishaspataj, ashkha kutita mayuwan yaqhalla apachikorqani, jinallataj suwakuna yaqhalla imayta suwawarqanku. Judío masiykunapis wañuchiwayta munaspa, ashkha kutita wateqallawarqankutaj, chantá mana judío kajkunapis. Wañuy patapi jina karqani llajta ukhupi, ch'inkunapi, Mama qocha chawpipi ima, jinallataj Jesucristopi atinikuni nej llulla runakunaj chawpinpi ima.

²⁷ Diospaj ruwananpi sinch'ita llank'arqani, mayta sayk'uspa. Ashkha kutita mana puñusqa karqani. Jinallataj yarqhaywan, yaku ch'akiywantaj ch'ayñarqani. Wakin kutipitaj mikhunaypaj mana imapis karqachu. Chantá pisi p'achayoj kaspa, chirichikorqani.

²⁸ Chay jawa, sapa p'unchay tukuy iglesiakuna imaynachus kashasqankupi yuyaspa, noqa mayta phutikorqani.

²⁹ Sichus pipis llawch'iyan chayqa, noqa chaymanta llakikuni. Sichus pitapis misk'achinku chayqa, noqa chay misk'achejkunapaj mayta phiñakuni.

³⁰ Chaywanpis jatunchakuna kajtin, noqaqa pisi kallpayoj kasqaymanta jatunchakusaj.

³¹ Diosninchej, pichus Tukuyta Kamachej Jesucristoj Tata Diosnin wiñaypaj yupaychasqa kachun. Paytaj yachan mana llullakusqayta.

³² Damasco llajtapi kashajtiy, kuraj kamachej Aretaspa churasqan kamachejqa soldadokunata llajtaman yaykuna punkuman churarqa, presota jap'inawankupaj.

³³ Chaywanpis, wakin wawqe panakuna jatun canastaman churawaspa, llajtaj perqanpi jawa ventananta urayk'uchiwarqanku. Ajinamanta noqa kamachejpa makinmanta llusp'erqani.