2 Corintios 10 - DIOSPA QHELQACHISQ

Pablo contranpi kajkunaman kutichikun

¹ Wakin ninku qankunawan kashaspa noqa mancha manchalla kasqayta, qankunamanta karupi kashaspataj runaraw kasqayta. Chaywanpis Cristo llamp'u sonqo, jinataj k'acha sonqo kasqanrayku noqa ujta mañarikuykichej:

² Ama chayta nejkunata kasuychejchu. Manachayqa qankunaman jamuspa, sinch'ita k'amisqaykichej, imaynatachus k'amisaj, pikunachus ninku Diosman mana kutirikoj runa jinalla imatapis ruwasqaykuta, ajinata.

³ Arí, noqayku runa kayku, chaywanpis mana runa jinachu maqanakuyku.

⁴ Maqanakunayku armakunaqa Diosman mana kutirikojkunaj armankuna jinachu kanku. Aswanpis Diospa jatun atiyninwan sinch'i atiyniyoj kanku pukara jina runaj sinch'i yuyasqankuta thuñinaykupaj.

⁵ Noqayku phiriyku, pikunachus may kasqankuta yuyakuspa wajkunata jark'anku Diosta ama rejsinankupaj, chaykunaj pantasqa yachachisqankuta. Jinallataj Diospa contranpi yuyasqanku pantasqa kasqanta rikuchispa, paykunaman Cristota kasuyta yachachiyku.

⁶ Chantá qankuna tukuy imapi kasukoj kajtiykichejkama, noqayku pikunachus mana kasukojkunata jasut'isqayku.

⁷ Qankuna imatapis rijch'aynillanta qhawankichej. Sichus mayqenpis yuyan Cristojta kasqanta chayqa, yachachun noqaykupis Cristojta kasqaykuta.

⁸ Ichá qankuna yuyankichej noqaqa atiyniyoj kasqaymanta anchata jatunchakushasqayta. Chaymanta mana p'enqakunichu. Tukuyta Kamachej Jesús atiyta qowarqayku qankunata kallpachanaykupaj manataj sonqoykichejta p'akiykunaykupajchu.

⁹ Manallataj munanichu cartaykunanejta qankunata manchachiyta.

¹⁰ Wakinkuna ninku: Pabloqa qhelqasqan cartankunallapi k'arajta k'amiyta yachan. Chaywanpis uyapurakuspa, payqa pisi kallpa, parlasqanpis mana kasu ruwanapaj jinachu, nispa.

¹¹ Chayta parlajkunaqa yachachunku, noqayku karupi kashaspa, cartapi imaynatachus nerqayku, chay kikillantataj ruwasqayku qankunawan uyapura kashaspapis.

¹² Noqaykoqa mana kikinchakuyta atiykumanchu, pikunachus mayta jatunchakunku, chaykunawan. Chaywanpis paykuna kikinchakuspaqa, mana yuyayniyoj kasqankuta rikuchinku.

¹³ Noqayku mana jatunchakusqaykuchu mana kajmantaqa. Dios uj ruwanata qowarqayku, noqaykutaj chayta junt'ashaspa, qankunakama chayamorqayku. Chayrayku chayllamanta jatunchakusqayku.

¹⁴ Manachus noqayku qankunaman chayamuykuman karqa chayqa, pipis niyta atinman anchata jatunchakushasqaykuta. Chaywanpis noqaykumin qankunaman ñawpajta chayamorqayku Cristomanta sumaj willayta willaspa.

¹⁵ Noqayku manallataj jatunchakuykuchu wajkunaj ruwasqankumanta noqaykojtapis kanman jina. Aswanpis mayta munashayku qankuna ukhupi astawan llank'ayta, Diospi atinikusqaykichejpi wiñasqaykichejman jina.

¹⁶ Ajinallatataj munayku Corintomanta aswan karunejman Jesusmanta sumaj willayta willamuyta, maypichus kunankama manaraj pipis Jesusmanta willanchu, chayman. Ajinaqa ni pi nenqachu wajpa ruwasqanmanta jatunchakuyta munasqaykuta.

¹⁷ Diospa Qhelqachisqanpi nin: Pichus jatunchakuyta munajqa Tukuyta Kamachej Diosmanta jatunchakuchun, nispa.

¹⁸ Pichus anchata jatunchakojrí mana allinpajchu qhawasqa kanqa. Aswanqa, pitachus Dios jatunchan, chay runamin allinpaj qhawasqa kanqa.