2 Corintios 1 - DIOSPA QHELQACHISQ

Pablo napaykun

¹ Noqa Pabloqa Jesuspa kuraj kachan kani Diospa munayninrayku. Kay cartata qhelqamuykichej wawqenchej Timoteowan khuska, Corinto llajtapi Diospa iglesianman, Ajaya jap'iypi pikunachus Diospaj t'aqasqa kanku, chaykunaman ima.

² Tata Diosninchejmanta, chantá Tukuyta Kamachej Jesucristomanta qhasilla k'acha yanapayninku, sonqo tiyaykuyninku ima qankunawan kachun.

Llakiypi kashajtinchej Dios sonqochawanchej

³ Tukuyta Kamachej Jesucristonchejpa Tata Diosninta yupaychana, imaraykuchus payqa khuyarikoj Tata, tukuy imapi sonqochaj Diostaj.

⁴ Payqa tukuy llakiyninchejpi sonqochawanchej, noqanchejpis llakiypi, ñak'ariypi kajkunata sonqochananchejpaj, imaynatachus noqanchejpis Diosnejta sonqochasqa kanchej, ajinata.

⁵ Imaynatachus Cristorayku sinch'ita ñak'ariyku, ajinallatataj Cristonejta Dios mayta sonqochawanchej.

⁶ Noqaykuchus ñak'ariyku chayqa, chaymin kashan qankuna sonqochasqa, qhespichisqataj kanaykichejpaj. Sonqochasqachus kayku chayrí, chayqa qankunapis sonqochasqallataj, qhespichisqataj kanaykichejpaj. Ajinapeqa qankuna yachaqakunkichej llakiykuna qhatirejtin sinch'ita sayayta, imaynatachus noqayku sayayku, ajinata.

⁷ Noqayku tukuy sonqo yachayku, qankuna imaynatachus noqayku jina ñak'arinkichej, ajinallatataj sonqochasqa kanaykichejta. Imaynatachus Dios sonqochawayku, ajinallatataj qankunatapis sonqochasonqachej.

⁸ Wawqe panakuna, noqayku munayku yachanaykichejta ima llakiykunachus Asia jap'iypi qhatiriwasqaykuta. Anchatapuni ñak'arerqayku, manaña awantanaykupaj kallpapis karqañachu. Chayrayku wañupunaykuta yuyarqayku.

⁹ Noqayku wañuchisqa kanaykupaj jinaña karqayku. Chaywanpis chay karqa, mana noqallaykupichu atinikuyta yachanaykupaj, manachayqa Diosllapi, pichus wañusqakunata kawsarichin, chaypi.

¹⁰ Diostaj wañunaykumanta waqaychawarqayku. Paymin waqaychawayku jinallataj paypi atinikuyku aswan qhepamanpis waqaychanallawaykutapuni.

¹¹ Qankunapis noqaykurayku Diosmanta mañapuspa yanapashawayku. Ajinamanta ashkha runakuna Diosta pachis nenqanku, imaraykuchus mañakusqankuman kutichispa, Dios qhasilla k'acha yanapayninwan yanapawarqayku.

Pablo willan imaraykuchus Corintoman mana risqanmanta

¹² Noqayku kayta tukuy sonqo niyku: Dios yanapawarqayku ch'uwa sonqowan, chantá llimphu kawsaywan ima tukuywan allinpi kawsakunaykupaj, astawanqa qankunawan. Ajinata kanaykupaj noqayku Diospa qhasilla k'acha yanapayninpi atinikorqayku, manataj yachallasqaykupichu.

¹³ Apachimusqayku cartakunapeqa mana astawan waj imakuna kanchu imatachus ñawirisqaykichejmanta, chayrí imatachus entiendesqaykichejmanta. Aswanpis noqa munayman aswan qhepaman tukuyninta sumajta entiendenaykichejta.

¹⁴ Kunan wakillanta entiendenkichej chaypis, tukuyninta entiendespa, Tukuyta Kamachej Jesús kutimunan p'unchaypi noqaykurayku qankuna umata oqharinkichej, imaynatachus noqayku qankunarayku umata oqhariyku, ajinata.

¹⁵ Chayrayku, ajinata entiendesqaykichejta yachaspa, noqa munarqani iskay kutitapuni qankunata waturikoj jamuyta, ajinamanta iskay kutita kusikunaykichejpaj.

¹⁶ Ñawpajta, Macedoniaman rej jina qankunata waturikuyta munarqani. Chaymantataj Macedoniamanta kutimpoj jina ujtawan qankunata waturikuyta munallarqanitaj, jinamanta Judeaman rinaypaj yanapanawaykichejpaj.

¹⁷ Ichá qankuna tapukushankichej imaraykuchus yuyasqayta mana ruwasqaymanta. Qankuna yuyankichejchu mana allinta unanchaspalla parlasqayta? Chayrí yuyankichejchu noqaqa Diosman mana kutirikojkuna jina, ñawpajta arí, arí nishaspa, chay kikinpacha mana, mana nispa nisqayta? Mana jinachu.

¹⁸ Aswanpis Dios yachan qankunaman arí nispaqa, manaña mana nispa ninaykuta.

¹⁹ Noqa, Silvano, Timoteo ima Diospa Churin Jesucristomanta qankunaman willarqayku. Jesucristotaj mana iskaytachu parlan, manachayqa arí nispa, nisqanta junt'allanpuni.

²⁰ Jinapi Cristo Jesusnejta imatachus Dios qonawanchejta nisqanta, arí nispa, nisqanta junt'an. Chayrayku Jesucristonejta Diosta jatunchaspa, noqanchej ninchej: Ajina kachun, nispa.

²¹ Diosmin noqaykuta, qankunatawan Cristoman ujchaspa, sinch'ita sayachiwanchej. Chantá, pay ajllakuwarqanchej paypata kananchejpaj.

²² Jinallatataj Santo Espirituta sonqonchejman kachamuwarqanchej, nisqanta junt'ananmanta seña kananpaj.

²³ Dios kayta allinta yachan: Manaraj Corintoman jamorqanichu, imaraykuchus mana munarqanichu qankunata sinch'ita k'amiykuyta.

²⁴ Chayta nispaqa, mana munashaykuchu qankuna munasqaykuman jina Diosta qhatikunaykichejta. Manachayqa qankunata yanapayta munayku, ajinamanta qankuna kusisqa kanaykichejpaj, imaraykuchus Cristopi atinikusqaykichejrayku sinch'ita sayashankichejña.