1 Tesalonicenses 5 - DIOSPA QHELQACHISQ

¹ Wawqe panakuna, Tukuyta Kamachej Jesús imaynatachus, chantá mayk'ajchus kutimunanmanta qhelqaspa ninay mana chaykama necesariochu.

² Qankuna allinta yachankichej Tukuyta Kamachej Jesuspa kutimunan p'unchay kaymanta jinalla chayamunanta, imaynatachus suwaqa mana yuyasqallamanta tutan jamun, ajinata.

³ Maypachachus runakuna nishanqanku: Tukuy imapis allillan, ni imamanta llakikuna kanchu, nispa chaypacha, ujllata paykuna tukuchisqa kanqanku, imaynatachus onqoj warmita wawanta paqarichikunanpaj nanaynin oqharin, ajinata. Chaypachataj paykuna mana ayqeyta atenqankuchu.

⁴ Qankunarí wawqe panakuna, manaña laqhapi jina mana yachaspa kawsashankichejchu, Tukuyta Kamachej Jesús kutimunan p'unchay suwa jina kaymanta jinalla jap'isunaykichejpaj.

⁵ Manachayqa tukuyniykichej Tukuyta Kamachej Jesuspi atinikusqaykichejrayku sut'i p'unchaypi jina kawsashankichej, manataj laqhayaypichu.

⁶ Chayrayku, noqanchejqa rijch'arisqalla kashanachej, allinta purispa, amataj chay ujkuna jinaqa puñunachu. Aswanpis ch'aki sonqo runa jina yuyayninchejpi kana.

⁷ Pikunachus juchallispa purejkuna, jinallataj machakuspa purejkunapis laqhapipis kawsashankuman jina kashanku.

⁸ Noqanchej sut'i p'unchaypi kawsashajkunarí, ch'aki sonqo runa jina yuyayninchejpi kana. Diospi atinikuywan, munakuywan ima fierro pecherawan jina p'achallikuna kachun. Chantá qhespichisqa kasqanchejta monterata jina churakuna.

⁹ Diosqa mana jasut'isqa kananchejpajchu wajyawarqanchej, aswanpis Tukuyta Kamachej Jesucristonchejnejta qhespichisqa kananchejpaj.

¹⁰ Pay noqanchejrayku wañorqa, noqanchej kawsashaspapis, chayrí wañupuspapis, pay kutimojtin, paywan khuska wiñaypaj kawsananchejpaj.

¹¹ Chayrayku, qankunapura sonqochanakuychej, jinallataj kallpachanakuychej, imaynatachus kunan ruwashankichejña, ajinata.

Pablo Diosta qhatejkunata yuyaychan

¹² Wawqe panakuna, mañarikuyku iglesiata pusarejkunata tukuy respetowan qhawanaykichejta, imajtinchus paykunaqa atisqankuta ruwaspa yachachisunkichej Diosta qhatikojkuna jina kawsanaykichejpaj.

¹³ Qankunataj ruwasqankurayku paykunata maypaj qhawaychej, chantá munakuychej ima. Jinallataj qankunapura allinpi kawsakuychej.

¹⁴ Ajinallatataj wawqe panakuna, mañarikuyku qhellakunata k'aminaykichejta, manchalikunata kallpachanaykichejta, pisi kallpayojkunatapis yanapanaykichejta, tukuywantaj pacienciayoj kanaykichejta.

¹⁵ Ama pipis sajrata ruwajman sajrallatataj kutichichunchu. Aswanpis qankuna ukhupi, jinataj tukuypajpis allin kajta ruwanaykichejpaj atisqaykichejta ruwaychej.

¹⁶ Kusisqallapuni kaychej.

¹⁷ Chantá mana sayk'uspa, Dioswan parlarikullaychejpuni.

¹⁸ Jinallataj tukuy imamanta Diosta pachis nillaychejpuni, imaraykuchus Jesucristoman ujchasqa kasqaykichejrayku Dios chayta munan.

¹⁹ Santo Espíritoj ruwayninta ama jark'aychejchu.

²⁰ Diosmanta sut'inchajkunaj nisqankuta ama pisipaj qhawaychejchu.

²¹ Manachayqa tukuy ima nisqankuta allinta reparaychej, yachanaykichejpaj allinchus manachus kasqanta. Chantá allin kajta jap'ikuychej.

²² Tukuy mana allin kajmantarí karunchakuychej.

²³ Sonqo tiyaykuyta qoj Dios allintapuni qankunata llimphuchachun. Payllataj Tukuyta Kamachej Jesucristo kutimunanpaj tukuy kayniykichejta, espirituykichejta, almaykichejta, chantá ukhuykichejta ima waqaychachun mana k'aminapaj jina kanaykichejpaj.

²⁴ Pichus wajyasojniykichej Diosqa chayta ruwanqa, imaraykuchus pay nisqanta junt'anpuni.

Cartaj tukukuynin

²⁵ Wawqe panakuna, Dioswan parlarikuspaqa, noqaykupajpis mañapuwayku.

²⁶ Chantá tukuy wawqe panakunata tukuy sonqowan napaykuychej.

²⁷ Noqa Tukuyta Kamachej Jesuspa sutinpi kamachiykichej kay cartata Diosta tukuy qhatejkunaman ñawirinaykichejta.

²⁸ Tukuyta Kamachej Jesucristoj qhasilla k'acha yanapaynin qankunawan kachun. Ajina kachun.