1 Tesalonicenses 3 - DIOSPA QHELQACHISQ

¹ Chayrayku, manaña awantayta atispa, noqayku parlarikorqayku Atenas llajtapi sapayku qhepakunaykuta.

² Jinamanta wawqenchej Timoteota qankunaman kachamorqayku. Payqa Diospa kamachin, Cristomanta sumaj willayta willanapi yanapawajniyku ima. Noqaykutaj payta kachamorqayku qankunata kallpachasunaykichejpaj, jinallataj Jesuspi atinikuspa sinch'ita sayayta yanapanasuykichejpaj.

³ Ajinata ruwarqayku qankunamanta ama pipis chay ñak'ariykunarayku iskayrayananpaj, imaraykuchus qankuna yachankichej ñak'arinanchejpaj churasqa kasqanchejta.

⁴ Noqayku qankunallawanraj kashaspa, ñak'ariykunata rikunanchejta ñawpajmantaña willarqayku. Chaytaj ajinapuni karqa.

⁵ Chayrayku, noqapis mana astawan suyayta atispa, Timoteota qankunaman kachamorqani, Jesuspi atinikuspallapunichus purishasqaykichejta yachananpaj. Llakikorqani Kuraj Supay qankunata ichapis pantachisqantaña. Jina kanman chayqa, qankunata yanapanaykupaj ruwasqaykoqa qhasipaj kanman karqa.

⁶ Kunanrí, Timoteo kutimuspa, willawayku qankuna Diospi atinikuspallapuni purishasqaykichejta, jinataj ujkuna ujkuna munakuspa kawsashasqaykichejta ima. Willallawaykutaj qankuna noqaykumanta yuyarikuwasqaykuta, jinallataj rikuyta munawasqaykuta, imaynatachus noqaykupis qankunata rikuyta munarqayku, ajinata.

⁷ Chayrayku, wawqe panakuna, noqayku may jina llakiypi, ñak'ariypitaj kashaspa, sonqoyku qhallallarerqa, maypachachus yacharqayku Diospi atinikuspallapuni kashasqaykichejta, chaypacha.

⁸ Kunanqa sonqo t'ikarishaj kawsashayku qankuna Tukuyta Kamachej Jesuspi sinch'ita atinikuspa sayashasqaykichejta yachaspa.

⁹ Chayrayku qankunamanta, imaynatataj Diosta mana pachis niykumanchuri? Pachis niyku, imajtinchus qankunarayku Diospa ñawpaqenpi may jina jatun kusikuyniyoj kayku.

¹⁰ Tuta p'unchay Dioswan parlarikuspa, may jinata mañakuyku qankunata ujtawan watukoj rinaykuta pay munananta. Ajinamanta imatachus yachachinaykuraj kashan Jesucristopi atinikusqaykichej astawan sinch'i kananpaj, chaykunata qankunaman yachachisqayku.

¹¹ Ajinaqa Tata Diosninchej, jinataj Tukuyta Kamachej Jesucristonchej tukuy imata wakichichunku, qankunata watukoj rinaykupaj.

¹² Noqayku mañarikullaykutaj Tukuyta Kamachej Jesús yanapasunaykichejta qankunapura astawan astawan munakunaykichejpaj, jinataj tukuy runatapis. Noqaykupis ajinatamin qankunata munakullaykutaj.

¹³ Ajinamanta Tukuyta Kamachej Jesús kallpachasonqachej Diospi tukuy sonqo atinikunaykichejpaj. Jinataj maypachachus Tukuyta Kamachej Jesucristo tukuy ajllakusqankunawan kutimonqa chaypacha, qankuna Diospa ñawpaqenpi llimphu mana juchayoj kankichej. Ajina kachun.