1 Tesalonicenses 2 - DIOSPA QHELQACHISQ

Pablo Tesalonicapi iglesiata sayarichin

¹ Wawqe panakuna, yachankichej jina, qankunata watukoj jamusqaykoqa mana qhasipajchu karqa.

² Yachallankichejtaj imaynatachus Filipos llajtapi ñak'arichiwasqaykuta, k'umuykachachiwasqaykuta ima. Chaywanpis manchay churanaku kashajtinpis, Diosniyku kallpachawarqayku, paypa sumaj willayninta qankunaman willanaykupaj.

³ Jesucristomanta qankunaman willaspaqa, mana llullakuspachu parlarqayku. Manachayqa noqayku allin kajta munana sonqowan parlarqayku, mana pitapis q'otiyayta munaspachu.

⁴ Aswanpis Diosqa noqaykuta allinpaj qhawaspa Jesusmanta sumaj willayta willanaykuta kamachiwarqayku, chayraykutaj chayta ruwayku. Mana runamanchu allin rijch'ayta munayku, manachayqa Diosman, pichus sonqoykuta rejsin, chayman.

⁵ Yachankichej jina, noqayku ni jayk'aj pitapis misk'i simiwan llunk'upayarqaykuchu, nitaj qankunamanta qolqeta orqhonaykupaj q'otiyarqaykuchu. Mana jinachu kasqanta Diospis yachallantaj.

⁶ Noqayku manallataj jayk'ajpis pi jatunchanawaykuta mask'arqaykuchu, ni qankuna nitaj wajkunapis. Cristoj kachan kasqaykurayku, qankunawan imapipis yanapachikuyta atiykuman karqa.

⁷ Aswanpis qankuna ukhupi k'acha karqayku, imaynatachus uj mama wawankunata allinta qhawaspa uywan, ajinata.

⁸ Chay jinatapuni qankunata munakusqaykurayku, mana Jesusmanta sumaj willayllatachu qankunaman willarqayku. Manachayqa qankunarayku wañuna kanman karqa chaypis, wañuykuman karqa, noqaykupaj may jina munasqa kasqaykichejrayku.

⁹ Wawqe panakuna, qankuna yuyarikushankichejpuni kawsanaykupaj sayk'uy sayk'uyta imatachus ruwasqaykuta. Diospa sumaj willayninta qankunaman willashaspa, mikhunaykupaj tuta p'unchay llank'aspa karqayku, ama pipis mikhuchinawaykumanta phutikushanaykichejpaj.

¹⁰ Qankuna yachankichej, Diospis yachallantaj, imaynatachus qankuna ukhupi allinta purisqaykuta, cheqanta ruwasqaykuta, chantá mana imamantapis k'aminapaj jina kasqaykuta ima.

¹¹ Yachallankichejtaj qankunata kallpachasqaykuta, sonqochasqaykuta ima, imaynatachus uj tata wawankunata uywaspa ruwan, ajinata.

¹² Jinallataj mayta qankunata nerqayku Diospa wawankuna jina purinaykichejta, imaraykuchus paymin wajyasorqachej aswan qhepaman kamachiyninpi, chantá jatun kayninpa lliphipiyninpi ima kanaykichejpaj.

¹³ Chayrayku noqaykupis mana sayk'uspa Diosta pachis nillaykupuni, imaraykuchus Diospa willayninta qankunaman willajtiyku, tukuy sonqo jap'ikorqankichej, mana runaj parlasqanta jinachu, manachayqa Diospa nisqanta jina. Chayqa Diospa nisqanpuni, kunantaj qankuna Jesuspi atinikojkunapi imachus ruwananta ruwashan.

¹⁴ Wawqe panakuna, Judea jap'iypi Diospa iglesianmanta kajkunata kikin llajta masillankutaj ñak'aricherqanku. Ajinallatataj qankunatapis kikin llajta masiykichejkunallataj qhatiykachaspa ñak'arichisorqachej.

¹⁵ Judiokunamanta wakinkuna Tukuyta Kamachej Jesusta wañuchisqanku, jinallatataj Diosmanta sut'inchajkunatapis. Noqaykutapis qhatiykachaspa, ñak'arichillawarqaykutaj. Paykuna mana Diospa munasqanman jinachu ruwanku, jinallataj tukuy runaj contranpi kashanku.

¹⁶ Ajinata paykuna jark'awayku Jesucristomanta sumaj willayta ama mana judiokunaman willanaykupaj, chaynejta paykunapis qhespichisqa kanankupaj. Ajinata ruwaspa, judiokunaqa juchallisqankuman astawan juchata yapakushallankupuni. Chayrayku Diospa k'araj phiñakuynin patankupiña kashan.

Pablo paykunata watukuyta munan

¹⁷ Munasqa wawqe panakuna, qankunamanta mana unaytachu karunchakorqayku chaypis, sonqoykupi mana qankunamanta qonqaporqaykuchu. Chayrayku watukoj jamunaykupaj atisqaykuta ruwarqayku, imajtinchus uyaykichejta rikuyta anchatataj munarqayku.

¹⁸ Maytapuni qankunata ujtawan watukuyta munarqayku, noqataj aswantaraj kutin kutinta jamuyta munarqani. Supay Satanasrí jark'awarqayku.

¹⁹ Noqayku qankunata anchatataj rikuyta munarqayku, imaraykuchus Tukuyta Kamachej Jesusninchej kutimuspa, cuentata mañawasqayku. Chaypachataj noqayku umata oqharisqayku, chantá kusikusqayku ima qankunata yanapanaykupaj imatachus ruwasqaykumanta. Qankunamin t'inkayku kankichej.

²⁰ Arí, qankunarayku umata oqharisqayku, jinataj kusikusqayku ima.