1 Tesalonicenses 1 - DIOSPA QHELQACHISQ

Pablo napaykun

¹ Noqa Pablo, Silvanowan, Timoteowan ima Tesalónica llajtapi kaj iglesiaman kay cartata qhelqaspa apachimuyku. Qankunaqa Tata Diosman, jinataj Tukuyta Kamachej Jesucristoman ima ujchasqa kankichej. Chayrayku Diospa qhasilla k'acha yanapaynin, sonqo tiyaykuynin ima qankunawan kachun.

Pabloqa Diosta pachis nin

² Dioswan parlarikuspa, noqayku tukuyniykichejmanta pachis niykupuni, jinataj qankunamanta yuyarikuykupuni.

³ Tata Diosninchejwan parlarikuspa, qankunamanta yuyarikuykupuni Diospi tukuy sonqo atinikuspa ruwasqaykichejmanta, munakuspa wajkunata sinch'ita yanapasqaykichejmanta ima. Chantá yuyarikullaykutaj Tukuyta Kamachej Jesucristo ñak'ariykunapi yanapanasuykichejta pacienciawan suyasqaykichejmanta.

⁴ Diospa munakusqan wawqe panakuna, noqayku yachayku paypata kanaykichejpaj ajllakusqan kasqaykichejta.

⁵ Maypachachus Jesusmanta sumaj willayta qankunaman willarqayku chaypacha, mana parlaspallachu willarqayku. Manachayqa Diospa atiynin noqaykuwan kasharqa, jinataj Santo Espíritu noqaykunejta yachayta qosorqachej willasqayku cheqanpuni kasqanmanta. Qankuna yachallankichejtaj noqayku qankunawan kashaspa, imaynatachus allinniykichejta mask'aspa purisqaykuta.

⁶ Qankunataj noqaykumanta, chantá Tukuyta Kamachej Jesusmanta imaynatachus allinta kawsanata yachaqakorqankichej. Sinch'i ñak'ariypi kashaspapis, Santo Espíritu kusikuyta qosqanwan Diospa willachisqanta jap'ikorqankichej.

⁷ Chay jinamanta Macedoniapi, Ajayapi ima Jesusta tukuy qhatejkunaman rikucherqankichej paykunapis imaynachus purinanku kasqanta.

⁸ Qankunanejta Tukuyta Kamachej Jesuspa simi nisqan mana Macedoniallapichu, nitaj Ajayallapichu willasqa karqa, manachayqa tukuynejpi. Chay cheqanejpi tiyakojkunataj qankuna may jinatachus Diospi atinikusqaykichejmanta parlawayku. Chayrayku noqaykupajqa manaña chaymanta parlanayku kanchu.

⁹ Paykuna parlanku noqayku llajtaykichejman chayamojtiyku, imaynatachus wajyarikuwasqaykumanta. Jinallataj parlanku qankuna imaynatachus lantikunata yupaychayta saqespa, kawsashaj cheqa kaj Diosman kutirikusqaykichejta, payllataña kasunaykichejpaj.

¹⁰ Paykuna parlallankutaj qankuna imaynatachus janaj pachamanta Diospa Churin kutimunanta suyashasqaykichejta. Payta Diosqa wañusqamanta kawsarichimorqa, payllataj jamoj k'araj phiñakuymanta qhespichiwanchej.