1 Samuel 8 - DIOSPA QHELQACHISQ

Israelitakuna kuraj kamachejniyoj kayta munanku

¹ Samuelqa ñapis machuña kasqanrayku, israelitakunata kamachinankupaj churinkunata churarqa.

² Kuraj kajpata sutin karqa Joel, sullk'ajtataj Abías. Paykunataj Bersebapi juezkuna jina kamacherqanku.

³ Chaywanpis Samuelpa churinkunaqa mana tatanku jinachu imatapis allinta ruwarqanku. Manachayqa qolqeta munapayanawan atipachikuspa, lluk'ita jap'ikorqanku, nitaj justiciata ruwarqankuchu.

⁴ Chayrayku Israel suyumanta kurajkuna tantaykukuspa, Ramá llajtaman Samuelwan parlaj rerqanku.

⁵ Chantá nerqanku: Qanqa allin machuña kanki, churiykikunataj mana qan jina allintachu ruwanku. Chayrayku waj suyukuna jina kuraj kamachejniyoj kayta munayku. Uj kuraj kamachejta kamachinawaykupaj churapuwayku, nispa.

⁶ Israelitakuna kuraj kamachejta mañasqankoqa Samuelman mana allinchu rijch'arqa. Chayrayku Tata Dioswan parlarikuspa, payta taporqa.

⁷ Tata Diostajrí kay jinata kuticherqa: Israelitakuna imatachus mañakusqankuta uyarillay. Manamin qantachu qhesachashasunku, manachayqa noqatamin, ama paykunata kamachinaypaj.

⁸ Egiptomanta paykunata orqhomusqaymantapacha waj dioskunata yupaychaspa wasanchawanku. Ajinallatataj qantapis noqata jina ruwashallasunkutaj.

⁹ Ajinaqa kasullay imatachus mañakusqankuta. Chaywanpis sut'inta niy, kuraj kamachej paykunata kamachispa imatachus ruwananta, nispa.

¹⁰ Chantá Samuelqa kuraj kamachejta mañakoj israelitakunaman Tata Dios imatachus kutichisqanta willarqa.

¹¹ Nerqataj: Munasqaykichej kuraj kamachejqa kay jinata ruwasonqachej: Churiykichejta soldadonkuna kanankupaj wajyachenqa: Maqanaku carretakunaman churananpaj, caballokunapi purinankupaj, chantá ñawpaqenta rinankupaj.

¹² Wakintaqa 1.000 soldadokunata kamachinankupaj, wakintataj phishqa chunkata kamachinankupaj churanqa. Wakintaqa jallp'anta llank'anankupaj churanqa. Chantá chajraj poqosqanta oqharinankupaj, jinallataj armakunata ruwanankupaj, carretankunapajpis tukuy imata ruwanankupaj churanqa.

¹³ Ususiykichejkunatapis wajyallanqataj, wakintaqa sumaj q'apashaj jawinata ruwanankupaj, wayk'unankupaj, t'antata ruwanankupaj ima.

¹⁴ Jinallataj sumaj jallp'aykichejta jap'ikaponqa, sumaj uva huertaykichejta, chantá olivo sach'aykichejtapis. Chaykunatataj paypa kamachinkunaman qonqa.

¹⁵ Payqa chajraykichej poqosqanmanta, jinataj uva sach'aykichej poqosqanmantapis chunkamanta ujta qochikusonqachej, payta yanapajkunaman jaywananpaj.

¹⁶ Ajinallatataj qhechusonqachej sumachaj kamachiykichejkunata. Chantá qhechullasonqachejtaj aswan sumaj kaj bueyniykichejta, burroykichejtapis pay llank'achinanpaj.

¹⁷ Ajinallatataj uywaykichejmantapis chunkamanta ujta jap'ikaponqa. Qankunantin paypa wata runan kankichej.

¹⁸ Chaypacha sichus kuraj kamachejniyoj kayta munasqaykichejmanta sonqoykichejta nanachikuspa Tata Diosman qhaparikunkichej chayqa, payqa manapuni uyarisonqachejchu, nispa.

¹⁹ Chay tukuywanpis israelitakunaqa manapuni Samuelpa nisqanta kasorqankuchu, aswanpis kuticherqanku: Imapis kachun, kuraj kamachejniyoj kayta munaykupuni.

²⁰ Noqaykupis waj suyukuna jina kuraj kamachejniyoj kasqayku. Payqa noqaykuta kamachiwasqayku, noqaykuwan khuskataj maqanakuman renqa, nispa.

²¹ Samuelqa israelitakunaj nisqankuta uyarispa, Tata Diosman willarqa.

²² Tata Diostaj kuticherqa: Mañasqankuta kasullay, kuraj kamachejta churapuy, nispa. Chantá Samuelqa israelitakunata nerqa: Nisqaykichejman jina kachun, nispa. Chantá paykunata llajtankuman kachaporqa.