1 Samuel 7 - DIOSPA QHELQACHISQ

¹ Chaypacha Quiriat Yearín llajtapi tiyakojkuna rispa, Tata Diospa arcanta apakamporqanku. Chantá moqo patapi Abinadabpa wasinman apaykorqanku, churin Eleazartataj Tata Diospa arcanta qhawananpaj churarqanku.

Samuelqa israelitakunata kamachin

² Quiriat Yearín llajtapi Tata Diospa arcanta saqesqankoqa iskay chunka wata jinaña karqa. Chaypachata tukuy israelitakuna waqaspa tukuy sonqo Diosta mask'arqanku.

³ Chayrayku Samuelqa tukuynin israelitakunata nerqa: Sichus qankuna tukuy sonqowan Tata Diosman kutirikunkichej chayqa, waj dioskunata, chantá Astarotpa lantintapis yupaychanata saqeychej. Chantá tukuy sonqomanta Tata Diosllataña yupaychaychej. Chaymantaraj payqa filisteokunaj makinkumanta kacharichisonqachej, nispa.

⁴ Chantá israelitakunaqa Baalpa lantinkunata, jinataj Astarotpa lantinkunata wijch'uspa, Tata Diosllataña yupaycharqanku.

⁵ Chantá Samuel kamacherqa: Tukuy Israel ayllu, Mispá llajtapi tantakuychej, noqataj Tata Diosmanta qankunarayku mañapusqaykichej, nispa.

⁶ Israelitakunataj Mispá llajtapi tantakorqanku, chaypitaj yakuta pujyumanta orqhospa, Tata Diosman jaywaspa jich'arqanku. Chay p'unchay ayunarqanku, tukuypa uyarinantataj nerqanku: Tata Diospa contranta juchallikuyku, nispa. Israelitakunaqa Mispá llajtapi Samuelta juezninkupaj rejsikaporqanku.

⁷ Israelitakuna Mispá llajtapi tantasqa kashasqankuta yachaspa, filisteokunaj kurajninkukuna israelitakunaj contrankupi maqanakunankupaj purirerqanku. Israelitakunataj chayta yachaspa, mayta manchachikorqanku.

⁸ Chantá Samuelta nerqanku: Tata Diosmanta noqaykupaj mañapullawaykupuni ari, filisteokunaj makinkumanta kacharichinawaykupaj, nispa.

⁹ Chantá Samuelqa ñuñoj corderitota jap'ispa ñak'aytawan, tukuyninta Tata Diospaj ruphacherqa. Chaymantataj Tata Dios yanapananta mañaporqa, Tata Diostaj mañakusqanta uyarerqa.

¹⁰ Samuel ñak'asqan corderitota Tata Diospaj q'olachishajtin, filisteokunaqa israelitakunawan maqanakunankupaj chayamorqankupacha. Jinallapi Tata Diosqa sinch'i qhon qhonkunata filisteokunaj patankuman kachaykamuspa, paykunata mayta mancharicherqa. Jinamanta paykunaqa israelitakunawan atipachikorqanku.

¹¹ Chantá israelitakunaqa usqhayllata Mispamanta llojsiytawan, filisteokunata atipaykuspa, Bet Car llajtamanta aswan urakama qhatiykorqanku.

¹² Chaymanta Samuelqa uj jatun rumita oqharispa, Mispá llajtawan Sen llajtawan tinkuypi churarqa. Chantá chay cheqata “Ebenezer”, nispa suticharqa. Chay niyta munan: “Kaykama Tata Dios yanapawarqanchej”, nispa.

¹³ Ajinata filisteokunaqa atipaykuchikorqanku, manañataj ujtawan israelitakunaj jap'iyninkuman yaykumorqankuchu. Samuel kawsanankama Tata Diosqa filisteokunaj contrankupipuni sayaykorqa.

¹⁴ Filisteokunaqa israelitakunamanta qhechusqanku llajtakunata kutichiporqanku Ecrón llajtamanta Gat llajtakama. Jinamanta israelitakunaqa filisteokunaj makinmanta jallp'ankuta qhechukaporqanku. Chantá israelitakunawan amorreokunawanqa allinta kawsakorqanku.

¹⁵ Samuelqa wañupunankama israelitakunata juez jina kamacherqa.

¹⁶ Sapa watataj Betelninta, Gilgalninta, jinataj Mispanejta rispa muyurimoj, israelitakuna ukhupi ch'ajwata ch'inyachispa.

¹⁷ Chaymantataj Ramá llajtaman kutimpoj, chaypi wasin kasqanrayku. Chaymantapachataj israelitakunata juez jina kamacherqa. Chayllapitaj Tata Diospaj uj altarta ruwaporqa.