1 Samuel 5 - DIOSPA QHELQACHISQ

Diospa arcan filisteokunaj makinpi

¹ Filisteokunaqa Diospa arcanta qhechuspa, Ebenezermanta Asdodman aparqanku.

² Chantá paykunaqa Diospa arcanta diosninku Dagonpa yupaychana wasinman aparqanku, chay diosninkoj ladonmantaj churarqanku.

³ Q'ayantin paqarintajrí Asdodpi tiyakojkuna chayamuspa, rikorqanku diosninku Dagonta pampaman k'umpusqata Tata Diospa arcanpa ñawpaqenpi. Chantá Dagonta oqharispa, maypichus kananman churaykapullarqankutaj.

⁴ Jinataj q'ayantin paqarin Asdod llajtayojkuna jamuspa, Dagonta kikillantataj rikorqanku, Tata Diospa arcanpa ñawpaqenpi pampapi k'umpusqata. Punku yaykuypi uman, chantá iskaynin makinpis p'akisqata rikorqanku, ukhullanña qhepakusqa.

⁵ Chayrayku kunankama Dagonpa sacerdotenkuna chantá yupaychaj rejkuna Dagonta Asdod yupaychana wasi punku urapi k'aspinman mana sarunkuchu.

⁶ Chaymanta qhepaman Tata Diosqa Asdodpi tiyakojkunata, jinataj muyuyninpi tiyakojkunatawan ch'upu onqoywan sinch'ita ñak'aricherqa.

⁷ Asdodpi tiyakojkuna chay tukuy imata rikuspa, nerqanku: Israelpa Diosninpa arcanqa mana noqanchej ukhupi kananchu, imaraykuchus noqanchejta, jinataj diosninchej Dagontapis sinch'ita jasut'ishawanchej, nispa.

⁸ Chayrayku filisteokunamanta tukuy kurajkunata wajyacherqanku, chantataj taporqanku: Imanasunchejtaj Israelpa Diosninpa arcanwanri? nispa. Kurajkunataj kuticherqanku: Gat llajtaman apaychej, nispa. Filisteokunataj chayman aparqanku.

⁹ Chayman apasqankutawantajrí Tata Diosqa Gat llajtapi tukuy tiyakojkunata maytapuni mancharicherqa. Jatunta, juch'uyta, tukuytapuni ch'upu onqoywan ñak'aricherqa.

¹⁰ Chantá filisteokunaqa Diospa arcanta Ecrón llajtamanñataj aparqanku. Arcata chay llajtaman chayachejtinkukama, Ecronpi tiyakojkuna qhaparerqanku: Israelpa Diosninpa arcanta apamuwanchej tukuyninchejta wañurachinawanchejpaj, nispa.

¹¹ Ecrón llajtayojkunaqa tukuyninku maytapuni mancharikorqanku, Dios paykunata sinch'ita jasut'isqanrayku. Chayrayku filisteokunaj kurajninkukunata wajyachimuspa, nerqanku: Israelitakunaj Diosninkoj arcanta kaymanta apakapuychej. Kutichipuychejtaj maymantachus apamorqankichej, chayman, ama tukuyninchejta wañuchinawanchejpaj, nispa.

¹² Mana wañojkunaqa ch'upu onqoywan ñak'arichisqa kasharqanku. Nanaywan qhaparisqankutaj janajkama chayarqa.