1 Samuel 4 - DIOSPA QHELQACHISQ

¹ Chantá Samuelqa Tata Diospa tukuy parlasqanta israelitakunaman sut'inchaj. Uj kuti filisteokuna israelitakunawan maqanakunankupaj tantakorqanku. Chayrayku israelitakunaqa filisteokunawan maqanakoj llojserqanku, Ebenezer qayllapitaj jaraykukorqanku. Filisteokunataj Afec cheqapi jarakorqanku.

Diospa arcanta filisteokuna apakapunku

² Filisteokunaqa israelitakunawan maqanakunankupaj wakichikuspa, israelitakunata atipaykorqanku, chaypitaj 4.000 soldadokunata wañucherqanku.

³ Chantá israelita soldadokuna jarankuman kutipojtinku, kurajkuna tapunakorqanku: Imaraykutaj Tata Dios filisteokunawan atipaykuchiwanchejri? Silomanta Tata Diospa arcanta apamunachej, noqanchejwan kaspa awqanchejkunamanta jark'akunawanchejpaj, nispa.

⁴ Jinaspa, israelitakunaqa uj t'aqa soldadokunata Silo llajtaman kacharqanku, querubín sutiyoj angelkunaj chawpinpi tiyakoj Tukuy Atiyniyoj Tata Diospa arcanta apamunankupaj. Chantá Elí sacerdotej churinkuna Jofní, chantá Finespis Diospa arcanwan khuska rerqanku.

⁵ Tata Diospa arcanta jaraman chayachimojtinkutaj, tukuy israelitakuna kusiywan sinch'ita qhaparerqanku. Sinch'ita qhaparisqankoqa jallp'ata kharkatiticherqa.

⁶ Israelitakunaj sinch'ita qhaparisqankuta uyarispa, filisteokuna tapukorqanku: Imaraykutaj hebreokunaj jarankupi sinch'i ch'ajwa tiyanri? nispa. Chantá israelitakuna Tata Diospa arcanta apamusqankuta yacharqanku.

⁷ Filisteokunaqa mancharikuspa, nerqanku: Dios jarankuman chayamun. Ay, noqanchejqa imapichus parasunpis. Manamin ujtapis ajina pasawarqanchejchu.

⁸ Ay, noqanchejmanta imachus kanqapis. Pitaj Atiyniyoj Diospa makinman urmananchejmanta jark'awasunmanri? Paymin ch'in pampapi Egipto llajtayojkunata tukuy imaymana jasut'ikunawan tukucherqa.

⁹ Kallpachakuychej ari, filisteo soldadokuna, sinch'itataj maqanakuychej, ama israelitakunaj wata runanku kananchejpaj, imaynatachus paykuna wata runanchej karqanku jinataqa, nispa.

¹⁰ Chantá filisteokunaqa maqanakuspa, israelitakunata atipaykorqanku. Israelitakunarí wasinkuman ayqerqanku. Filisteokunaqa chaypacha may ashkhatapuni wañuracherqanku. Israelitakunamanta 30.000 soldadokuna wañorqanku.

¹¹ Filisteokunataj Diospa arcantapis jap'ispa, apakaporqanku. Jinataj Elíj iskaynin churinkunatapis Jofnita, Finesta ima wañuchillarqankutaj.

¹² Chaypacha Benjamín jatun ayllumanta uj soldado maqanakumanta ayqerqa. Usqhayta rispataj, Silo llajtaman chayarqa, p'achan llik'irasqa, umanman jallp'a qhalliykusqa.

¹³ Chay runa chayananpaj Eliqa punku qayllapi, ñan qhawarisqa tiyasharqa, Diospa arcanmanta may llakisqa. Jinapi ayqemoj runaqa llajtaman yaykuspa, tukuyman willarqa. Chay llajtapi tiyakojkunataj imachus pasasqanmanta yachaspa, qhaparerqanku.

¹⁴ Eliqa qhaparejta uyarispa, tapurerqa: Imaraykutaj runa ch'ajwashankuri? nispa. Chay runataj usqhayllata Eliman willaj rerqa.

¹⁵ Eliqa jisq'on chunka pusajniyoj watayojña karqa, ñawinpis chharpuyapusqaña. Manaña ni imata rikojñachu.

¹⁶ Chantá chay willaj runa nerqa: Kunallan maqanakumanta ayqemuni, nispa. Chantá Elí taporqa: Imataj tiyan, wawáy? nispa.

¹⁷ Paytaj kuticherqa: Israelitakunaqa filisteokunamanta ayqerqanku. Jinallataj may chhika soldadokuna wañurachisqa kanku, chayllapitaj Jofní, chantá Finespis wañunku. Diospa arcantapis filisteokuna jap'ispa, apakapunku, nispa.

¹⁸ Chay willaj runa Diospa arcanmanta parlajtinkama, Eliqa tiyasharqa, chaymanta wasaman choqakorqa. Unayniyoj chantá wira runa kasqanraykutaj, kunkanta p'akikuspa wañorqa. Payqa tawa chunka watata israelitakunata kamachisqa.

¹⁹ Chaypacha Finespa warmin, Elíj ñojch'anqa onqokunanpaj jinaña kasharqa. Filisteokuna Diospa arcanta jap'isqankuta, chantá suegron, qosanpis wañupusqankuta yachajtinkama, wijsan nanayta qallarerqa. Mayta nanaywan q'ewiykachakuspataj, wawanta paqarichikorqa.

²⁰ Yanapajkuna warmikunarí payta wañupunayajta rikuspa, nerqanku: Ama manchachikuychu, uj qhari wawata paqarichikunki, nispa. Paytajrí mana imatapis kuticherqachu, nitaj kasuta ruwarqachu.

^21-22 Wawatataj Icabod sutiwan suticharqa. Chay suti niyta munan: Israelitakuna Diospa arcanta qhechuchikunku, Tata Dios saqerpariwanchej, nispa. Chayta nerqa israelitakuna Diospa arcanta qhechuchikusqankurayku, suegronpis, jinataj qosanpis wañusqankurayku.