1 Samuel 3 - DIOSPA QHELQACHISQ

Tata Diosqa Samuelta wajyan

¹ Waynuchu Samuelqa Elí sacerdotewan khuska Tata Diospaj llank'ashallarqapuni. Chaypacha Tata Diosqa runakunaman mayninpi jinalla parlaj. Mosqoypi jina rikunapis manaña chhika karqachu.

² Elíj ñawenqa chharpuyaykusqaña, manaña imatapis allinta rikojñachu. Uj ch'isi payqa wasinpi puñusharqa.

³ Samuelpis Dioswan Tinkukuna Toldopi, Diospa arcan kasharqa, chaynejpi puñushallarqataj. Dioswan Tinkukuna Toldopi k'anchaj lampararí manaraj wañuchisqachu karqa.

⁴ Chantá Tata Diosqa payta wajyarqa: Samuel, nispa. Samueltaj kuticherqa: Kaypi kashani, nispa.

⁵ Chantá Eliman usqhayta rispa, nerqa: Kaypi kashani, imapajtaj wajyawankiri? nispa. Elitajrí nerqa: Mana noqaqa wajyarqaykichu. Rispa, puñukampullay, nispa. Samueltaj puñukamporqa.

⁶ Chantá Tata Diosqa ujtawan wajyallarqataj: Samuel, nispa. Samueltaj jatarikuspa, Elí kasharqa, chayman rerqa, nerqataj: Kaypi kashani, imapajtaj wajyawankiri? nispa. Elitaj kuticherqa: Mana noqaqa wajyaykichu, wawáy. Kutispa, puñukampullay, nispa.

⁷ Chaypacha Samuelqa manaraj Tata Diosta rejserqachu, imaraykuchus payman manaraj parlapayasqachu.

⁸ Tata Dios Samuelta kinsa kutita wajyajtin, uyariytawan Eliman rillarqataj: Kaypi kashani, imapajtaj wajyawankiri? nispa. Elitajrí, chaypacha repararqa Samuelta Tata Dios wajyashasqanta.

⁹ Chayrayku nerqa: Riy, puñukampullaytaj. Ujtawan wajyamusojtenqa, ninki: Tata Diosníy uyarishayki. Parlallaway, nispa. Chantá Samuelqa ripuspa, puñukampullarqataj.

¹⁰ Chantá mana unayninmanchu Tata Diosqa paynejman qayllaspa, ñawpaj kutipi jina wajyallarqataj: Samuel, Samuel, nispa. Samueltaj kuticherqa: Parlallay, noqa kamachiykeqa uyarishayki, nispa.

¹¹ Chantá Tata Diosqa payta nerqa: Israel suyupi uj manchay t'ukunata ruwasaj. Tukuy chayta uyarejkunaj ninrinku nananqa.

¹² Chaypacha noqaqa Elíj ayllunpa contranta tukuy nisqayta junt'asaj.

¹³ Willaniña tukuy ayllunmanta kajkuna wiñaypaj juchachasqa kanankuta. Pay yachanña juchanku imachus kasqanta. Churinkunaqa millayta ruwaspa phiñachiwarqanku, paytaj mana paykunata k'amerqachu.

¹⁴ Chayrayku Elíj ayllunpa contranpi tiluspa, nini: Juchankoqa mana jayk'ajpis pampachasqachu kanqa, ni uywa ñak'asqa jaywanawan, ni ofrendawanpis, nispa.

¹⁵ Chantá Samuelqa sut'iyanankama puñukaporqa, sayarispataj, Dioswan Tinkukuna Toldonpa punkunta kicharerqa. Samuelqa mosqoypi jina imatachus rikusqanta Eliman willayta manchachikorqa.

¹⁶ Elitajrí Samuelta wajyaspa, nerqa: Samuel, wawáy, nispa. Samueltaj kuticherqa: Kaypi kashani, nispa.

¹⁷ Elitaj taporqa: Tata Diosqa imatataj nisorqari? Mana uj chhikanta pakarispa willariway. Sichus Tata Dios nisusqanmanta imatapis pakawanki chayqa, Dios sinch'ita ñak'arichisuchun, nispa.

¹⁸ Chantá Samuelqa mana uj chhikanta pakarispa, tukuyninta willarqa. Elitaj nerqa: Payqa Tata Diosmin. Imatachus munasqanta ruwachun, nispa.

¹⁹ Samuelqa wiñarqa, Tata Diostaj payta yanaparqa, tukuy nisqanta junt'aspa.

²⁰ Tukuynin israelitakunataj Dan jatun aylloj jap'iyninmantapacha Berseba llajtakama Samuelqa cheqapuni Tata Diospa willajnin kasqanmanta rejserqanku.

²¹ Tata Diostaj Silo llajtapi Samuelman rikhurillajpuni, imaraykuchus chaypi Diosqa Samuelman imatachus niyta munasqanta sut'inchallajpuni.