1 Samuel 28 - DIOSPA QHELQACHISQ

¹ Chaypachallataj filisteokunaqa israelitakunawan maqanakunankupaj soldadokunata tantaykorqanku. Chantá Aquisqa Davidta nerqa: Yachanki jina, qanwan, runaykikunawan ima noqawan khuska maqanakoj llojsinaykichej tiyan, nispa.

² Davidtaj kuticherqa: Imarayku mana. Kuraj kamachejníy, kunan rikunki noqa imapajchus sumaj kasqayta, nispa. Chantá Aquis nerqa: Jina kajtenqa, kawsanaykama noqata qhawaj soldadoy kanaykipaj churasqayki, nispa.

Saúl aysiri warmita tapukamun

³ Samuelqa ña wañupusqaña, tukuy israelitakunataj wañupusqanmanta waqasqanku. Chantá Ramá llajtanpi ayanta p'ampamusqanku. Jinallataj Saulqa Israel suyumanta tukuy yatirikunata, aysirikunata ima wijch'usqaña.

⁴ Chay qhepatataj filisteokuna tantakuspa, Sunén chaynejpi jarakorqanku. Saultajrí tukuy israelita soldadonkunata tantaykuspa, Gilboa cheqanejpi jarakorqanku.

⁵ Chaywanpis Saulqa filisteo soldadokunata rikuspa, sinch'ita manchachikorqa, kharkatitisharqataj.

⁶ Chantá Tata Diosta taporqa imatachus ruwananta. Tata Diostajrí mana ni mosqoypi jina, nitaj Urimnejtapis, nillataj Diosmanta sut'inchajkunanejtapis kuticherqachu.

⁷ Chayrayku Saulqa yanapajninkunata nerqa: Mask'aychej ari uj aysiri warmita, payman rispa tapurikamunaypaj, nispa. Yanapajninkunataj nerqanku: Endorpi uj aysiri warmi tiyan, nispa.

⁸ Chantá Saulqa ama rejsinanpaj waj jina p'achata churaykukorqa, iskay runakunatawan pusariykukuspataj, ch'isillan chay warmita watoj rerqa. Chayaspataj, nerqa: Ama jinachu kay, waturipuway chantá chayachimuway, pejpa almantachus chayachimunaykita munasaj, chayta, nispa.

⁹ Chay warmitajrí kuticherqa: Qan allinta yachanki, Saulqa Israel suyumanta yatirikunata, aysirikunatawan wijch'uchisqanta. Imamantaj churashawankiri? Wañuchichiytachu munashawanki? nispa.

¹⁰ Saultaj Tata Diospa sutinrayku tiluspa, nerqa: Tata Diospa sutinrayku tiluyki, nisqayta ruwasqaykirayku mana pipis imanasonqachu, nispa.

¹¹ Chantá aysiri warmi taporqa: Pitataj munanki wajyapunasuytari? nispa. Saultaj kuticherqa: Samuelta wajyaripuway, nispa.

¹² Warmitaj Samuelta rikuytawan, sinch'ita qhaparispa, Saulta nerqa: Imapajtaj q'otiyawankiri? Qanqa Saúl kasqankeqa, nispa.

¹³ Chantá kuraj kamachej nerqa: Ama mancharikuychu. Imatataj rikunkiri? nispa. Chay warmitaj kuticherqa: Uj diosta jina jallp'amanta llojsimushajta rikuni, nispa.

¹⁴ Saultaj taporqa: Imayna rijch'ayniyojtajri? nispa. Warmitaj kuticherqa: Uj machu runaman rijch'akun, ponchowan ponchuykusqa, nispa. Chantá Samuel kasqanta yachaspa, Saúl pampakama k'umuykorqa.

¹⁵ Chantá Samuel nerqa: Imapajtaj kakushajta jamuchiwanki, imapajtaj wajyawankiri? nispa. Saultaj kuticherqa: Sinch'i llakisqa kashani, imaraykuchus filisteokuna junt'aykamushawanku, Diosrí qonqarpariwan. Manaña parlawanchu, ni Diosmanta sut'inchajkunanejta, nitaj mosqoynejtapis. Chayrayku wajyacherqayki imatachus ruwanayta ninawaykipaj, nispa.

¹⁶ Samueltaj kuticherqa: Tata Diosqa saqerparisunkiña, jinataj contraykipiña kashan. Imaraykutaj chaymanta noqata tapuwankiri?

¹⁷ Tata Diosqa imatachus noqanejta nisusqanta junt'anña. Kuraj kamachej kanaykita qhechususpa, kawsaqeyki Davidman qopun.

¹⁸ Tata Dios ajinata ruwasunki, imaraykuchus Tata Diospa kamachisqanta mana kasorqankichu. Payqa sinch'i phiñakuyninpi amalecitakunata tukuchinaykita kamachisorqa. Chayrayku Tata Diosqa kayta ruwashasunki.

¹⁹ Chay jawataj Tata Diosqa qanta, jinataj israelitakunata filisteokunaj makinkuman jaywaykusonqachej. Q'aya qan, jinataj churiykikuna ima noqawan khuska kankichej. Ajinallatataj Tata Diosqa israelitakunata, qantawan khuska filisteokunawan atipaykuchisonqachej, nispa. Ajinata Samuel Saulta nerqa.

²⁰ Samuelpa nisqanta uyarispa, Saulqa sinch'ita mancharikusqanrayku pampaman wijch'ukorqa, yuyaynintaj chinkarqa. Payqa llawch'ipacha kasharqa, uj p'unchayta, uj tutatawan mana mikhusqa kasqanrayku.

²¹ Warmeqa Saulta sinch'i mancharisqata rikuspa, payman qayllaykuspa nerqa: Noqaqa niwasqaykiman jina ruwarqani. Wañunayta mana manchachikuspa kamachiwasqaykita junt'ani.

²² Kunanqa, ama jina kaspa, kasunawaykita munani: Uj chhika mikhunata qorisqayki, tumpata kallpacharikuspa, ripunaykipaj, nispa.

²³ Saulqa mana mikhuyta munarqachu. Chaywanpis chay warmi, jinataj Saulpa yanapajninkuna ima anchatapuni nejtinku, mikhunanta nerqa. Chantá pampamanta sayarispa, puñuna pataman tiyaykorqa.

²⁴ Chaykamataj warmeqa paypata kaj wira torillonta ñak'acherqa, chantá jak'uta puñaspa, mana levadurayoj t'antata ruwarqa.

²⁵ Chantá Saulman, jinataj yanapajninkunaman ima jaywarqa, paykunataj mikhuytawankama, chay ch'isipacha riporqanku.