1 Samuel 26 - DIOSPA QHELQACHISQ

David Saulmanta khuyakuspa mana wañuchinchu

¹ Chaymanta mana unaymanchu Zif llajtapi tiyakojkunaqa Gabaaman rispa, Saulman willaykamorqanku: Davidqa ch'in pampamanta inti llojsimuynejpi, Jaquilá orqopi pakasqa kashan, nispa.

² Chantá Saulqa israelita soldadokunamanta, aswan wapu kajkunamanta 3.000 pusariykukuspa kachaykukorqa, Zif ch'in pampaman Davidta mask'aj.

³ Saultaj Jaquilá orqopi toldonta sayacherqa. Chayqa ch'in pampamanta inti llojsimuynejpi, ñan patapi kashan. Davidtajrí ch'in pampapi kashaspa, reparakorqa Saulqa chaypi payta mask'ashasqanta.

⁴ Chayrayku Davidqa wateqajkunata kacharqa, yachanankupaj cheqatapunichus Saúl chayamusqanta.

⁵ Chantá Davidqa, maypichus Saúl jarasqa kasharqa, chaykama rispa qhawarqa Saulwan, Nerpa churin Abnerwan, maynejpichus puñushasqankuta. Abnerqa Saulpa soldadonkunajta kamachejninku karqa. Saulqa jara chawpipi jina puñusharqa, soldadonkunataj paypa muyuyninpi puñusharqanku.

⁶ Chantá Davidqa, jitita Ajimelecwan, Abisaywan ima parlarqa. Abisayqa Seruyáj churin karqa, Joabpa wawqentaj. Davidtaj nerqa: Pitaj noqawan Saulpa toldonman rinmanri? nispa. Abisaytaj kuticherqa: Noqa riysisqayki, nispa.

⁷ Chay ch'isipacha Davidwan, Abisaywan khuska jaraman rerqanku. Saulrí chay jara chawpipi puñusharqa. Uman chaynejpi lanzan pampaman sat'isqa kasharqa, Abnerwan, soldadonkunawan imataj Saulpa muyuyninpi puñushallarqankutaj.

⁸ Chantá Abisayqa Davidman chhichispa nerqa: Tata Diosqa awqaykita wañuchinaykipaj jaywaykusunki. Kunan kay kikin lanzallanwantaj Saulta t'ojsirpaspa pampatawan tinkurpachisaj. Ujllata mana ñak'arichispa wañurpachisaj, nispa.

⁹ Davidtajrí Abisayman kuticherqa: Ama wañuchiychu. Tata Dios juchachanqapuni pichus paypa ajllakusqan kuraj kamachejta wañuchejtaqa.

¹⁰ Tata Diospa sutinrayku tiluni: Mayk'ajchus wañunantaqa Tata Diosllamin yachan, wañunan tiempo chayamojtin, chayrí maqanakupi wañunanta.

¹¹ Tata Dios jark'awachun paypa ajllasqan kuraj kamachejta wañuchinaymanta. Jinapis uman chaypi kashan, chay lanzata, yaku uypulantawan oqhariy, chantá ripunachej, nispa.

¹² Chantá Davidqa lanzanta, uypulantawan Saulpa sawnanan chaynejmanta oqharispa, iskayninku riporqanku. Mana pipis rikorqachu, nitaj imatapis repararqachu, nillataj pipis rijch'arerqachu, imaraykuchus Tata Dios paykunata sinch'ita puñurpanankuta ruwasqa.

¹³ Chaymanta Davidqa chimpaman rispa, uj orqoman wicharerqa. Saúl kasharqa chaymanta, David kasharqa chaykama karuña karqa.

¹⁴ Chantá Davidqa Abnerman, soldadonkunamanwan sinch'ita qhaparispa, nerqa: Abner, uyariway, nispa. Abnertaj kutichispa, nerqa: Pitaj qan kanki kuraj kamachejta qhaparimunaykipajri? nispa.

¹⁵ Davidtaj kuticherqa: Abner, manachu qanqa israelita soldadokunamanta aswan sumaj soldado kanki? Imaraykutaj wiraqochiykita mana qhawarqankichuri? Uj runa payta wañuchiyta munaspa jaraman yaykuykamorqa.

¹⁶ Ruwasqaykeqa mana walejchu. Tata Diospa sutinrayku tiluykichej: Qankunaqa wañuchisqa kanaykichejpaj jina kankichej, Tata Diospa ajllasqan kuraj kamachejta mana allinta qhawasqaykichejrayku. Kunanqa kuraj kamachejpa lanzanta, sawnanan chaynejpi yaku uypulantawan mask'ay ari, nispa.

¹⁷ Chantá Saúl Davidpa kunkanta rejsiytawankama, nerqa: Qanqa waway Davidsina kankeqa, nispa. Davidtaj kuticherqa: Arí, wiraqochi kamachejníy, noqa kani.

¹⁸ Kuraj kamachejníy, imapajtaj kamachiykita qhatiykachawankiri? Imatataj ruwarqaykiri? Imataj juchayri?

¹⁹ Wiraqochi kamachejníy, ama jina kaspa, kunan parlarikusqayta uyaririway. Tata Dioschus noqaj contraypi kanaykita nisorqa chayqa, Tata Dios qhespichiwachun, uywata ñak'aspa q'olachisqaytataj jap'ikuwachun. Runallamantachus kanman chayrí, Tata Diosqa paykunata sinch'ita ñak'arichichun. Paykunaqa Tata Diospa jallp'anmanta wijch'uwaspa, waj dioskunata yupaychanaman tanqashawanku.

²⁰ Noqaqa mana munaymanchu Tata Diosmanta karupi wañuyta. Imaraykutaj qan Israel suyuta kuraj kamachejqa pikita jina, chayrí orqopi yuthuta jina, wañuchinawaykipaj qhatiykachashawanki? nispa.

²¹ Saultaj kuticherqa: David, wawáy. Noqa juchayoj kani. Uj wampu runa jina ruwaspa, may jatunta pantani. Chayrayku kunanqa kutimpuy. Manaña ima sajratapis ruwasqaykichu, imaraykuchus kunan mana wañuchiwaspa, jatunpaj qhawawasqaykita yachayta qowanki, nispa.

²² Chantá David kuticherqa: Kuraj kamachejníy, kayqa lanzayki, ujnin kaj kamachiyki apakapoj jamuchun.

²³ Tata Diostaj sapa ujman cheqan ruwasqanman jina, ch'uwa sonqoyoj kasqanman jina kutichipuchun. Tata Diosqa qan kuraj kamachejniyta makiyman jaywaykuwarqa chaypis, mana wañuchisuyta munarqanichu, imajtinchus qanqa Tata Diospa ajllakusqan kanki.

²⁴ Imaynatachus kunan noqa kawsayniykita maypaj qhawarqani, ajinallatataj Tata Diosqa noqata maypaj qhawawachun, waqaychawachuntaj tukuy llakiymanta, nispa.

²⁵ Chantá Saúl nerqa: David wawáy, saminchasqa kay. Qanta tukuy ima ruwasqaykipi allinpuni risonqa, nispa. Chaymantataj Saulqa wasinman kutiporqa, Davidtaj maymanchus rinanta ripullarqataj.