1 Samuel 24 - DIOSPA QHELQACHISQ

Davidqa Saulta mana wañuchinchu

¹ 1 (2) Saúl filisteokunata qhatiykusqanmanta kutimushajtin, willarqanku Davidqa Engadí ch'innejpiña kashasqanta.

² 2 (3) Chantá Saulqa tukuy israelitakunamanta 3.000 soldadokunata ajllaspa, Davidta, chantá runankunatawan ima mask'aj kachaykukorqa. K'ita cabraj purinan orqopi mask'amorqa.

³ 3 (4) Purispa, oveja puñuchina kanchaman chayarqanku, chay qayllanejpitaj uj jatun qaqa jusk'u karqa. Chantá Saúl jisp'arikoj chay jusk'uman yaykuykorqa. Chayllapitaj Davidwan runankunawan ima pakakusharqanku.

⁴ 4 (5) Chantá Davidpa runankuna payta nerqanku: Kunan junt'akun: Awqaykita jaywaykusqayki, nispa Tata Dios nisusqanqa. Kunanqa Saulwan ruway imatachus munasqaykita, nispa. Davidtaj sayariytawan, misi chakillamanta qayllaykuspa, Saulpa ponchon jina qhatananmanta uj chhikanta k'uturparerqa.

⁵ 5 (6) Chaywanpis Davidta sonqon juchacharqa Saulpa p'achanta k'utusqanmanta.

⁶ 6 (7) Runankunatataj nerqa: Tata Diosqa amapuni munachunchu kuraj kamachejniypa contranpi oqharikunayta. Payqa Tata Dios ajllaspa churasqanrayku kuraj kamachej kashan, nispa.

⁷ 7 (8) Ajinata Davidqa Saulta ama wañuchinankupaj runankunata jark'arqa. Saultaj chay jusk'umanta llojsimuspa, ñanninta riporqa.

⁸ 8 (9) Chantá Davidqa Saulpa qhepanpacha llojsimuspa, jatunmanta qhaparerqa: Wiraqochíy, nispa. Saúl qhepaman qhawarejtintaj, Davidqa qonqoriykukuspa pampakama k'umuykorqa.

⁹ 9 (10) Chantá nerqa: Wiraqochíy, imaraykutaj kasuta ruwanki: Davidqa qanta mana allinta ruwasuyta munaspa mask'ashasunki, nispa nisqankutari?

¹⁰ 10 (11) Wiraqochíy, qan kikiyki rikunki, Tata Diosqa qanta imaynatachus makiyman churasusqanta. Chay jusk'upi kashajtiyki, noqaqa mana wañuchisuyta munarqanichu, aswanpis khuyarqayki: Kuraj kamachejtaqa mana wañuchiymanchu, imaraykuchus Tata Diospa churasqan, nispa.

¹¹ 11 (12) Qhawariy tatáy, ponchoykimanta uj chhikanta k'utusqayta makiypi jap'ishani. Munaspaqa, qanta wañuchiykiman karqa. Kaywan qanqa umachakuy, wiraqochíy, noqaqa mana ima sajratapis ruwasuyta yuyasqayta, nitaj wasanchasusqaytapis, nillataj contraykipi juchallerqanichu. Chaywanpis qanqa wañuchinawaykipaj mask'awanki.

¹² 12 (13) Qanwan noqawan pichus juchayoj kasqanchejta Tata Dioslla nichun. Imatachus ruwawasqaykimantaqa Tata Dioslla yachachun. Chaywanpis noqaqa mana jayk'ajpis kuraj kamachejniypa contranta makiyta oqharisajchu.

¹³ 13 (14) Ñawpa runakuna niyta yachanku: Sajra kajta ruwanaqa sajra runakunamanta jamun, nispa. Chayrayku noqaqa qanpa contraykipi ni jayk'aj oqharikusajchu.

¹⁴ 14 (15) Israel suyoj kuraj kamachejnin pejpa qhepantataj llojsimorqari? Pitataj qhatiykachashanri? Alqo wañusqatachu, chayrí pikitachu? Chaymin noqa kani.

¹⁵ 15 (16) Chayrayku Tata Dios iskayninchejmanta yachachun. Nichuntaj pichus juchayoj kasqanchejta. Payllataj qanmanta jark'akuwachun, nispa.

¹⁶ 16 (17) David parlayta tukojtin, Saulqa qhaparispa, nerqa: Qanqa waway Davidsina kankeqa, nispa. Chantá Saúl mayta waqarikorqa.

¹⁷ 17 (18) Saúl nillarqataj: Qanqa aswan cheqan runa kanki noqamanta nisqaqa. Sajra kajta ruwashasojtiypis, allin kajwan kutichishawanki.

¹⁸ 18 (19) Kunan yachayta qowanki noqaj allinniyta mask'asqaykita. Tata Dios makiykiman churashawajtinpis, qan mana wañuchiwarqankichu.

¹⁹ 19 (20) Cheqamanta ni pipis kanchu awqanta taripaspaña mana wañuchejqa. Chayrayku Tata Diosqa allin kajwan kutichipusuchun, noqawan kunan imatachus ruwasqaykimanta.

²⁰ 20 (21) Kunantaj sut'ita yachani qan kuraj kamachej kanaykita, qan kuraj kamachej jina kashajtiykitaj, israelitakunata tukuy imapi allillan rinanta.

²¹ 21 (22) Tiluway ari Tata Diospa sutinrayku, qan mana wawaykunata, nitaj allchhiykunatapis wañuchinaykita, nitaj sutiytapis aylluy ukhumanta chinkachinaykita, nispa.

²² 22 (23) Davidtaj tilorqa, chaymantataj Saulqa wasiman kutiporqa. Davidwan, runankunawantaj pakakusharqanku, chay chhankaman ripullarqankutaj.