1 Samuel 22 - DIOSPA QHELQACHISQ

¹ Chantá Davidqa chaymanta ripuspa, Adulán chhanka jusk'uman pakakoj ayqerqa. Wawqenkuna, chantá tukuy ayllunpis chayta yachaspa, paywan ujchakoj rerqanku.

² Paywan tantakullarqankutaj tukuy ñak'arichisqa kajkuna, manu kajkuna, llakiyniyoj kajkunapiwan. Davidtaj paykunaj kamachejninku karqa. Paywan khuska purej runakunaqa 400 jina karqanku.

³ Chaynejmantapacha Davidqa Moab suyupi Mispá llajtaman rispa, Moab suyoj kuraj kamachejninta nerqa: Ama jina kaspa, tataywan, mamaywan ima qankunawan tiyarikuchunku ari, imatachus Tata Dios noqawan ruwananta yachanaykama, nispa.

⁴ Ajinamanta Davidqa tatan mamanta Moab suyupi kuraj kamachejman pusarqa, paykunataj chaypi tiyakorqanku David chhanka jusk'upi kanankama.

⁵ Chaypacha Diosmanta sut'inchaj Gadqa Davidta yuyaycharqa: Chay chhanka jusk'upi amaña qhepakuychu. Puririy, ripuytaj Judá jatun aylloj jap'iyninman, nispa. Davidtaj chaymanta ripuspa, Jaret nisqa monteman chayarqa.

Saulqa Nob llajtapi sacerdotekunata wañuchin

⁶ Chaykama Saulqa Gabaapi kashaspa, uyarerqa Davidwan, runankunawan ima maypichus kashasqankuta. Saulqa lanzata jap'ispa, moqo patapi uj tamarindo sach'a urapi tiyasharqa, muyuyninpitaj kamachinkuna kasharqanku.

⁷ Chantá paykunata nerqa: Benjamín jatun ayllumanta kajkuna, uyariwaychej: Yuyankichejchu Yesejpa churin David, tukuy qankunaman jallp'akunata, uva huertakunatapis qonasuykichejta, jinallataj kamachejkunata, capitankunatapis churanasuykichejta?

⁸ Qankunaqa tukuyniykichej contraypi oqharikunkichej, manataj pipis willawarqankichejchu Yesejpa churinwan wawaywan tratota ruwasqankumanta. Ni mayqenniykichej noqamanta llakikunkichejchu. Nillataj pipis niwanchu Davidta contraypi wawallaytaj churasqanta, wañuchiwayta munaspa wateqanawanpaj, imaynatachus kunan ruwashan, ajinata, nispa.

⁹ Chantá Saulpa kamachinkunamanta kurajninku Edom llajtayoj Doeg nerqa: Noqa Yesejpa churinta rikorqani, Nob llajtaman rispa Ajitobpa churin Ajimelecwan parlashajta.

¹⁰ Ajimelectaj Tata Diosta Davidrayku taporqa. Chantá mikhunata qorqa, qollarqataj filisteo Goliatpa espadantapis, nispa.

¹¹ Chantá Saulqa Ajitobpa churin sacerdote Ajimelecta, tukuy ayllunta, Nob llajtamanta tukuy sacerdotekunatawan wajyacherqa. Tukuyninku jamojtinkutaj,

¹² Saulqa Ajimelecta nerqa: Ajitobpa churin, allinta uyariway, nispa. Ajimelectaj kuticherqa: Wiraqochi kamachejníy, nillaway, munasqaykita ruwanaypaj kaypi kashani, nispa.

¹³ Saultaj taporqa: Imaraykutaj qanwan, chantá Yesejpa churinwan ima contraypi oqharikunaykichejpaj parlarqankichejri? Qanqa t'antata, chantá uj espadatawan payman qosqanki. Davidraykutaj Tata Diosta tapurisqanki, noqaj contraypi oqharikunanpaj, wañuchiwayta munaspa wateqanawanpaj, imaynatachus kunan ruwashan, ajinata, nispa.

¹⁴ Ajimelectajrí kuraj kamachejman kuticherqa: Mayqentaj tukuy yanapajniykikunamanta David jina mana wasanchaj runari? Payqa tolqayki kanpis, chay jawarí soldadokunaj kuraj kamachejninku, kamachinayki wasipitaj manchay respetowan qhawasqari?

¹⁵ Kunallanchu payrayku Diosta tapuriyta yachasqani? Chayqa mana jinachu. Chayrayku wiraqochíy, ama noqa kamachiykita, nitaj aylluytapis qhasimanta juchachaychu, imaraykuchus noqaqa mana imatapis chaymanta yachanichu, nispa.

¹⁶ Saultajrí nerqa: Mana, Ajimélec. Qanqa wañunkipuni, jinataj tukuy aylluykipis wañullanqankutaj, nispa.

¹⁷ Jinapi kuraj kamachejqa muyuyninpi kaj soldadokunata kamacherqa: Tata Diospa sacerdotenkunata wañuchiychej. Paykunapis Davidman kutisqa kashanku, imaraykuchus ayqeshasqanta yachashaspapis, mana willawarqankuchu, nispa. Soldadokunatajrí Tata Diospa sacerdotenkunata mana wañuchiyta munarqankuchu.

¹⁸ Chayrayku kuraj kamachejqa Edom llajtayoj Doegta kamacherqa: Paykunata wañuchiy, nispa. Doegtaj sacerdotekunaj contrankupi sayaykuspa, pusaj chunka phishqayojta wañucherqa. Paykunaqa linomanta ruwasqa unkuyoj kasharqanku.

¹⁹ Jinallataj Doegqa sacerdotekunaj llajtanku Nobman rispa, wañuchillarqataj qharikunata, warmikunata, wawakunata chantá ñuñoj wawakunatapis. Wañuchillarqataj bueykunata, burrokunata, ovejakunata ima.

²⁰ Chaywanpis Ajimelecpa ujnin kaj churin Abiatarlla ayqekorqa, chayarqataj, maypichus David kasharqa, chayman.

²¹ Chantá Abiatarqa Davidman willarqa imaynatachus Saúl Tata Diospa sacerdotenkunata wañuchichisqanta.

²² Davidtaj Abiatarman kuticherqa: Noqa yacharqaniña Edommanta Doegqa Saulman willaykamunanta. Tukuy aylluyki wañusqankumanta noqamin juchayoj kani.

²³ Kunanqa noqawan qhepakuy, amataj manchachikuychu. Pichus wañuchisuyta munajqa noqatapis wañuchiwayta munashallantaj. Noqawanqa mana pipis imanasonqachu, nispa.