1 Samuel 21 - DIOSPA QHELQACHISQ

David Saulmanta ayqekun

¹ 1 (2) Chaymanta Davidqa Nob llajtapi sacerdote Ajimelecpaman rerqa. Payqa mancharisqa Davidwan tinkukoj llojsimuspa, nerqa: Imaraykutaj sapallayki jamunki, nitaj pipis qanwan jamunchuri? nispa.

² 2 (3) Davidtaj kuticherqa: Kuraj kamachejqa uj ruwanayojta kachamuwarqa, niwarqataj imapajchus kachamuwasqanta, jinallataj imatachus kamachiwasqantapis ni pi yachananta. Noqataj runaykunata maynejpichus suyanawankuta niniña.

³ 3 (4) Kunan, imataj mikhunapaj tiyapusunkiri? Qoriway ari phishqa t'antata, chayrí imachus kapususqanta, nispa.

⁴ 4 (5) Sacerdotetaj Davidman kuticherqa: Mikhuna t'antaqa mana kapuwanchu, Diospaj t'aqasqa t'antalla tiyan. Jinatapis qosqayki sichus runaykikuna kay p'unchaykuna mana warmiwan puñuykorqanku chayqa, nispa.

⁵ 5 (6) Chantá David Sacerdoteman kuticherqa: Ama chaymanta llakikuychu. Sapa kuti maqanakoj llojsinaykupajqa warmiykuwan mana puñuykuykuchu. Kay kutipi noqayku mana maqanakojchu llojsimuyku chaypis, runaykunaqa mana warminkuwan puñuykorqankuchu. Chayrayku paykunaqa Diosman qayllanankupaj jina llimphuchasqa kashanku, nispa.

⁶ 6 (7) Ajinaqa sacerdote Tata Diospaj t'aqasqa t'antata Davidman jaywarqa, chay t'antalla chaypi kasqanrayku. Chay p'unchayllaraj altar chaymanta orqhomusqanku waj q'oñi t'antata churanankupaj.

⁷ 7 (8) Chaywanpis Saulpa ujnin kaj kamachin, Doeg sutiyoj, Diosta yupaychana toldopi chaypachallataj kashasqa, chaypi qhepakunan kasqanrayku. Payqa Edom llajtayoj karqa, Saulpa michejninkunatataj kamachej karqa.

⁸ 8 (9) Chantá Davidqa Ajimelecta tapullarqataj: Manachu lanza, chayrí espadallapis tiyapusunkiman? Kuraj kamachejpa kamachisqan usqhayllata kasuna kasqanrayku mana tiempo karqachu espadayta, nitaj armaytapis oqharikamunaypaj, nispa.

⁹ 9 (10) Sacerdotetaj kuticherqa: Elá nisqa vallepi filisteo Goliatta wañuchispa qhechusqayki espadalla kaypi kashan, unku wasapi uj llijllawan mayt'usqa kashan. Munanki chayqa, apakapuyta atinki. Chaylla tiyan, aswan mana kanchu, nispa. Chantá David kuticherqa: Chaymanta aswan sumajqa mana kanmanchu. Chayta qoway ari, nispa.

¹⁰ 10 (11) Chay p'unchaypacha Davidqa Saulmanta ayqespa, riporqa Gat llajtamanta kuraj kamachej Aquispaman.

¹¹ 11 (12) Chantá kuraj kamachej Aquispa kamachinkuna nerqanku: Manachu payqa David, Israel suyoj kuraj kamachejnin? Manachu tususpa paymanta takej kanku: Saulqa waranqa runata wañucherqa, Davidtaj chunka waranqata, nispari?

¹² 12 (13) Davidrí imatachus nisqankuta uyarispa, Gat llajtamanta kuraj kamachej Aquismanta sinch'ita manchachikorqa.

¹³ 13 (14) Chayrayku manapis yuyayninpichu kashajman jina tukorqa. Uma t'ojpisqaman tukuspa, wasi punkukunapi qhelqararqa, llawsantataj sunkhan chaynejta surucherqa.

¹⁴ 14 (15) Chaymanta kuraj kamachej Aquisqa kamachinkunata nerqa: Kay runata mana yuyayninpichu kashajta rikushaspaqa, imapajtaj pusamuwarqankichejri?

¹⁵ 15 (16) Mana yuyayninpi kashaj runakuna ashkha tiyan. Imapajtaj pusamuwankichej, mana yuyayninpi kashaj runa jina, imatapis ruwananpaj? Wasiymanta wijch'uychej, nispa.