1 Samuel 2 - DIOSPA QHELQACHISQ

Anaqa Tata Diosta yupaychan

¹ Chantá Ana Dioswan parlarikuspa, kay jinata nerqa: Tata Diosníy, tukuy sonqoymanta kusikushani, imaraykuchus qanllamin mosoj kallpata qowanki. Chejnikuwajkunaman kutichikuyta atini. Qan yanapawasqaykirayku kusisqa kashani.

² Tata Diosníy, qan jina llimphupuneqa mana pipis kanchu. Qanmanta jawaqa mana waj kanchu. Mana pipis qan jina waqaychajqa kanchu.

³ Ama ni pi runaykachaspa parlachunchu. Amataj pipis chhikata jatunchakuchunchu, imaraykuchus Tata Diosllamin tukuy imata yachaj Diosqa. Paymin yachan runaj ruwasqan allinchus manachus kasqanta.

⁴ Payllamin kallpasapakunaj armankuta p'akiran, mana kallpayojkunatapis kallpachan.

⁵ Ñawpajta ashkha mikhunayojkunaqa kunan uj chhika mikhunarayku vendekunku. Yarqhasqa kajkunataj kunan sumaj mikhusqa kanku. Mana wawayoj kayta atej warmeqa qanchis kutitaña wawata rejsin. Ashkha wawayoj warmirí, kunan manaña wawayojchu.

⁶ Tata Diosmin kawsaytaqa qhechun, payllataj kawsayta qon. Pay wañusqakunatawan khuska churawanchej, payllataj chaymanta kawsarichiwanchej.

⁷ Tata Diosmin wajchayachin, payllataj qhapajyachin. K'umuykuchintaj, umata oqharichintaj.

⁸ Dioslla wajchata pampamanta aysarin. Mañakoj runatapis q'opa wijch'unamanta orqhospa, wiraqochikunawan khuska tiyachin maypaj qhawasqa cheqapi, imaraykuchus jallp'aj tijsinkunamanta Tata Diosllamin dueñoqa. Paymin kay pachata chay patapi sayacherqa.

⁹ Diosqa payta kasojkunaj puriyninkuta qhawan. Mana kasukojkunatajrí llakiywan ñit'isqa wañunku, imaraykuchus mana pipis kallpanraykullaqa atipanqachu.

¹⁰ Tata Diosqa awqankunata phirenqa. Janaj pachamantapacha paykunaj patankuman qhon qhonkunata kachaykamonqa. Tata Dioslla tukuy kay pachata juzganqa. Paypis kuraj kamachejninta kallpachanqa, ajllakusqantataj aswan atiyniyojta ruwanqa, nispa.

¹¹ Chantá Elcanaqa Ramá llajtapi wasinman kutiporqa. Wawatajrí Elí sacerdotej kamachisqanman jina, Tata Diospaj llank'anapi qhepakorqa.

Elí sacerdotej churinkunaj juchallikusqanku

¹² Elíj churinkunaqa millay puriyniyoj runakuna karqanku. Tata Diosta mana kasorqankuchu, nitaj manchachikorqankuchu.

¹³ Paykunaqa israelitakunaj rikunankuta sacerdote jina imachus ruwanankuta mana allintachu ruwaj kanku. Pichus uywata ñak'aspa Diosman jaywashajtin, aycha t'impushajtillanraj, sacerdotej kamachin uj trinche jap'irisqa jamoj.

¹⁴ Payqa mankaman, jinallataj paylamanpis, chantá calderaman trincheta sat'ejpacha. Mashkhatachari trinchewan orqhosqanqa sacerdotepaj karqa. Ajinata Siloman tukuy jamoj israelitakunawan ruwaj kanku.

¹⁵ Ajinallataj manaraj jaywasqa uywaj wiranta altarpi q'olachishajtinku, sacerdotej kamachin jamuspa, uywa ñak'asqata jaywashaj runaman nej: Sacerdotepaj kankarqamunaypaj aychata qoway. Payqa chayasqa aychata mana jap'isonqachu, manachayqa chawatapuni, nispa.

¹⁶ Sichus uywa ñak'asqata jaywaj runa nej: Mana, wirantaraj q'olachisaj, chantá munasqaykita apallanki, nispa chayqa, sacerdotej kamachin kutichej: Mana, kunanpachapuni qonawayki tiyan. Manachus qowanki chayqa, munaypis, amapis qhechusqayki, nispa.

¹⁷ Ajinaqa Elíj churinkunaj juchallikusqankoqa Tata Diospa ñawpaqenpi jatun juchapuni karqa, imaraykuchus Tata Diosman qosqa jaywanata manakajpaj qhawarqanku.

¹⁸ Chaykama Samuelqa linomanta ruwasqa unkuyoj Tata Diospaj llank'aspapuni kasharqa.

¹⁹ Sapa watalla mamanqa tatanwan khuska Diosman uywa ñak'asqata jaywanankupaj riyta yachaj kanku, rej jinataj paypaj ruwapusqan p'achata apapoj.

²⁰ Chaypacha Elí sacerdoteqa Elcanata, jinataj warmintapis kay jinata nispa saminchaj: Tata Dios munachun kay warmipi ashkha wawata rejsinaykita, pay chay wawanta Tata Diosman qopusqanrayku, nispa. Chaymantataj wasinkuman kutipoj kanku.

²¹ Chantá Tata Diosqa Anamanta yuyarikorqa, paytaj wijsallikorqa. Jinamanta Anaqa kinsa qhari wawakunata, iskay warmi wawakunatawan rejserqa. Samueltajrí Tata Diospaj llank'ashaspa wiñashallarqapuni.

²² Eliqa allin unayniyojña karqa, yacharqataj churinkuna israelitakunata imatachus ruwashasqankuta. Paykuna Dioswan Tinkukuna Toldo punkupi yanapakoj warmikunawan puñuykusqankutapis yachallarqataj.

²³ Chayrayku paykunata nerqa: Tukuy runakuna qankuna millayta ruwasqaykichejmanta parlashanku. Imaraykutaj chay jinata ruwankichejri?

²⁴ Wawaykuna, manapuni walejchu Tata Diospa ayllun ukhupi chay jinata qankunamanta parlasqankoqa.

²⁵ Sichus uj runa wajpa contranpi juchallin chayqa, Tata Diosqa payrayku parlayta atin. Tata Diospa contranpi juchallejtinrí, pitaj kutikuspa paypaj mañaponqari? nispa. Chaywanpis paykunaqa tatankoj nisqanta mana kasorqankuchu, imaraykuchus Tata Diosqa wañuchisqa kanankuta nisqaña.

²⁶ Chaykama Samuelqa wiñashallarqapuni, ruwasqantaj Tata Diospaj, runakunapajpis allin karqa.

²⁷ Chaypacha Diosmanta sut'inchaj uj runa Elita watukoj jamorqa, nerqataj: Tata Diosqa kay jinata nisunki: Ñawpa tataykikuna, aylluntin ima Egiptopi faraonpa wata runan kashajtinku, sut'imanta paykunaman rikhurerqani.

²⁸ Chantá Israelpa tukuynin ayllun ukhumanta sacerdoteykuna kanankupaj paykunata ajllakorqani, uywa ñak'asqa jaywanata altarniy patapi q'olachinankupaj, jinataj inciensota q'oshñichinankupaj, chantá unkuta ñawpaqeypi churakunankupaj ima. Chay jawa ñawpa tataykichejkunaman qollarqanitaj, imakunatachus israelitakuna Tata Diospaj apamunku, chaymanta mikhunankupaj.

²⁹ Noqa israelitakunata kamacherqani uywa ñak'asqata jaywanawankuta, jinataj ofrenda apamunawankuta. Imaraykutaj chaykunata manakajpaj qhawarqankichejri? Imaraykutaj churiykikunata noqamanta nisqa aswan jatunpaj qhawarqanki, tukuy Israel aylluypa aswan sumaj ofrenda apamuwasqankuwan paykunata wirayachispari?

³⁰ Chayrayku Israelpa Diosnin Tata Dios nin: Noqa nerqani qanwan, aylluykiwan ima ñawpaqeypi wiñaypaj sacerdoteykuna kanaykichej tiyan, nispa. Kunanrí niykichej: Manapuni jinachu kanqa, manachayqa jatunchawajkunata jatunchallasajtaj, qhesachawajkunatapis p'enqaypi rikhurichisaj. Noqa Tata Diosmin chayta nini.

³¹ Ñawpa tataykejpata chantá qanpata may uyarisqa kanaykita phirinay p'unchay qayllamushanña. Aylluykimantaqa mana mayqenpis machuyanankama kawsanqachu.

³² Israel aylluyta chhika patapi kawsarikunawan yanapasqayta rikuspa, paykunamanta envidiakunki. Aylluykimantarí mana mayqenpis machuyanankama kawsanqachu.

³³ Chaywanpis saqesaj aylluykimanta wakinkunallata altarniy qayllanejpi kashajta, ñawinku waqaywan tukukunankupaj, sonqonkutaj nanaywan. Chantá tukuy mirayniykimanta kajkunapis kallpallankupiraj kashaspa, wañuchisqa kanqanku.

³⁴ Iskaynin churiykikuna Jofniwan, Fineswan ima, paykunata imachus qhatirenqa, chayqa qanpaj uj señal jina kanqa: Iskayninku uj p'unchayllapi wañonqanku.

³⁵ Chaywanpis noqaqa uj sacerdoteta ajllakusaj, paytaj sonqoypa munasqayman jina tukuy imata ruwanqa. Paypa mirayninta mana chinkananta saqesajchu, jinataj ajllakusqay kuraj kamachejta sirvenqa.

³⁶ Aylluykimanta kawsashajraj qhepakojkunarí, ajllakusqay sacerdoteman k'umuykonqanku uj pisi qolqeta, chayrí uj chhikan mikhunata mañarikunankupaj: Mikhunaykupaj sacerdotekuna ukhupi imallatapis ruwarichiwayku ari, nispa.