1 Samuel 19 - DIOSPA QHELQACHISQ

Saulqa Davidta wañuchiyta munan

¹ Chantá Saulqa churin Jonatanta, tukuy yanapajninkunatawan ima kamacherqa Davidta wañuchinankuta. Jonatanrí Davidta mayta munakusqanrayku,

² chayta payman willamorqa: Tatay Saulqa wañuchisuyta munan. Q'ayaqa allinta qhawakuspa purinki. Maynejllapipis sumajta pakakuy.

³ Noqataj tataywan khuska, maynejpichus qan kashanki, chaynejta puriykacharej jamusqayku. Chantá qanmanta paywan parlasaj, imachus kasqantataj qanman willasqayki, nispa.

⁴ Jinataj Jonatanqa Davidmanta allinta Saulman parlaspa, nerqa: Kuraj kamachejníy, kamachiyki Davidtaqa ama ima sajratapis ruwaychu, imaraykuchus payqa mana ima mana allintapis qantaqa ruwasunkichu. Astawanpis tukuy ruwasqanqa allinpuni qanpaj karqa.

⁵ Payqa wañuyta mana manchachikuspa, chay jatunkaray filisteota wañucherqa. Chay jinamanta Tata Diosqa tukuy israelitakuna filisteokunata atipananchejpaj yanapawarqanchej. Chayta rikuspa, mayta kusikorqanki. Chantá, imaraykutaj kunan mana juchayoj Davidta wañuchiyta munashankiri? nispa.

⁶ Chantá Saulqa churin Jonatanpa nisqanta uyarispa, qhaparerqa: Tata Diospa sutinrayku tiluni: Davidta mana wañuchisajchu, nispa.

⁷ Chaypacha Jonatanqa Davidta wajyaspa, imatachus parlasqankuta willarqa. Chaymantataj Saulman payta pusarqa. Ajinamanta ñawpajta jina Davidqa Saulta yanapaspallapuni karqa.

⁸ Ujtawan maqanaku qallarejtin, Davidqa filisteokunaj contrankupi maqanakoj llojserqa, paykunatataj atipaykorqa. Filisteokunaqa maytapuni atipaykuchikuspa, Davidmanta ayqerqanku.

⁹ Chantá Tata Diospa kachamusqan uj millay espíritu Saulman watej jamullarqataj. Saulqa wasinpi tiyasqa kasharqa, makinpi lanza jap'irisqa, Davidtaj arpata tocapusharqa.

¹⁰ Chantá Saulqa ujtawan Davidta lanzawan perqaman sat'iykuyta munarqa, Davidtajrí uj ladoman polqarqa. Lanzataj perqallaman sat'ikorqa. Chay kikin ch'isipachataj Davidqa ayqekorqa.

Micalqa Davidta ayqeyta yanapan

¹¹ Chantá chaypachapacha Saulqa kamachinkunata nerqa, Davidpa wasinman rispa, sumajta wateqanankuta, q'ayantin paqarin payta wañuchinankupaj. Warmin Micaltajrí Davidman willarqa: Manachus kunan ch'isi ayqekunki chayqa, q'ayapaj wañusqa rikhurinki, nispa.

¹² Chantá usqhayllata Micalqa Davidta ventananejta urayk'ucherqa. Jinamanta David ayqerqa.

¹³ Chaymantataj Micalqa Davidpa puñunanman uj lantita churaykorqa, sawnananmantaj cabra millmamanta ruwasqata churaykorqa. Chantá uj qhatanawan qhataykorqa.

¹⁴ Maypachachus Saulpa kamachinkuna Davidta jap'inankupaj wasinman chayarqanku chaypacha, Mical nerqa, Davidqa onqosqa kashasqanta.

¹⁵ Chantá Saulqa runankunata watej Davidta mask'aj kachallarqataj: Onqosqapis kachun, kayman apamuwaychej kunanpacha wañuchinaypaj, nispa.

¹⁶ Saulpa kachasqankunataj Davidpa wasinman yaykuspa, puñunanpi uj lantillata tarerqanku, cabra millmamanta awasqawan uman chaypi sawnanaykuchisqata.

¹⁷ Chantá Saulqa ususin Micalta nerqa: Imaraykutaj kay jinata q'otiyawankiri? Imajtintaj awqayta ayqeyta yanaparqankiri? nispa. Micaltaj kuticherqa: Pay niwarqa: Ayqeyta yanapaway, manachayqa qanta wañuchisqayki, nispa.

¹⁸ Ajinata Davidqa Ramá llajtapi Samuelpaman ayqerqa, chantá Saúl payta imatachus ruwasqanta Samuelman willakorqa. Chantá Davidwan, Samuelwanqa Nayotman tiyakoj rerqanku.

¹⁹ Chantá runakuna Saulman willarqanku Davidqa Nayotpi Ramá llajtapi kashasqanta.

²⁰ Chaypacha Saulqa Davidta jap'imunankupaj soldadokunata kacharqa. Saulpa kachasqankunatajrí Ramá llajtaman chayaspa, Samuelta, uj mashkha sut'inchajkunawan Diosmanta sut'inchashajta rikorqanku. Chay sut'inchajkunataqa Samuel pusaykachasharqa. Jinallaman Diospa Espiritonqa Saulpa kachasqankunamanpis jamorqa. Chantá paykunapis Diosmanta sut'inchajkuna jina sut'inchashallarqankutaj.

²¹ Saúl chayta yachaspa, waj soldadokunatañataj kacharqa. Paykunapis Diosmanta sut'inchajkuna jinallataj sut'incharqanku. Kinsa kaj kutipi Saulqa wajkunatañataj kachallarqataj. Paykunapis Diosmanta sut'inchajkuna jinallataj sut'incharqanku.

²² Chaymantaqa kikin Saulñataj Ramá llajtaman kachaykukorqa. Chantá Secupi jatun pujyu chaynejman chayashaspa, Saúl tapurikorqa: Samuelwan, Davidwan ima maypitaj kashankuri? nispa. Uj runataj kuticherqa: Ramá llajta qayllapi, Nayotpi kashanku, nispa.

²³ Chantá Saulqa Ramá llajtapi Nayotman kachaykukorqa. Jinapi ñanta rishajtin, paymanpis Diospa Espíritun jamullarqataj. Chantá Saulqa Diosmanta sut'inchaj jina sut'inchaspa, Ramá llajtapi Nayotman chayanankama rillarqapuni.

²⁴ Chaymantataj maypichus Samuel kasharqa, chayman chayaspa, Saúl p'achanta lluch'ukuspa, ukhu p'achallanwan qhepakorqa. Jinaqa tukuy p'unchaynintin, jinataj ch'isinpis Samuelpa ñawpaqenpi Diosmanta sut'inchaj jina sut'inchaspa karqa. Chaymantapacha kay jina nisqa karqa: Saulpis Diosmanta sut'inchajllatajchu tukupusqa? nispa.