1 Samuel 10 - DIOSPA QHELQACHISQ

Samuel Saulta kuraj kamachej kananpaj churan

¹ Saulpa kamachin ripojtinkama, Samuelqa Saulpa umanman aceitewan jich'aykorqa, much'aykuspataj, nerqa: Kunanmanta Tata Diosqa Israel suyunpi kuraj kamachejnin kanaykipaj ajllasunki. Paykunata kamachispa, muyuyninkupi kaj awqankukunaj makinkumanta kacharichinki. Tata Diosqa qanta kuraj kamachej kanaykipaj ajllasusqanmanta kaymin señal kanqa:

² Kunanqa kaymanta ripushaspa, Raquelpa ayan p'ampasqa kashan chaynejpi, Selsa llajta qayllapi, iskay runakunawan tinkukunki. Chayqa Benjamín jatun aylloj jap'iyninpi kashan. Paykunataj nisonqanku mask'asharqanki chay burrokunata tarisqankutaña. Chantá nillasonqankutaj tataykeqa manaña burrokunamantachu llakisqa kashasqanta, manachayqa qankunamanta: Wawayta tarinaypaj, imatataj ruwaymanri? nispa.

³ Aswan jaqaymantaj, Taborpi encina sach'a chayman chayaspa, Betelman Diosta yupaychaj rejkunamanta kinsa runawan tinkukunki. Ujnenqa kinsa chivota apashanqa, ujnintaj kinsa t'antata, ujnintaj qara bota vinota.

⁴ Paykunaqa qanta napaykuytawan, iskay t'antata jaywarisonqanku. Qantaj jap'ikullanki.

⁵ Chaymantaqa Gabaapi Diospa orqon nisqaman chayanki, maypichus filisteokunajta soldadonkuna kashanku, chayman. Llajtaman yaykushaspataj, Diosmanta sut'inchajkunamanta uj t'aqawan tinkukunki. Paykunataj Diosmanta sut'inchaspa, orqopi Diosta yupaychana cheqamanta urayk'amushanqanku. Paykunaj ñawpaqenkutataj runakuna rishanqanku tamborankuta tocaspa, chantá panderetakunata, qenakunata, arpakunata ima tocaspa.

⁶ Chaypacha Tata Diospa Espíritun qanman jamuspa, kallpachasonqa, qantaj paykuna jinallataj Diosmanta sut'inchanki. Chantá mosoj sonqoyoj runaman tukunki.

⁷ Chay señalkuna qhatirisusqanta rikuspa, imatachus munasqaykita ruway, imajtinchus Tata Dios yanapasonqa.

⁸ Chantá Gilgal llajtaman ñawparishay. Chayamunaykama chaypi qanchis p'unchayta suyawanki. Noqataj jamusaj uywa ñak'asqata q'olachispa chantá allinyakuna jaywanatawan Tata Diosman jaywanaypaj. Chantá kuraj kamachej jina imatachus ruwanaykita nisqayki, nispa.

⁹ Saúl ripunanpaj Samuelmanta t'aqakapojtinkama, Diosqa Saulpa sonqonta waj jinaman tukucherqa. Chay p'unchaypachataj Samuelpa tukuy nisqan junt'akorqa.

¹⁰ Saulwan, kamachinwan ima Gabaa llajtaman chayajtinku, Diosmanta sut'inchajkuna paykunawan tinkukorqanku. Chaypacha Tata Diospa Espíritun Saulman jamorqa, Saultaj Diosmanta sut'inchajkuna jina paykunawan khuska Diosmanta sut'incharqa.

¹¹ Pikunachus Saulta rejsejkuna Diosmanta sut'inchajkunatawan khuska rikuspa, ninakorqanku: Cispa churin, imanakuntajri? Saulpis Diosmanta sut'inchajllamantajchu tukupun? nispa.

¹² Paykunamanta ujnin nillarqataj: Pitaj paykunaj tatankuri? nispa. Chaymantapacha runakuna nej kanku: Saulpis Diosmanta sut'inchajman tukupusqaqa, nispa.

¹³ Chantá Diosmanta sut'inchaj jina ruwananta tukuspa, Saulqa wasinman chayarqa.

¹⁴ Chantá ujnin tion payta, chantá kamachinta ima taporqa: Maymantaj rerqankichejri? nispa. Saultaj kuticherqa: Burrokunata mask'aj rerqayku. Mana tariyta atispataj, Diosmanta sut'inchaj Samuelta tapurikoj rerqayku, nispa.

¹⁵ Chantá tionqa Saulta tapullarqataj: Ima nisorqachejtaj Samuelri? Willariway ari, nispa.

¹⁶ Saultaj kuticherqa: Chinkaj burrokunata tarisqankutaña willawarqayku, nispa. Saulrí Samuel payman kuraj kamachej kananta nisqanmanta mana imatapis willarqachu.

¹⁷ Chay qhepata Samuelqa tukuy israelitakunata wajyacherqa, Mispá llajtapi Tata Diospa ñawpaqenpi tantakunankupaj.

¹⁸ Chaypitaj paykunata nerqa: Israelpa Tata Diosnin nisunkichej: Noqaqa qankunata Egiptomanta orqhomorqaykichej, paykunamantataj kacharicherqaykichej, jinataj tukuy ñak'arichisojkunamantapis.

¹⁹ Kunantajrí noqa Diosniykichejta manakajpaj qhawankichej. Kamachinasuykichejpaj kuraj kamachejta mañakuspa, tukuy imaymana llakiykunapi yanapasoj Diosta qhesachawankichej. Chayrayku kunanqa ñawpaqeyman qayllamuychej, sapa jatun ayllu, jinataj sapa wasi ayllu ima, nispa.

²⁰ Chaymanta Samuelqa kamacherqa Israelmanta tukuynin jatun ayllukuna chimpaykunankuta. Chantá Benjamín jatun ayllu ajllasqa karqa.

²¹ Jinaspataj, Samuel kamacherqa Benjamín jatun ayllumanta kajkuna qayllanankuta. Chaypitaj Matrij wasi ayllun ajllasqa karqa, chay wasi ayllumantataj Cispa churin Saúl ajllasqa karqa. Chantá payta mask'arqanku, nitaj tarerqankuchu.

²² Chayrayku Tata Diosta ujtawan taporqanku, chaypi paykunawanchus manachus Saúl kashasqanta. Tata Diostaj paykunaman kuticherqa: Saulqa q'epi chawpipi pakasqa karishan, nispa.

²³ Chaypacha usqhayta rispa, Saulta q'epi chawpimanta aysarqamuytawan, pusamorqanku. Paykuna chawpipi kajtintaj, jatunkaray runa kasqanta rikorqanku. Paykunaqa lijrankamalla chayarqanku.

²⁴ Jinapi Samuelqa tukuyta nerqa: Tata Diospa ajllakusqanta rikuychej. Mana mayqenpis paymanqa jap'ikunchu, nispa. Chantá tukuy israelitakuna qhaparerqanku: Jallalla, jallalla kuraj kamachejqa, nispa.

²⁵ Chantá chaypachapacha Samuelqa kuraj kamachej imaynachus kananmanta chantá imachus ruwananmanta israelitakunaman yachacherqa. Chaytataj uj qhelqaman qhelqaykuspa, Dioswan Tinkukuna Toldoman jallch'arqa. Chaymantataj Samuelqa tukuyninku wasinkuman kutipunankuta kamacherqa.

²⁶ Saulpis Gabaapi wasinman ripullarqataj, paywantaj wapu runakuna rillarqankutaj, pikunatachus Tata Dios sonqomanta qhatinankuta munachisqa, chaykuna.

²⁷ Wakin sajra sonqoyoj runakunarí alqorakuspa jina nerqanku: Kaychu noqanchejta yanapawayta atiwasunman? nispa. Paykunaqa Saulta manakajpaj qhawasqankurayku, mana imallatapis waqerinankupaj aparqankuchu. Chaywanpis Saulqa paykunata mana rikoj tukorqachu.