1 Reyes 9 - DIOSPA QHELQACHISQ

Diosqa Salomonwan tratota ruwan

¹ Salomonqa Tata Diospa Templonta, kamachinan wasitapis, chantá tukuy imatachus munarqa, chaykunata ruwayta tukucharqa.

² Jinapi Tata Diosqa Salomonman uj kutitawan rikhurerqa, imaynatachus ñawpajpi Gabaonpi rikhurerqa, ajinallatataj.

³ Tata Diostaj payta nerqa: May jinata mañakuwasqaykita uyariykiña. Ruwapuwasqayki Templotapis noqapaj t'aqakuniña, chaypi suteyqa wiñaypaj yupaychasqa kananpaj. Kay Templota waqaychasajpuni, manataj qonqasajchu.

⁴ Kunantaj qan tatayki David jina cheqan sonqowan puriy, mana k'amina, tukuy ima nisqaytataj junt'ay, kamachisqayta, nisqaytawan kasuspa.

⁵ Ajinatachus ruwanki chayqa, Israel suyuta kuraj kamachejqa mirayniykimanta wiñaypaj kallanqapuni. Imaynatachus tatayki Davidman nerqani: Mirayniykimanta Israel suyuta kuraj kamachejqa kallanqapuni nispa, chayman jina kanqa.

⁶ Chaywanpis sichus qankuna, wawaykichejkunapis noqamanta karunchakuwajchej, mana kasuspa kamachisqayta, yachachisqayta ima, sitajchus waj dioskunata qonqorikuspa yupaychankichej, chayqa,

⁷ noqaqa kay jallp'ata qorqaykichej, chaymanta qharqosqaykichej. Kay Templota noqapaj t'aqakusqaytapis qhesachallasajtaj. Israel suyutaj, tukuy suyoj asipayasqan kanqa.

⁸ Kay Templota raqayllamanña tukusqata rikuspa, chayninta tukuy rejkuna t'ukuspa, asikonqanku: Imajtintaj Tata Diosqa kay Templota, Israel suyutapis kay jinata ruwanri? nispa.

⁹ Chantá kutichenqanku: Paykunaqa, pichus ñawpa tatankukunata Egiptomanta orqhomorqa, chay Tata Diosninkuta saqerparerqanku. Waj dioskunaman makinkuta oqharerqanku, qonqorikuspataj, paykunata yupaycharqanku. Chaymantamá Tata Diosqa paykunaman kay tukuy sajra imakunata apachimun, nispa.

Salomonpa waj imakunata ruwasqan

¹⁰ Salomonqa iskay chunka watapi Tata Diospa Templonta, paypa wasintawan ima tukucherqa.

¹¹ Chaykunapaj Tiromanta kuraj kamachej Jiranqa pinomanta, cedromantawan kurkukunata apachimusqa. Qoritapis mashkhatachus munasqanta Salomonman qosqa. Chaymantataj kuraj kamachej Salomonqa Jiranman iskay chunka llajtakunata Galilea chaynejpi qorqa.

¹² Tiromanta kuraj kamachej Jiranqa chay llajtakunata qhawaj rerqa, manataj payman allinchu rijch'arqa.

¹³ Chantá Salomonta nerqa: Wawqéy, imapaj kay jina mana allin llajtakunata noqaman qowankiri? nispa. Suticharqataj “Cabul cheqa”, nispa. Chay sutiwanpuni kunankama qhepakunku.

¹⁴ Jirantaj kuraj kamachejman apachimusqa 3.960 kilo qorita.

¹⁵ Kuraj kamachej Salomonqa runakunata mit'api ruwacherqa Tata Diospa Templonta, paypa wasintawan, Jerusalenpa perqantawan ruwanankupaj. Chantá Jazorta, Meguidota, Guézer llajtakunatapis sayachillarqataj.

¹⁶ Egipto suyumanta kuraj kamachejqa Guézer llajtata maqanakupi jap'ispa, ninawan kanaykusqa, chay llajtapi cananeo tiyakojkunatataj wañurachisqa. Aswan qhepamantaj chay llajtata chayaqeta jina ususinman qoporqa, pichus Salomonpa warmin karqa, chayman.

¹⁷ Chayrayku Salomonqa Guézer llajtata, ura kaj Bet Jorón llajtatawan watejmanta oqharicherqa.

¹⁸ Jinallataj Judá suyupi ch'innejpi Baalat llajtata, Tadmor llajtatawan oqharichillarqataj.

¹⁹ Ajinallatataj maypichá Salomón chajra poqoyta waqaychachej, chay llajtakunata jallch'acherqa. Chantá carretakunata waqaychana llajtakunata, caballo uywana llajtakunatawan watejmanta oqharicherqa. Imakunatachá Salomón ruwayta munarqa, chay tukuyninta Jerusalenpi, Libanopi, maykunapichá kamacherqa, chay tukuyninpi ruwacherqa.

²⁰ Chay llajtakunamanta qhepakojkuna karqankuraj amorreokuna, jeteokuna, ferezeokuna, heveokuna, jebuseokuna ima. Paykunaqa mana israelitakunachu karqanku.

²¹ Chaykunaj mirayninkumanta chay jallp'api qhepakojkuna, mayqenkunatachus israelitakunaqa mana tukuchiyta atisqankuchu, chay tukuyninkuta Salomón sinch'i ruwanaman churarqa, kunankamataj ajinallapuni kashan.

²² Israelitakunaj mirayninkumantarí Salomonqa mana mayqenninkutapis wata runamanta churarqachu. Paykuna karqanku soldadokuna, kurajkuna, soldadokunata kamachejkuna, carretakunata apaykachajkuna, caballopi purej soldadokuna ima.

²³ Salomonqa ruwajkunata kamachinankupaj 550 churarqa. Chaykunaqa tukuy ima ruwanapi llank'ajkunata qhawaj kanku.

²⁴ Faraonpa ususenqa Davidpa llajtan nisqamanta astakamporqa Salomonpa ruwachipusqan wasinman. Chantá Salomonqa llajtaj inti llojsimuynej wayq'ota jallp'awan junt'acherqa.

²⁵ Tata Diospa Templon tukukusqanmanta Salomonqa watapi kinsa kutita Tata Diosman jaywaj, allinyakuy jaywana ñak'asqa uywakunata. Jinataj q'olachinatawan jaywaj Tata Diospaj altarta ruwasqan patapi. Chay patallapitaj inciensota q'oshñichej Tata Diospa ñawpaqenpi.

²⁶ Salomonqa Ezión Gueberpi Puka Mama Qocha nisqa kantupi jatuchaj barcokunatapis ruwachillarqataj, Elat nisqa, chaypi. Chayqa Edom jap'iypi kashan.

²⁷ Tiromanta kuraj kamachej Jirantaj chay jatuchaj barcokunapi wakin kamachinkunata kacharqa, qochata sumajta rejsejkunata, Salomonpa kamachinkunatawan khuska.

²⁸ Paykunataj Ofirman chayaspa, 14.000 kilo qorita kuraj kamachej Salomonman apamorqanku.