1 Reyes 7 - DIOSPA QHELQACHISQ

Salomón wasinta ruwachin

¹ Chantá Salomonqa kamachinan wasitañataj ruwachikorqa, chaytataj chunka kinsayoj watapi tukucherqa.

² Jinallataj “Cedromanta Kamachina Wasi” nisqatapis ruwachillarqataj, chay wasitaj kay jina karqa: Sayt'unman tawa chunka phishqayoj metro karqa, anchonman iskay chunka iskayniyoj metro khuskanniyoj, sayayninmantaj chunka kinsayoj metro khuskanniyoj karqa. Tawa sinru pino kurkumanta sayantakuna patapi sayachisqa karqa, patanpitaj pino kurkukuna churasqa karqa.

³ Chaykunaqa tawa chunka phishqayoj karqanku, kinsaman rak'isqa, sapa t'aqapitaj chunka phishqayoj kurkukuna karqa, sayanta patapi churasqa. Chay kurkukuna patataj pino tablawan tablayasqa karqa.

⁴ Kinsa sinru ventanakuna karqa, sapa ujtaj chimpanpura karqanku.

⁵ Tukuy punkukuna tawa esquinayoj karqanku, kinsa sinru ventanataj sapa uj chimpanpura karqanku.

⁶ Chay wasej ñawpaqenpi uj corredorta sayantakunayojta ruwallarqataj. Chayqa sayt'unman karqa iskay chunka iskayniyoj metro khuskanniyoj, anchonmantaj chunka kinsayoj metro khuskanniyoj. Chaypa ñawpaqenpitaj waj corredorpis kallarqataj.

⁷ Ruwallarqataj “Justicia Ruwana Wasi” nisqata, chaypi kuraj kamachej justiciata ruwananpaj. Pino maderawantaj pampamantapacha patakama tablayaykucherqa.

⁸ Salomonpa tiyakunan waseqa wasa ladonpi patioyoj karqa, chaypis kikin ruwasqallataj karqa. Salomonqa faraonpa ususinpaj, mayqenchus warmin karqa, chaypajpis uj wasita ruwachipullarqataj chay kikin corredorta jinallataj.

⁹ Tukuy ruwachisqan wasikunaqa sumaj rumiwan ruwasqa karqa, medidanman jina k'utusqa karqa, ch'eqosqa, jawanpis ukhunpis. Tejsinmantapacha patakama sumaj ruwasqa karqa.

¹⁰ Chay wasej cimientonkunaqa sumaj jatuchaj rumimanta karqa. Wakinkunaqa tawa metro khuskanniyoj karqa, wakintaj kinsa metro khuskan kurajniyoj karqa.

¹¹ Chay perqaj patanpipis ajina ch'eqosqa rumillawantaj ruwasqa karqa, medidaman jina k'utusqa, pino maderawan ima.

¹² Jatun patioj perqantataj ch'eqosqa rumikunawan kinsa sinruta muyuykucherqa, patanmantaj pino kurkuta uj sinruta churaykorqa, imaynatachus Tata Diospa Templon ukhu patiopi ruwarqa, Temploj corredorninpipis, ajinallatataj ruwarqa.

Salomonqa Tiro llajtamanta Jiranta mink'an

¹³ Chantá kuraj kamachej Salomonqa Tiromanta Jirán sutiyoj runata pusachimorqa.

¹⁴ Jiranqa Neftalí jatun ayllumanta uj warmisapaj churin karqa, tatantaj Tiromanta karqa. Payqa broncemanta tukuy imata ruwayta yacharqa. Jinallataj Jiranpis sumaj yachayniyoj, yuyayniyojtaj karqa, broncemanta tukuy imaymanata ruwananpaj. Paytaj kuraj kamachej Salomonpaman jamuspa, tukuy imata ruwarqa.

¹⁵ Bronceta unuyachiytawan, iskay sayantakunata ruwarqa. Chaykunaqa sapa uj sayayninman pusaj metroyoj karqa, rakhunmantaj phishqa metro khuskanniyoj karqa.

¹⁶ Ruwallarqataj broncemanta iskay pilluta jina, chay sayantakunaj patanman churanankupaj. Sapa pilloqa phatunman iskay metro uj cuarta kurajniyoj karqa.

¹⁷ Ruwallarqataj iskay simp'asqa mallata jina, chay sayantakunaj patankupi pilluta muyuykuchinanpaj, uj malla simp'asqa sapa uj pillupaj karqa.

¹⁸ Ruwallarqataj iskay sinru granadata chay mallaj simp'asqa muyuyninpi churaspa, chaykunawan sayantakunaj patapi pilluta k'achanchananpaj. Kikillantataj chay uj kaj sayantapajpis ruwarqa.

¹⁹ Chay sayantakunaj puntanpi pilloqa lirio t'ika jina karqa, sayayninmantaj iskay metroyoj karqa.

²⁰ Iskaynin sayantakunaj patanpi phukuchu jina karqa, chaypi mallaj simp'asqa qayllanpi 200 granadakunata churarqa, sapa ujpi iskay sinrukama muyurisqa karqa.

²¹ Chay sayantakunatataj Jiranqa Diospa Templonman yaykuna punkuman churarqa. Paña ladopi kaj sayantata sayachispataj “Jaquín”, nispa suticharqa. Lloq'e ladopi kajta sayachispataj “Boaz”, nispa suticharqa.

²² Chay sayantakunaj umanman lirio t'ikaman rijch'akoj ruwasqata churarqa. Ajinata sayantakunata ruwayta tukorqa.

Templopi kaj imakuna

²³ Jiranqa broncemanta unuyachispa, uj jatun yaku churanata ruwarqa, chaytaj muyu karqa. Uj kantunmanta ujnin kantunkama tawa metro khuskanniyoj karqa, sayayninmantaj iskay metro kurajniyoj karqa, tukuy muyuynintaj chunka kinsayoj metro khuskanniyoj karqa.

²⁴ Chay jatun yaku churanaj simin urapitaj broncemanta lakayoteman rijch'asqata ruwarqa. Sapa khuskan metropi iskay sinrupi chunka karqa, chaykunataj jatun yaku churanawan khuska ujllapi jich'asqa karqa.

²⁵ Chayqa chunka iskayniyoj broncemanta ruwasqa torokuna patapi churasqa karqa. Kinsaqa patanejta qhawasharqanku, kinsataj uranejta, kinsataj inti llojsimuynejta, kinsataj inti yaykuynejta. Ajinamanta torokunaj chakinku ukhu ladopi karqanku.

²⁶ Yaku churanaqa phatunman uj t'ajlli karqa, kantuntaj lirioj t'ikanman rijch'akorqa. Chaymantaj 44.000 litro yaku yaykoj.

²⁷ Chantá Jiranqa broncemanta chunka chukukunata ruwallarqataj, sapa ujtaj sayt'unman uj metro tawa cuartayoj karqa. Anchonman kikillantaj karqa, sayayninmantaj uj metro iskay cuartayoj karqa.

²⁸ Chay chukukunaqa kay jina ruwasqa karqanku: Chawpinpi tablayoj jina, marcoyoj jina k'achanchasqa karqa.

²⁹ Marcokunapi t'illmisqa karqa, wakenqa leonkunaman rijch'akoj, wakintaj torokunaman, wakinrí angelkunaman. Chay marcokunaj uranpi, patanejpiwan, jinallataj leonkunaj, torokunaj uranpi patanejpiwan pillu jina warawakuna churasqa karqa.

³⁰ Sapa chukoqa broncemanta tawa ruedayoj karqa, imapichus muyunankupis broncellamantataj karqa. Chay yaku churanaj tawantin sapa esquina urapi broncemanta jap'inayoj karqa, chaykunataj t'ikanchasqa karqanku, chaymanta jap'ispa apaykachanankupaj.

³¹ Yaku churanaj simenqa jap'inamanta pataman khuskan metro jinalla karqa. Simintaj muyu karqa. P'ukunmanta pataman kinsa cuarta kurajniyoj karqa. Kallarqataj siminpi warawakuna ruwasqa, chaykunataj tawa esquinayoj karqanku, mana muyuchu.

³² Tawantin ruedaqa marcokunaj uranpi karqa, imapichus muyunantaj kikin chukullamantataj llojsimorqa. Sapa uj ruedajta sayayninman kinsa cuarta t'ajlliyoj jina karqa.

³³ Ruedakunaqa carreta ruedaman rijch'akorqa, muyunan, radion, aron, rueda jap'inanpis, tukuyninku broncellamantapuni ruwasqa karqanku.

³⁴ Tawantin esquinapi jap'inapaj ninrinpis chukuwan ujlla karqanku.

³⁵ Chukoj patanpi p'alta muyu karqa. Chayqa phatunman cuarta kurajniyoj karqa. Chay chukoj patanpi marcoqa tablerowan ima chay chukuwan ujlla karqa.

³⁶ Jiranqa chay marcokunapi, tablerokunapi ima, lijrayojkuna querubinkunata t'illmerqa, leonkunata, palmerakunatawan, campo kasqanman jina, chaykunaj muyuyninpitaj waj k'achanchanatawan churarqa.

³⁷ Ajinata chay chunka chukukunataqa broncemanta unuyachispa, uj rijch'ajllata chhikachajkamata ruwarqa.

³⁸ Broncemanta chunka yaku churanata ruwallarqataj. Sapa uj yaku churana uj metro tawa cuartayoj jina karqa, chaymantaj yakoqa 880 litro junt'aj, sapa ujtaj chunka chuku pataman ujtakama churasqa karqa.

³⁹ Temploj paña ladonman phishqa chukuta churarqa, phishqa chukutataj lloq'enejman. Jatun yaku churanatataj Temploj pañanejman churarqa, uraynej inti llojsimuynejman.

⁴⁰ Jinallataj Jiranqa mankakunata, lampakunata, yurukunatawan ruwarqa. Ajinata Salomonpa nisqanman jina, Tata Diospa Templonpaj tukuy imata ruwayta tukorqa:

⁴¹ Iskay sayantakunata, umanpaj muyu pillukunata, k'achanchanapaj iskaynin simp'asqa mallatawan, pillukunata qhataykunapaj.

⁴² Ruwallarqataj iskaynin simp'asqa mallakunapaj 400 granadakunata, iskay sinruta sapa simp'asqa mallapaj, chaykunawan sayantakunaj umanta k'achanchananpaj.

⁴³ Ruwallarqataj chunkantin chukukunata, chunka yaku churanatawan.

⁴⁴ Jinallataj ruwarqa jatun yaku churanata, uranpi kasharqa, chay chunka iskayniyoj torokunatawan.

⁴⁵ Ruwallarqataj mankakunata, lampakunata, yurukunatawan. Jiranqa kuraj kamachej Salomón kamachisqanrayku chay tukuy imata broncemanta Tata Diospa Templonpaj ruwarqa.

⁴⁶ Chay tukuyta kuraj kamachejqa Jordán pampanejpi unuyachispa ruwacherqa, Sucotwan, Saretanwan tinkuypi, chaypi sumaj llink'i jallp'a kasqanrayku.

⁴⁷ Salomonqa broncemanta ruwachisqan manchay ashkhapuni kasqanrayku mana pesacherqachu.

⁴⁸ Chantá Salomonqa tukuy imata ruwachillarqataj Tata Diospa Templonpaj: Qorimanta uj altarta, qorimanta uj mesatawan chayman churanankupaj Tata Diospaj t'aqasqa t'antakunata.

⁴⁹ Payqa qorimanta chunka candelerokunatapis ruwachillarqataj, phishqata paña ladoman, phishqatataj lloq'e ladoman churanankupaj Diosllapaj T'aqasqa Cheqaj ñawpaqenpi. Qorimanta ruwachillarqataj t'ikakunatawan, lamparakunatawan, tenazakunatawan.

⁵⁰ Ajinallatataj ruwacherqa yurukunata, pábilo k'utunata, vasokunata, juch'uy wisllakunata, incienso q'oshñichinata ima. Chay tukuynin qorimanta ruwasqa karqanku. Diosllapaj T'aqasqa Cheqaj punkoj jap'ichinanpis qorillamantataj karqa, jinallataj Temploj punkunpa jap'ichinanpis.

⁵¹ Ajinata kuraj kamachej Salomonqa Tata Diospa Templonpaj tukuy ruwanata tukucherqa. Chaymantataj Salomonqa Tata Diospa Templonman apamorqa, imatachus tatan David qolqe metalmanta, qorimantawan ruwachispa Tata Diospaj t'aqasqa, chay tukuyta. Chaykunataqa Tata Diospa Templonpi valorniyoj imakunata waqaychana wasiman churarqa.