1 Reyes 5 - DIOSPA QHELQACHISQ

Salomonqa Jiranwan tratota ruwan

¹ 1 (15) Tiromanta kuraj kamachej Jiranqa Davidpa churin Salomón kuraj kamachej jina churasqa kasqanta yachaspa, kamachinkunata kacharqa Salomonpa tatan Davidwan k'achatapuni kawsakusqanrayku.

² 2 (16) Chantá Salomonqa kuraj kamachej Jiranman kay jinata nichimorqa:

³ 3 (17) Qanqa yachankiña imaynatachus tatay David uj templota Tata Diosninpaj mana ruwayta atisqanta, maqanaku ch'ajwallapi kasqanrayku, Tata Dios tukuy awqankunata chakin uraman churanankama.

⁴ 4 (18) Kunanrí Tata Diosneyqa tukuynejpi allin kawsayta qowan, manañataj awqaykunapis kanñachu, nitaj imata manchachikunapis.

⁵ 5 (19) Noqataj niniña uj templota Tata Diosniypaj ruwanayta, tatay Davidman Tata Dios nisqanman jina: Qanpa churiyki, pitachus cuentaykimanta kamachinayki tiyanaman tiyaykuchisaj, paymin noqaj sutiypi uj templota ruwapuwanqa, nispa.

⁶ 6 (20) Kunanqa kamachiy ari Libanomanta pino sach'akunata k'utupunawankuta. Noqaj kamachiykunaqa qanpa kamachiykikunata yanapanqanku, noqataj kamachiykikunaj ruwasqankumanta mashkhatachus niwasqaykita qopusqayki, imaraykuchus qanqa yachanki, noqaykoqa sidoniokuna jina sach'a k'utuyta mana yachaykuchu, nispa.

⁷ 7 (21) Jirantaj chay jinata Salomón willachisqanta uyarispa, maytapuni kusikorqa, nerqataj: Tata Diosqa yupaychasqa kachun, imaraykuchus payqa sumaj yachayniyoj churita Davidman qorqa chay chhika jatun suyuta kamachinanpaj, nispa.

⁸ 8 (22) Chantá Jiranqa Salomonman nicherqa: Uyariniña imatachus willachimuwasqaykita. Chay tukuy nisqaykiman jina ruwaspa, cedro sach'akunata, pino sach'akunatawan k'uturachisaj, chaymantataj qanman apachimusqayki.

⁹ 9 (23) Noqaj kamachiykunaqa Libanomantapacha mama qocha kantukama chay k'utusqa kurkuta apamonqanku, chaymantataj qochanejta balsapi jina apachimusqayki, maymanchá qan nimuwanki, chaykama. Chaypitaj phaskaraspa, qanqa apakapunki. Chantá nisqayman jina mikhunata aylluypaj apachimuwanki, nispa.

¹⁰ 10 (24) Ajinamanta Jiranqa pino maderatawan, cedro maderatawan Salomonman qorqa Salomón munasqanman jina.

¹¹ 11 (25) Salomonpis Jiranpa kamachinan wasipi kajkunapaj mikhunata qorqa, 20.000 carga trigota, 4.400 litro sumajnin kaj olivo aceitetawan. Chay imakunata Salomonqa sapa wata Jiranman qoj.

¹² 12 (26) Ajinata Tata Diosqa nisqanman jina Salomonman sumaj yachayta qorqa. Jiranwan, Salomonwan uj tratota ruwarqanku. Ajinamanta paykuna ukhupeqa mana ima ch'ajwapis karqachu.

¹³ 13 (27) Salomonqa kamacherqa tukuynin Israelmanta 30.000 ajllasqa runakuna mit'api ruwanankupaj.

¹⁴ 14 (28) Chay ajllasqa kajkunamanta chunka waranqata Libanoman sapa killa kacharqa, mit'ankuman jina. Chaykunaqa uj killata Libanopi qhepakamoj kanku, iskay killatataj wasinkupi. Adonirantaj mit'api llank'ajkunata qhawananpaj churasqa karqa.

¹⁵ 15 (29) Salomonpata 70.000 cargata apaj runakuna tiyapullarqataj, 80.000 runakunataj orqopi rumita ch'eqojkuna kallarqataj.

¹⁶ 16 (30) Salomonpa churasqan 3.300 kurajkuna kallarqataj, pikunachus mit'api llank'ajkunata kamachej kanku.

¹⁷ 17 (31) Kuraj kamachejqa Diospa Templonpaj cimientonman churanankupaj, jatuchaj ch'eqosqa rumikunata k'ajtichispa, ch'eqonankuta kamacherqa.

¹⁸ 18 (32) Salomonpa chantá Jiranpa albañilninkuna jinataj Gebalpi tiyakojkuna ima Diospa Templonta ruwanankupaj k'ullukunata llajllarqanku, rumitataj ch'eqorqanku.