1 Reyes 4 - DIOSPA QHELQACHISQ

Salomonpa yanapajninkuna

¹ Salomonqa tukuynin Israel suyuta kamacherqa.

² Kuraj yanapajninkunataj kaykuna karqanku: Sacerdoteqa Sadocpa churin Azarías karqa.

³ Sisaj churinkuna Elijoref, Ajiaswan qhelqerikuna karqanku. Ajiludpa churin Josafattaj kuraj kamachejpa kuraj kaj yanapajnin karqa.

⁴ Joyadáj churin Benaías soldadokunata kamachej karqa. Sadocwan, Abiatarwan sacerdotekuna karqanku.

⁵ Natanpa churin Azarías kurajkunaj jilaqatanku karqa, sacerdote Natanpa churin Zabudtaj kuraj kamachejpata yuyaychajnin karqa.

⁶ Ajisar sutiyojqa kamachina wasipi mayordomo karqa, Abdaj churin Adonirantaj mit'ankunaj jilaqatanku karqa.

⁷ Kuraj kamachej Salomonqa tukuynin Israel suyupi chunka iskayniyoj jilaqatakunata churarqa, chaykunataj tukuy ima mikhunata kuraj kamachejpaj, ayllunpaj, kamachejwan kajkunapajwan churachimoj kanku. Sapa ujtaj sapa watapi uj killata churaj kanku.

⁸ Chay chunka iskayniyoj jilaqatakunaj sutinku kaykuna karqa: Ben Jurqa Efraín orqonejpi churasqa karqa.

⁹ Ben Decarqa Macaspi, Sagalbinpi, Bet Semespi, Elonpi, Bet Jananpiwan churasqa karqa.

¹⁰ Ben Jesedqa Arubotpi, Socopi tukuynin Jefer cheqanejpi churasqa karqa.

¹¹ Ben Abinadabqa tukuynin Dor jap'iypi churasqa karqa. Paypa warmenqa Salomonpa ususin Tafat karqa.

¹² Ajiludpa churin Banaqa Tanacpi, Meguidopiwan churasqa karqa, tukuynin Bet Seanpi, Saretán qayllapi, Jezrelmanta aswan urapi, Bet Seanmanta Abel Mejolá chaykama, chantá Jocmeanmanta chay uj ladokama churasqallataj karqa.

¹³ Ben Gueberqa Galaadmanta Ramotpi churasqa karqa. Paypa kamachiynillanpitaj karqa Galaadpi Manasespa churin Yairpa llajtankunapis, Basanmanta Argob cheqapis. Chaynejpeqa sojta chunka jatuchaj llajtakuna karqanku, sumaj perqawan muyuykuchisqa, punkunkunapis broncemanta aldabayoj karqanku.

¹⁴ Iddoj churin Ajinadabqa Majanayinpi churasqa karqa.

¹⁵ Neftalí jap'iypitaj Ajimaz churasqa karqa, pichus casarakusqa Salomonpa ususin Basematwan, chay.

¹⁶ Jusaypa churin Banaqa Aserpi, Alotpiwan churasqa karqa.

¹⁷ Paruajpa churin Josafatqa Isacar jap'iypi churasqa karqa.

¹⁸ Eláj churin Simeyqa Benjamín jap'iypi churasqa karqa.

¹⁹ Urij churin Gueberqa Galaad jap'iypi churasqa karqa, mayqenchus karqa amorreokunaj kuraj kamachejninku Sijonpa suyun, jinataj Basanmanta kuraj kamachej Ogpa suyunwan, chaypi. Jinallataj tukuy Israel suyupi uj kamachej jilaqata kallarqataj.

Salomonpa yachaynin, qhapajyaynintaj

²⁰ Judapi, Israelpiwan ima ashkha runapuni karqanku, mama qochaj kantunpi t'iyu jina, may chhika. Paykunapajqa mana piserqachu mikhuna nitaj ujyana, kusikuspataj chhika patapi kawsakusharqanku.

²¹ 21 (5.1)Salomontaj tukuynin waj suyukunatapis kamachillarqataj Éufrates mayumantapacha filisteokunaj suyunkukama. Mojonninkunapis Egipto chaykama karqa. Payman impuestota pagarqanku, kuraj kamachej Salomón kawsanankama kamachinpi karqanku.

²² 22 (5.2) Salomonpa kamachinan wasipi kajkuna mikhunankupaj sapa p'unchay kay imakunata churamoj kanku: 6.600 kilo yuraj jak'uta, 15.200 kilo trigo jak'utawan.

²³ 23 (5.3) Sumaj wirayachisqa chunka torokunata, pastowan uywasqa iskay chunka torokunata, pachaj ovejakunata, ashkha tarukakunata mana yupaspalla, wallpakunatawan ima.

²⁴ 24 (5.4) Ajinata churaj kanku, imaraykuchus Salomonqa chay tukuynin suyuta kamacherqa, Éufrates inti yaykuynejmanta, Tifesajmanta Gaza chaynejkama, chay tukuy suyupitaj allin kawsay karqa.

²⁵ 25 (5.5) Salomón kawsanankama Judapi, Israelpiwan runakunapis allin kawsayllapitaj tiyakorqanku, sapa ujninku uva sach'anku urapi, higo sach'anku urapipis, Danmantapacha Berseba chaynejkama.

²⁶ 26 (5.6) Chay jawataj Salomonpata tiyaporqa 4.000 caballo wisq'ana wasikuna carreta aysaj caballokunapaj, 12.000 caballokunataj soldadokunapaj karqa.

²⁷ 27 (5.7) Chay jilaqatakunaqa kuraj kamachej Salomonpaj tukuy mikhunata churamoj kanku, Salomonpa wasinpi kajkunapajwan. Sapa jilaqata sapa wata uj killatakama, mana imata pisichispa apamoj kanku.

²⁸ 28 (5.8) Apachimullajtaj kanku cebadata, pajatawan caballokunapaj, cargata chajnana uywakunapajwan. Sapa ujninku mit'ankupi maymanchus apananku karqa, chayman apaj kanku.

²⁹ 29 (5.9) Diosqa jatun yachayta, yuyayta, jatun sonqotawan Salomonman qorqa, tukuy imata yachananpaj jinapuni.

³⁰ 30 (5.10) Salomonpa yachaynenqa inti llojsimuynejpi yachaysapa runakunamanta, jinataj Egiptopi yachaysapa runakunamantapis aswanpuni karqa.

³¹ 31 (5.11) Tukuy yachaysapakunamantapis aswan yachayniyoj karqa: Ezrahmanta Etán, Majolpa churinkunamantapis: Hemán, Calcol, Darda ima. Tukuy muyuynin suyukunapi yachaynenqa may uyarisqapuni karqa.

³² 32 (5.12) Jinataj pay qhelqarqa 3.000 allin yachaywan nisqakunata, 1.005 yarawi takiykunatawan.

³³ 33 (5.13) Jinallatataj parlarqa sach'akunamantapis, Libanopi pino sach'amanta qallarispa, chay juch'uy hisopo qhora perqapi wiñan, chaypi tukuspa. Parlallarqataj tukuy uywakunamanta, p'isqokunamanta, pampata qhatatakojkunamanta, challwakunamantawan ima.

³⁴ 34 (5.14) Salomonpa yachayninmanta uyarinankupaj runakuna tukuy llajtamanta, tukuy suyumanta ima jamoj kanku, maykamachus Salomón yachayniyoj kasqanta uyarerqanku, chaymantapacha.