1 Reyes 20 - DIOSPA QHELQACHISQ

Ajabqa Siria suyuta atipan

¹ Chaymanta qhepaman Siriata kuraj kamachej Ben Adadqa tukuy soldadonkunata tantaykorqa. Paywan kinsa chunka iskayniyoj kuraj kamachejkuna rerqanku ashkha caballokunawan, carretakunawan ima. Chaykunawan rispataj, Samaria llajtata muyuykuspa, maqanakorqankupacha.

² Israelmanta kuraj kamachej Ajabmanpis runakunata kachaspa, nicherqa:

³ Ben Adadqa ajinata nisunki: Qolqeyki, qoriykipis noqajta. Warmiykikunapis, may munasqa wawaykikunapis noqajllatataj, nispa.

⁴ Israel suyumanta kuraj kamachejtaj kutichispa, nerqa: Imaynatachus nisqaykiman jina, wiraqochíy, noqa qanpata kani, jinallataj tukuy imaypis, nispa.

⁵ Chay kachasqakuna ujtawan Ajabman kutimuspa, nillarqankutaj: Ben Adadqa kayta nisunki: Kamachiykunata qanman kachaspa, willacherqaykiña qolqe metalniykita, qoriykita, warmiykikunata, wawaykikunatawan qopunawaykita, nispa.

⁶ Chaywanpis, q'aya kunanta jina kamachiykunata kachamusqayki, tukuy ima wasiykipi kajta, kamachiykikunaj wasinkupi kajtawan ima qhawanankupaj. Chantá apakaponqanku tukuy imatachus munasqankuta, nispa.

⁷ Jinallataj Israel suyumanta kuraj kamachejqa tukuynin kurajkunata wajyachispa, nerqa: Reparaychej kayta: Warmiykunata, wawaykunatapis, qoriytapis, qolqe metalniytapis qopusqayki nishajtiy, kuraj kamachej Ben Adadqa astawan mana allin kajta ruwayta munashawanchej.

⁸ Chantá tukuynin kurajkunaqa, runakunawan ima payta nerqanku: Ama uyariychu, amallataj kasuychu, nispa.

⁹ Jinapi Ajabqa Ben Adadpa kachamusqankunata nerqa: Wiraqochiyman niychej: Ñawpaj kamachiwasqaykita tukuyninta ruwasaj. Kunan kamachiwasqantarí mana atiymanchu, nispa. Kachasqa kajkunataj kutiytawan, ajinata Ben Adadman willamorqanku.

¹⁰ Chantá Ben Adadqa ujtawan Ajabman nichillarqataj: Samaria llajtata thuñisaj, manataj uj maki jallp'allapis wakenqachu soldadoykunaman qonaypaj. Sitajchus mana jinata ruwasaj chayqa, diosniykuna jasut'iwachunku, nispa.

¹¹ Chaymanta Israelpa kuraj kamachejnintaj kuticherqa: Ama wapuykachayrajchu manaraj maqanakushaspaqa, nispa.

¹² Ajabpa kutichisqanta payman willajtinku, Ben Adadqa waj kuraj kamachejkunawan toldokunapi machakuspa kasharqa. Chayta uyariytawantaj, kamachinkunata nerqa: Israelpa contranta maqanakunapaj wakichikuychej, nispa. Paykunataj chay llajtaj contranpi maqanakunankupaj wakichikorqanku.

¹³ Chaypachallataj Israelmanta kuraj kamachej Ajabman Diosmanta uj sut'inchaj jamuspa, nerqa: Tata Dios ajinata nin: Rikunkichu chay chhika runakunata? Kunanqa noqa maqanakupi atipachisqayki, yachankitaj noqa Tata Dios kasqayta, nispa.

¹⁴ Ajabtaj kuticherqa: Piwantaj atipachiwanqari? nispa. Diosmanta sut'inchajtaj nerqa: Tata Dios ajinata nin: Juch'uychaj llajtakunapi kamachejkunaj yanapajnin waynakunawan, nispa. Ajabtaj taporqa: Pitaj paykunawan maqanakunapaj ñawpanqari? nispa. Diosmanta sut'inchajtaj nerqa: Qan qallarinki, nispa.

¹⁵ Chantá Ajabqa chay waynakunata wakicherqa, paykunataj 232 karqanku. Chay jawaqa wakichillarqataj Israel suyumanta soldadokunata, chaykunataj tukuyninpi 7.000 karqanku.

¹⁶ Paykunaqa chawpi p'unchayta llojserqanku. Chaykamataj Ben Adadqa jinataj chay kinsa chunka iskayniyoj kuraj kamachejkuna payta yanapaj jamusqanku, chaykunawan machakusharqa.

¹⁷ Juch'uychaj llajtakunapi kamachejkunaj yanapajnin waynakuna ñawpajta llojsimorqanku. Jinapi Ben Adadman Samariamanta soldadokuna llojsimusqankuta willarqanku.

¹⁸ Chantá pay nerqa: Sichus paykuna mana maqanakojchu llojsimushanku chayqa, kawsashajta jap'iychej, nispa.

¹⁹ Juch'uychaj llajtapi kamachejkunaj yanapajnin waynakuna Samaria llajtamanta llojsimorqanku, paykunaj qhepantataj soldadokuna llojsimullarqankutaj.

²⁰ Sapa ujtaj wañucherqanku paypa contranpi jamojta. Siriokuna ayqerikapojtinkutaj, Israelmanta soldadokuna paykunata qhatiykorqanku. Siriamanta kuraj kamachej Ben Adadpis caballonman lloq'aykuspa, caballopi wakin soldadonkunawan khuska ayqekullarqataj.

²¹ Israelmanta kuraj kamachejrí siriokunaj caballonkukunata, carretankukunatawan jap'ikaporqa. Ajinamanta siriokunata sonqo nanayta atipaykorqa.

²² Chantá Diosmanta sut'inchaj jamuspa, Ajabta nerqa: Riy, sumajta wakichikamuy, imatachus ruwanaykita umallikuytaj, imaraykuchus uj watamantawan Siriamanta kuraj kamachej Ben Adadqa ujtawan contraykipi jamullanqataj, nispa.

Asiriokuna ujtawan Israelwan maqanakunku

²³ Chaymanta qhepaman Siriamanta kuraj kamachejpa yanapajninkunaqa payta nerqanku: Israelitakunaj diosninkoqa orqonejmanta dioskuna kanku. Chayrayku paykuna atipawarqanchej. Sichus paykunawan pampapi maqanakusunman chayrí, atipaykusunman.

²⁴ Qanqa kayta ruwawaj: Kuraj kamachejkunata orqhospa, soldadokuna kamachejkunata churay.

²⁵ Chaymanta waj soldadokunata tantay, ñawpaj maqanakupi karqa, chay chhikallatataj. Jinallataj caballokunatapis, carretakunatapis mashkhachus karqa chay chhikallatataj tantay. Chantá paykunawan pampapi maqanakusunchej, atipasunchejtaj, nispa. Ben Adad yuyaychasqankuta uyarispataj, kikinta ruwarqa.

²⁶ Chantá Ben Adadqa uj wataman jina Siria suyumanta soldadokunata tantaykuspa, Afec llajtaman rerqanku israelitakunawan maqanakoj.

²⁷ Israelitakunapis soldadonkukunata wakichillarqankutaj. Jinapi mikhunata apariykukuspa, siriokunawan maqanakoj purirerqanku. Siriamanta soldadokunaj ñawpaqenpi israelitakunaqa iskay tropa cabra jinalla jarakorqanku. Siriamanta soldadokunatajrí pampaman junt'aykorqanku.

²⁸ Chaypacha Diosmanta sut'inchajqa Israelpa kuraj kamachejninta nerqa: Tata Dios ajinata nin: Siriamanta kajkunaqa ninku: Tata Diosqa orqo cheqanejmanta Dioslla, manataj pampamanta Dioschu, nispa. Chayrayku kunanqa yanapasqayki atipanaykipaj chay chhika soldadokunata. Ajinapi yachanki noqa Tata Dios kasqayta, nispa.

²⁹ Qanchis p'unchayta chimpapura Israelmanta soldadokuna Siriamanta soldadokunawan jarasqa kasharqanku. Chantá qanchis kaj p'unchaypi maqanaku qallarerqa. Israelitakunarí chay p'unchay 100.000 Siriamanta soldadokunata wañuracherqanku.

³⁰ Wakin soldadokunataj Afec llajtaman ayqekorqanku. Chantá chay llajtaj perqanqa 27.000 soldadokunaj patankuman urmaykorqa. Ben Adadpis chay llajtaman ayqellarqataj, wasimanta wasi pakakuspataj, purerqa.

³¹ Chantá Ben Adadpa yanapajninkuna payta nerqanku: Noqaykoqa uyariyku Israelmanta kuraj kamachejkuna khuyakuyniyoj kasqankuta. Chayrayku kunanqa qhashqa p'achawan p'achallikunachej, kunkanchejmantaj waskhawan wataykukunachej. Jinaspataj, rinachej Israelpa kuraj kamachejninman. Ichapis mana wañuchiwasunmanchu, nispa.

³² Jinataj Ben Adadpa yanapajninkuna qhashqa p'achakunata p'achallikorqanku, kunkankumantaj waskhata watakorqanku. Chantá Israelpa kuraj kamachejninman qayllaykuspa, nerqanku: Kamachiyki Ben Adadqa nisunki: Ama wañuchiwaychu ari, nispa. Ajabtaj kuticherqa: Pay kawsashanrajchu? Payqa wawqey jina, nispa.

³³ Chay kachasqakuna chayta uyarispa, yuyarqanku allin kananta. Chayrayku usqhayllata nerqanku: Wawqeyki Ben Adadqa kawsashan, nispa. Ajabtaj nerqa: Riychej, pusamuychej, nispa. Chantá Ben Adadqa Ajabman chimparqa, paytaj carretanman Ben Adadta wicharicherqa.

³⁴ Ben Adadtaj payta nerqa: Tatay ima llajtakunatachus Israelmanta qhechusqa, chaykunata kutichipusqayki, nispa. Jinataj Damascopi qhatuna wasikunata ruwakuy, imaynatachus tataypis Samariapi ruwakorqa, ajinata, nispa. Ajabtaj kuticherqa: Noqataj kacharipusqayki trato ruwasqanchejman jina, nispa. Ajinata Ben Adadwan tratota ruwaytawan, kacharipullarqa.

³⁵ Chaykama wajnejpi Diosmanta uj sut'inchajqa sut'inchaj masinta nerqa: Maqaway, nispa. Paytajrí mana maqayta munarqachu.

³⁶ Chantá pay nerqa: Tata Diospa kamachisqanta mana kasusqaykirayku, uj león wañuchisonqa, nispa. Paymanta sut'inchaj masin karunchakusqantawantaj, uj león wañurparicherqa.

³⁷ Chantá chay Diosmanta chay sut'inchajqa uj runawanñataj tinkuspa, nerqa: Maqaway, nispa. Chay runataj sumajta maqarparerqa.

³⁸ Chantá Diosmanta sut'inchajqa kuraj kamachejta ñanpi suyaj rerqa. Mana pipis payta rejsinanpajtaj llikha thantawan ñawinta wataykorqa.

³⁹ Kuraj kamachej ñanta pasashajtintaj, Diosmanta sut'inchajqa jatunmanta qhaparispa, nerqa: Wiraqochiy noqa maqanakupi kasharqani. Jinallapi uj soldado uj presota apamuwaspa, niwarqa: Kay presota allinta qhawanki. Sichus ayqenman chayqa, qanmin wañuchisqa kanki, manachayrí 3.000 qolqeta paganki, nispa.

⁴⁰ Chantá noqa waj imakunata ruwanaykama presochasqa soldadoqa chinkapusqa, nispa. Ajinata Diosmanta chay sut'inchajqa kuraj kamachej Ajabman willarqa. Chantá kuraj kamachejqa nerqa: Qan kikiyki imatachus ruwanata rimarinki, rimarisqaykiman jinataj juchachasqa kanki, nispa.

⁴¹ Chaypachapacha Diosmanta sut'inchajqa, ñawinpi watasqa kasharqa, chay thantata phaskarakorqa, kuraj kamachejtaj Diosmanta sut'inchaj kasqanta rejsirparerqa.

⁴² Chantá Diosmanta sut'inchajqa nerqa: Tata Dios ajinata nisunki: Wañuchinapaj juchachasqa runata qan kacharisqaykirayku paypa cuentanmanta wañunki, aylluykiwantaj paypa ayllunmanta paganki, nispa.

⁴³ Israelmanta kuraj kamachejqa Diosmanta sut'inchajpa nisqanta uyariytawan, Samariapi wasinman llakisqa, phiñasqataj riporqa.