1 Reyes 2 - DIOSPA QHELQACHISQ

Davidpa qhepa kaj kamachisqan

¹ Davidpa wañupunan p'unchay qayllapiña kashajtin, Davidqa churin Salomonta kamacherqa:

² Kunanqa noqa wañupusaj, tukuypis wañunku jinata. Qantajrí kallpachakuy, qhari jinataj puriy.

³ Tata Diosniykej kamachisqanta junt'ay, munasqanman jina ruwaspa. Chantá Diospa tukuy kamachisqanta kasuypuni, imaynachus Moisespa kamachisqanpi qhelqasqa kasqanman jina, tukuy ima ruwasqaykipi, tukuy imata ruwaj churakusqaykipipis allin risunanpaj.

⁴ Ajinamanta Tata Diosqa tukuy ima niwasqanta junt'anqa. Pay niwarqa: Sichus churiykikuna allinta ruwaspa purenqanku, ñawpaqeypi cheqan kajta ruwaspa tukuy sonqonkuwan, tukuy yuyayninkuwantaj chayqa, mirayniykimanta kajqa kallanqapuni Israelpa kamachinan tiyanapi tiyakuspa, Israelta kamachinanpaj, nispa.

⁵ Qanqa yachankiña imatachus Seruyajpa churin Joabqa ruwawasqanta. Mana maqanaku kashajtinpis, payqa iskay kamachej soldadokunata wañucherqa: Nerpa churin Abnerta, Jeterpa churin Amasatawan ima. Chayta ruwasqa maqanakupi wañusqakunamanta vengakuspa, chaymantataj noqapis juchachasqa rikhurerqani paylla juchayoj kajtinpis.

⁶ Chayrayku qhawasqaykiman jina ruwanki, amataj allillanpi machuyaspa wañupojta saqenkichu.

⁷ Galaadmanta Barzilaypa churinkunatarí khuyarinki, wasiykipitaj mikhuchinki, imaraykuchus paykunaqa khuyawarqanku wawqeyki Absalonmanta ayqekushajtiy.

⁸ Chay jawaqa, qanllawantaj kashan Benjamín jatun ayllupi Bajurinmanta, Geraj churin Simey. Payqa chay jinatapuni qhenchachawarqa, noqa Majanayinman rishajtiy. Chantá payllataj Jordán mayuman taripamuwaj jamorqa, noqataj payman tilorqani Tata Diospa sutinrayku: Mana wañuchichisqaykichu, nispa.

⁹ Paytaqa amapuni khuyankichu, imaraykuchus qanqa sumaj yachayniyoj runa kanki, yachankitajchá paywan imatapis ruwayta, machuyaspa ama allin wañuypi wañunanpaj, nispa. Ajinata Davidqa Salomonta yuyaycharerqa.

David wañupun

¹⁰ Chantá Davidqa wañuporqa, tatankunaj aya p'ampananpitaj p'amparqanku, Davidpa llajtan nisqapi.

¹¹ Davidqa Israel suyupi tawa chunka watata kamacherqa: Qanchis watata Hebronpi, kinsa chunka kinsayoj watatataj Jerusalenpi.

¹² Salomonqa tatan Davidpa kamachinan tiyanapi tiyaykukorqa, paypa kamachiynintaj sinch'i sayasqa karqa.

Adoniasta wañuchinku

¹³ Uj kuti Davidpa ujnin warmin Jaguitpa churin Adoniasqa Salomonpa maman Betsabejpaman rerqa. Betsabetaj taporqa: Allin sonqowanchu jamushanki? nispa. Paytaj kuticherqa: Arí, allin sonqowan, nispa.

¹⁴ Chaymantataj nerqa: Ujta nisuyta munani, nispa. Betsabetaj nerqa: Nillaway, nispa.

¹⁵ Chantá Adonías nerqa: Qan yachanki jina, noqapuni kuraj kamachej kanay karqa, tukuy israelitakunataj noqa kamachinayta suyasharqanku. Chaywanpis kamachina tiyanaqa wawqey Salomonman qosqa karqa, imaraykuchus Tata Dios ajinata nerqa.

¹⁶ Kunantajrí ujllata mañakusuyta munani, amataj ama niwankichu, nispa. Betsabetaj nerqa: Parlallay, nispa.

¹⁷ Chantá Adoniasqa nerqa: Noqa mañakuyki kuraj kamachej Salomonman parlapunawaykita, Sunén llajtayoj Abisagwan casarachinawanta, imaraykuchus qantaqa uyarisonqapuni, nispa.

¹⁸ Betsabetaj nerqa: Walejlla, kuraj kamachejta noqa parlapayapusqayki, nispa.

¹⁹ Jinataj Betsabeqa kuraj kamachej Salomonpaman rerqa Adoniaspaj parlapayapoj. Kuraj kamachejqa mamanta rikuspa sayarikorqa, k'umuykuspataj, payta napaykorqa. Jinaytawantaj, kamachinan tiyanapi watej tiyaykukuspa, mamanpaj uj jatun tiyanata churachiporqa. Mamantaj kuraj kamachejpa paña ladonpi tiyaykuspa,

²⁰ payta nerqa: Qanmanta kaysituta mañakusuyta munayman. Ama mana niwankichu, nispa. Kuraj kamachejtaj payta nerqa: Mamáy, mañakullaway, mana, mana nisqaykichu, nispa.

²¹ Chantá Betsabé nerqa: Wawqeyki Adoniasta Sunén llajtayoj Abisagtawan casarachiy, nispa.

²² Salomonrí mamanman kuticherqa: Imaraykutaj Sunén llajtayoj Abisagta Adoniaspaj mañapunkiri? Kamachinay suyutapis paypajqa mañapullaytaj ari, pay kuraj wawqey kasqanrayku. Chantapis paywanña kashanku sacerdote Abiatar, chantá Seruyáj churin Joabpiwan, nispa.

²³ Chaymantataj kuraj kamachej Salomonqa Tata Diospa sutinrayku tilorqa: Sichus kayta mañachiwasqanmanta Adoniasta mana wañuchichinichu chayqa, Dios sinch'ita jasut'iwachun.

²⁴ Tata Diospa sutinrayku tilullanitaj, pichus tatay Davidpa kamachinan tiyanapi allinta tiyachiwan, mirayniytapis sumajta sayachenqa, chay Diosrayku: Adoniasqa kunanpacha wañuchisqa kanqa, nispa.

²⁵ Chantá kuraj kamachej Salomonqa Joyadáj churin Benaiasta kamacherqa Adoniasta wañuchimunanta. Paytaj rispa, Adoniasta wañurparicherqa.

²⁶ Chantá Salomonqa sacerdote Abiatarta kamachillarqataj: Anatot llajtaykiman ripuy. Qanqa wañuchisqa kanaykipaj jina kanki. Chaywanpis mana wañuchisqaykichu, Tukuyta Kamachej Tata Diospa trato ruwasqan arcata tatay Davidpa ñawpaqenta apasqaykirayku, chantapis tataywan khuska tukuy llakiyninpi purisqaykirayku, nispa.

²⁷ Ajinata Salomonqa Abiatarta Tata Diospa sacerdoten kasqanmanta wijch'orqa, jinamanta Tata Diospa nisqan junt'akunanpaj, Elíj ayllunmanta Silopi parlasqanman jina.

²⁸ Joabqa mana Absalonwan khuskachakusqachu Davidpa contranta oqharikusqanpi. Chaywanpis Adoniaswan khuskachakusqa Salomonpa contranta oqharikusqanpi. Chantá Adoniasta wañuchisqanmanta yachaspa, Joabqa Tata Diospa Toldonman ayqekuspa, chaypi altarpa wajranmanta jap'iykukorqa.

²⁹ Kuraj kamachej Salomonmantaj willarqanku Tata Diospa Toldonman Joab ayqekusqanta, altar chaynejpitaj kashasqanta. Chantá Salomonqa Joyadáj churin Benaiasta kacharqa, Joabta wañuchimunanpaj.

³⁰ Benaiasqa Tata Diospa Toldonman pationman yaykuspa, Joabta nerqa: Kuraj kamachej kamachisunki llojsimunaykita, nispa. Joabtajrí kuticherqa: Mana, kayllapi wañusaj, nispa. Chantá Benaiasqa kutispa, kuraj kamachejman Joab imatachus kutichisqanta willarqa.

³¹ Chantá kuraj kamachejqa Benaiasta nerqa: Ruway nisqanman jina, wañuchispataj, p'ampaykuy. Ajinamanta tataypa wasinmanta, ñawpaqeymantawan Joab mana juchayoj runakunata wañuchisqanmanta juchata chinkachinki.

³² Tata Diosmin runakunata wañuchisqanmanta jasut'enqa. Joabqa chay iskay runakunata wañucherqa, paymanta aswan sumaj cheqan kajkunata, tatay Davidpa mana yachasqallan: Nerpa churin Abnerta, pichus israelitakunaj soldadonkunata kamachejninku karqa, chayta. Wañuchillarqataj Jeterpa churin Amasatawan, pichus Judamanta soldadokunaj kamachejninku karqa, chaytawan.

³³ Chay ruwasqanmantaqa Joabwan mirayninkuna ima jasut'isqapuni kanqanku. Tata Diosmanta allin kawsaytajrí Davidpa ayllunwan, chantá kamachiyninpi wiñaypaj kallachunpuni, nispa.

³⁴ Chantá Joyadáj churin Benaiasqa rispa, Joabta wañucherqa. Ch'innejpitaj wasin, chaypi ayanta p'amparqanku.

³⁵ Kuraj kamachejtaj Joabpa cuentanmanta Joyadáj churin Benaiasta soldadokunata kamachinanpaj churarqa, sacerdote kananpajtaj Sadocta churarqa Abiatarpa cuentanmanta.

³⁶ Chaymanta kuraj kamachejqa Simeyta wajyachimuspa, nerqa: Uj wasita Jerusalenpi ruwakuy chaypi tiyakunaykipaj, chaymantataj ama maymanpis llojsinkichu.

³⁷ Sichus kaymanta llojsispa, Cedrón wayq'ota chimpawaj chayqa, wañuchisqapuni kanki, wañunaykipajqa qanlla juchayoj kanki, nispa.

³⁸ Simeytaj kuraj kamachejta nerqa: Niwasqaykeqa allinpuni. Imaynatachus wiraqochi kuraj kamachejniy kamachishawanki, ajinata ruwasaj, nispa. Ajinata Simeyqa unayta Jerusalenpi tiyakorqa.

³⁹ Kinsa wata qhepatataj Simeypa wata runankunamanta iskay ayqekusqanku, Macáj churin Gatmanta kuraj kamachej Aquispaman. Simeymantaj willarqanku: Wata runaykikunaqa Gatpi kashanku, nispa.

⁴⁰ Chantá Simeyqa burronta caronaykuspa, Gatmanta kuraj kamachej Aquispaman chayarqa, wata runankunata mask'aspa. Jinataj Simeyqa Gatmanta wata runankunata pusakaporqa.

⁴¹ Jinapi Salomonman willarqanku Simeyqa Jerusalenmanta Gatman risqanta, chaymantataj kutimusqantaña.

⁴² Chantá kuraj kamachejqa Simeyta wajyachimuspa, nerqa: Manachu Tata Diospa sutinrayku tiluchispa, nerqayki: Sichus kaymanta maymanpis llojsinki chayqa, wañuchisqa kanki? nispa. Qantaj niwarqanki: Niwasqaykeqa allin. Noqa kamachiyki kasusqayki, nispa.

⁴³ Imaraykutaj mana junt'arqankichu Tata Diosman tilusqaykita, noqaj nisqaytapis? nispa.

⁴⁴ Chantapis kuraj kamachejqa Simeyman nillarqataj: Qanqa sonqoykipi sumajta yachanki tukuy ima sajratachus tatay Davidpa contranpi ruwasqaykita. Kunanqa sajra ruwasqaykita Tata Dios qanpa pataykiman kutichimusunki.

⁴⁵ Tata Diosqa noqa kuraj kamachej Salomonta saminchawachun. Chantá kuraj kamachej Davidpa mirayninmanta pipis kallachunpuni Israelta wiñaypaj kamachinanpaj Tata Diospa ñawpaqenpi, nispa.

⁴⁶ Chantá Salomonqa Joyadáj churin Benaiasta kamacherqa, paytaj rispa, Simeyta wañucherqa. Chaymanta kamachinan suyoqa Salomonpa makinpi sumaj sayachisqa karqa.