1 Reyes 18 - DIOSPA QHELQACHISQ

Eliasqa Ajabwan parlan

¹ Kinsa watanman Tata Diosqa Eliasta nerqa: Ajabpa wasinman riy, imaraykuchus noqaqa ña parachimusajña, nispa.

² Chantá Eliasqa Ajabwan parlaj rerqa. Chaypacha Samariapi yarqhayqa anchañapuni karqa.

³ Chantá Ajabqa mayordomon Abdiasta wajyarqa. Abdiasqa maytapuni Tata Diosta tukuy respetowan yupaychaj.

⁴ Tata Diosmanta sut'inchajkunata Jezabel wañuchishajtin, Abdiasqa pachaj sut'inchajkunata, phishqa chunkamanta phishqa chunka, chhanka jusk'ukunaman pakaykamorqa. Chaypitaj paykunaman mikhunata, yakutawan qorqa.

⁵ Ajabtaj Abdiasta nerqa: Jaku rinachej, Israel suyuta purimusunchej tukuynin wayq'okunata, yaku juturikunatawan qhawaspa. Ichapis caballokunapaj, mulakunapajwan pastota tarisunman, manachayqa mana uywayoj qhepakusunchej, nispa.

⁶ Ajinata ari Israel suyuta purimunankupajqa iskayman t'aqakuspa, rerqanku: Ajabqa waj ñanta rerqa, Abdiaspis waj ñanta rillarqataj.

⁷ Abdiasqa ñanta rishaspa, Eliaswan tinkorqa. Eliasta rejserqapacha, pampaman k'umuykuspataj, taporqa: Manachu qanqa wiraqochiy Elías kanki? nispa.

⁸ Eliastaj kuticherqa: Noqa kani. Kaypi kashasqayta kuraj kamachejman willamuy, nispa.

⁹ Abdiastajrí kuticherqa: Imapitaj juchallikuni Ajabman jaywaykuspa, wañuchichinawaykipaj?

¹⁰ Tata Diospa sutinrayku tiluyki: Wiraqocheyqa tukuy suyupi mask'achisunki. Tukuypis ninku: Eliasqa mana kaypichu, nispa. Chay jawataj tukuy mask'asojkunata tilucherqa manapuni rikususqankuta.

¹¹ Kunanrí qan niwanki: Kaypi kashasqayta wiraqochiykiman willamuy, nispa.

¹² Noqa rejtiykamataj, Tata Diospa Espíritun mana yachasqay cheqaman pusasonqa. Noqa Ajabman willamojtiytaj, qanta mana taripasuspa, payqa wañuchiwanqa ari. Noqaqa juch'uymantapacha Tata Diosta kasuspa purikuni.

¹³ Wiraqochíy, Jezabel Tata Diosmanta sut'inchajkunata wañuchishajtin, imatachus ruwasqayta manachu pipis willasorqa? Noqa Diosmanta sut'inchajkunata pachajta, chhanka jusk'ukunapi phishqa chunkamanta phishqa chunka pakaykorqani, chaypitaj mikhunata, yakutawan qorqani.

¹⁴ Kunantaj qan nishawanki: Wiraqochiykiman willamuy kaypi kashasqayta, nispa, pay noqata wañuchinawanpaj, nispa.

¹⁵ Chantá Elías kuticherqa: Tukuy Atiyniyoj Tata Diospa ñawpaqenpi kashani, chaypa sutinrayku tiluyki: Kunanpacha Ajabwan parlasaj, nispa.

¹⁶ Chaymantataj Abdiasqa rispa, Ajabman chay tukuyta willamorqa, Ajabtaj Eliaswan parlaj jamorqa.

¹⁷ Ajabqa Eliasta rikuytawan, nerqa: Kaypi kasqankeqa. Qanrayku Israel suyoqa sinch'i llakiypi kashan, nispa.

¹⁸ Eliastajrí kuticherqa: Mana noqachu Israel suyuta sinch'i llakiyman churani. Aswanpis qanwan, tataykej ayllunwan Tata Diospa kamachisqanta saqerpayankichej, Baal nisqa lantita yupaychaspataj, Israel suyuta sinch'i llakiyman churankichej.

¹⁹ Kunanqa tukuynin israelitakunata Carmelo orqoman tantakamunankuta kamachiy. Wajyallaytaj Baalpa 450 sut'inchajninkunata, Aseraj 400 sut'inchajninkunatawan ima, pikunachus Jezabelpa mikhunanmanta mikhunku, chaykunata, nispa.

Eliasqa Baalta yupaychajkunawan tinkun

²⁰ Ajabqa tukuynin israelitakunata wajyacherqa, Carmelo orqopitaj Baalmanta sut'inchajkunata tantaykorqa.

²¹ Chantá Eliasqa tukuy runaman chimpaykuspa, nerqa: Mayk'ajkamataj iskayrayaspa kankichejri? Sichus Tata Diosqa cheqa kaj Dios kanman chayqa, payta qhatiychej. Baal cheqa kaj dios kajtinrí, paypa ruwananpi kaychej, nispa. Runakunatajrí mana imatapis kuticherqankuchu.

²² Chantá Eliasqa runakunata nillarqapuni: Tata Diosmanta sut'inchajqa noqalla qhepakuni, Baalmanta sut'inchajkunarí 450 kanku.

²³ Kunanqa kayman iskay torokunata aysamuwayku. Ujninta paykuna ajllakuchunku, ñak'aspataj, juch'uy juch'uyta khuchurachunku. Jinataj llant'a pataman churaspapis, ama ninata jap'ichichunkuchu. Chantá noqañataj chay ujnin torota ñak'aspa, llant'a pataman churallasajtaj. Noqapis ninata mana jap'ichillasajtajchu.

²⁴ Chaymantataj diosniykichejmanta mañakunkichej, noqapis Tata Diosmanta mañakullasajtaj. Mayqenchari ninata kachaykamonqa, chaymin cheqa kaj Dios kanqa, nispa. Tukuy runataj kuticherqanku: Chay nisqaykeqa sumaj, nispa.

²⁵ Chantá Eliasqa Baalpa sut'inchajninkunata nerqa: Qankuna ujnin kaj torota ajllakuspa, ñawpajta wakichiychej, ashkha kasqaykichejrayku. Chantá diosniykichejmanta mañakunkichej, amataj ninata jap'ichinkichejchu, nispa.

²⁶ Paykunaqa ujnin torota jap'iytawan, ñak'arqanku. Chantá chawpi p'unchaykama Baalmanta mañakorqanku: Baal, uyariwayku, nispa. Manataj ima parlayllapis uyarikorqachu, nitaj kutichejpis karqachu. Chaykama paykunaqa ruwasqanku altarpa muyuyninpi phinkiykachaspa tususharqanku.

²⁷ Chantá chawpi p'unchayta Eliasqa paykunamanta alqorakuspa jina nerqa: Aswan jatunmanta qhapariychej ari, imaraykuchus payqa dioschari. Ichá imata ruwashan, jisp'arikojchus rin, chayri ñan puriypichus kashan. Ichapis puñushan. Rijch'arichiychej ari, nispa.

²⁸ Paykunataj aswan jatunmanta qhaparerqanku, usunkuman jinataj cuchillokunawan, lanzakunawan, yawar pukalla kanankukama khuchurakorqanku.

²⁹ Chawpi p'unchaypis pasarqaña, paykunatajrí yuyay chinkasqa jina phinkiykachaspa aswan jatunmanta qhaparishallarqankupuni q'olachina phani chayamunankama. Chaywanpis mana ima parlayllapis uyarikorqachu, nitaj pipis kutichej nitaj uyarejpis karqachu.

³⁰ Chantá Eliasqa tukuy runata nerqa: Chimpamuychej noqaman, nispa. Tukuy runakuna payman chimpaykojtinkutaj, payqa, Tata Diospa altarnin urmasqa kasharqa, chayta allinchaykorqa.

³¹ Chantá Eliasqa chunka iskayniyoj rumikunata oqharerqa, Jacobpa churinkuna mashkhachus karqanku, chayman jina. Chay Jacobtaqa Tata Dios nisqa: Sutiykeqa Israel kanqa, nispa.

³² Chay rumikunawantaj uj altarta Tata Diospaj ruwarqa. Chay jawa altarpa muyuyninpi uj larq'ata allallarqataj, iskay chunka litro jina yaku yaykunanpaj.

³³ Chantá llant'ata altar pataman tawqaykorqa. Torota ñak'aspataj, juch'uy juch'uyta khuchuraspa, llant'a pataman churaykorqa.

³⁴ Chantá runakunata nerqa: Tawa p'uñu yakuwan jich'aykuychej q'olachina uywa ñak'asqaman, llant'a patamanpis, nispa. Nillarqataj: Ujtawan jinata ruwallaychejtaj, nispa. Paykunataj ujtawan jinata ruwallarqankutaj. Nillarqapuni: Ujtawanpis yakuwan jich'aykullaychejtaj, nispa. Paykunataj kinsa kutitawan altarman yakuta jich'aykorqanku.

³⁵ Ajinamanta yakoqa altarpa muyuyninta purirerqa. Larq'ata ruwarqa, chaymanpis junt'aykorqa.

³⁶ Chantá q'olachispa jaywana phani chayamojtenqa, Diosmanta sut'inchaj Eliasqa altarman chimpaykuspa, nerqa: Abrahampata, Isaacpata, Israelpatawan Tata Diosnin, kunan yachachunku qan israelitakunaj Tata Diosnin kasqaykita, noqataj kamachiyki kasqayta, qanpa kamachisqaykirayku tukuy imata ruwasqayta ima.

³⁷ Uyariway Tata Dios, uyariway ari, kay runakuna yachanankupaj qanlla Tata Dios kasqaykita, qanman kutirikuspa, yupaychasunankupaj, nispa.

³⁸ Jinallapi Tata Diosmanta nina urayk'amuspa, ujllata q'olaykorqa chay ñak'asqa torota, llant'ata, rumikunata, jallp'ata ima. Larq'api yakutapis ch'akirpayacherqa.

³⁹ Tukuy runataj chayta rikuytawan, qonqorikuspa pampakama k'umuykorqanku, qhaparerqankutaj: Tata Diosllamin Diosqa, Tata Diosllamin Diosqa, nispa.

⁴⁰ Chantá Eliasqa nerqa: Baalpa sut'inchajninkunata jap'iychej, amataj ujpis ayqechunchu, nispa. Chantá runakunaqa paykunata jap'erqanku, Eliastaj Cisón wayq'oman pusaspa, chaypi Baalpa sut'inchajninkunajpa umankuta qholurarqa.

Elías parananta mañakun

⁴¹ Chantá Eliasqa Ajabta nerqa: Riy, mikhumuy, ujyamuytaj, imaraykuchus paramunanpaj jinaña kashan, nispa.

⁴² Ajabqa mikhoj, ujyajtaj riporqa. Eliastajrí Carmelo orqoman wicharerqa. Chaypitaj qonqoriykukorqa, uyan moqonman chayanankama.

⁴³ Kamachinmantaj nerqa: Wicharispa, mama qochanejta qhawarimuy, nispa. Kamachintaj wicharispa qhawarerqa, kutimuspataj, nerqa: Mana imapis kanchu, nispa. Eliastaj qanchis kutita ajinallatapuni nerqa: Rispa, qhawarqamuy, nispa.

⁴⁴ Qanchis kaj kutipitaj kamachenqa nerqa: Uj juch'uy phuyuta rikuni, maki t'ajlluta jina, mama qochamanta llojsimojta, nispa. Chantá Eliasqa nerqa: Rispa, Ajabman nimuy: Carretaykiman yaykuspa usqhayta ripuy, ñanpi ama para jark'asunanpaj, nispa.

⁴⁵ Jinallapi phuyu laqhayaykamorqa, wayrataj wayramorqa, chantá paraqa sinch'ita jich'akamorqa. Ajabtaj carretanman wichariytawan, Jezrelman riporqa.

⁴⁶ Chaypacha Eliasqa p'achanta sumajta chumpiykukuytawan, Jezrel llajtaman phawaspa, Ajabmanta aswan ñawpajta chayarqa, Tata Dios kallpata qosqanrayku.