1 Reyes 17 - DIOSPA QHELQACHISQ

Elías ch'aki wata kananta sut'inchan

¹ Diosmanta sut'inchaj Eliasqa Galaad jap'iypi Tisbé llajtayoj karqa. Uj kuti payqa kuraj kamachej Ajabta nimorqa: Israelpa Tata Diosninpa sutinpi, pejpa kamachinpichus noqa kashani, chaypa sutinpi niyki: Mana kay jamoj watakunapi paramonqachu nitaj chhullamonqachu, noqa ujtawan ninaykama, nispa.

² Chantá Tata Dios Eliasta nerqa:

³ Ripuy kaymanta. Inti llojsimoj ladoman, Jordán mayu chimpaman, Querit wayq'omantaj pakaykakamuy.

⁴ Chay wayq'omanta yakuta ujyanki, mikhunkitaj imatachus noqa churapusqayki, chayta, imaraykuchus qharqañakunata kamachiniña mikhuchisunankupaj, nispa.

⁵ Eliasqa Tata Diospa kamachisqanta kasuspa, Jordán mayu chimpanejpi, Querit wayq'opi tiyakamorqa.

⁶ Qharqañakunataj sapa paqarin, ch'isintawan t'antata, aychatawan apaj kanku. Chay wayq'omantataj Eliasqa yakuta ujyarqa.

⁷ Chaywanpis mana unayninmanchu chay wayq'opi yakoqa ch'akiporqa, mana paramusqanrayku.

Elías warmisapaj wasinpi mikhun

⁸ Chaymantaqa Tata Dios Eliasta nerqa:

⁹ Sidón suyupi Sarepta llajtaman ripuy chaypi tiyakamunaykipaj. Noqaqa uj warmisapata niniña qanta mikhuchisunanta, nispa.

¹⁰ Jinataj Eliasqa Sarepta llajtaman riporqa. Llajta punkuman chayaspataj, uj warmisapata llant'ata pallakushajta rikorqa. Jinapi Eliasqa payta wajyaspa, nerqa: Ama jinachu kay, uj vaso yakuta qoriway, nispa.

¹¹ Chay warmi apamunanpaj rishajtinña, Elías watejmanta nillarqataj: Ama jinachu kay, uj chhikan t'antatawan aparimpuway, nispa.

¹² Chay warmisapatajrí kuticherqa: Tata Diosniykipis yachan, mana t'antay kanchu. Wich'ipi uj chhika jak'ulla tiyapuwan, yurupi uj chhika aceitewan ima. Kunanqa uj chhika llant'ata pallakusharqani wawaypaj, noqapajwan chayta chayarqochinaypaj. Chantá mikhuyta tukuytawan, chaymantaqa yarqhaymanta wañupusqaykupischari, nispa.

¹³ Chantá Elías nerqa: Ama llakikuychu. Rispa, nisqaykiman jina ruwamullay. Chaywanpis ñawpajta uj t'antata ruwaytawan, noqapajraj apamuway. Chantá wawaykipaj, qanpajpis ruwallanki.

¹⁴ Israelpa Tata Diosnin kay jinata nin: Wich'ipi jak'oqa, yurupi aceitepis mana tukukonqachu, noqa parachimunaykama, nispa.

¹⁵ Chantá chay warmisapaqa rispa, Elías nisqanman jina ruwamorqa. Chantá Eliaspaj, warmisapapaj, wawanpaj ima unaypaj mikhuna karqa.

¹⁶ Tata Dios Eliasnejta nisqanman jina, wich'ipi jak'oqa mana tukukusqachu, yurupi aceitepis mana pisiyasqachu.

¹⁷ Chaymanta aswan qhepamanqa warmisapaj wawan anchatapuni onqoykuspa, wañuporqa.

¹⁸ Warmisapataj Eliasta nerqa: Diospa kamachin, imanaykitaj noqa qantari? Juchaymanta sut'inchajchu jamuwarqanki, chaymanta wawaypis wañunanpajri? nispa.

¹⁹ Chantá Elías nerqa: Wawaykita apamuway, nispa. Eliastaj mamanpa marq'ayninmanta wawata jap'ispa, altopata wasi puñunanman siriykucherqa.

²⁰ Chantá Tata Diosmanta mañakuspa, nerqa: Tata Diosníy, kay warmisapaj wasinpi tiyakushajtiy, payta llakichinkichu wawanta wañuchispa? nispa.

²¹ Jinaspataj, Eliasqa chay wawaj patanman kinsa kutita winkuykorqa, Tata Diosmanta mañakuspataj, nerqa: Tata Diosníy, mañakuyki kay wawata kawsarichinaykita, nispa.

²² Chantá Tata Diosqa Eliaspa mañakusqanta uyarispa, chay wawata kawsaricherqa.

²³ Chaymanta Eliasqa chay wawata urayk'uchispa, mamanman jaywaporqa: Kayqa, wawaykeqa kawsashan, nispa.

²⁴ Chantá chay warmeqa Eliasta nerqa: Kunanqa yachani qanqa cheqatapuni Diospa kamachiyninpi kasqaykita, parlasqaykipis Tata Diospa nisqan kasqanta, nispa.