1 Reyes 16 - DIOSPA QHELQACHISQ

¹ Tata Diosqa Jananíj churin Jehuman parlarqa Basáj contranta ninanpaj:

² Qan ni pejpa kasu ruwanan kashajtiyki, noqa Israel aylluyta kamachinaykipaj churarqayki. Qantajrí Jeroboán jina juchallerqanki, Israel aylluytataj juchallichinki. Chay juchaykiwantaj noqata phiñachiwanki.

³ Chayrayku qanta, aylluykitawan chinkachisqaykichej, mirayniykitataj Nabatpa churin Jeroboanpata jina ruwasaj.

⁴ Aylluykimanta llajtapi wañojkunataqa alqokuna mikhonqanku, campopi wañojkunatataj suwintukuna mikhonqanku, nispa.

⁵ Basá kamachishaspa wakin ruwasqan, tukuy ima ruwasqanpiwan, qhelqasqa kashan Israel suyumanta kuraj kamachejkunaj ruwasqankumanta willaj qhelqapi.

⁶ Basá wañupojtintaj, Tirsapi ayanta p'amparqanku, paypa qhepantataj churin Elá kamacherqa.

⁷ Tata Diosqa Jananíj churin Diosmanta sut'inchaj Jehunejta parlarqa, Basáj chantá ayllunpa contranpiwan, mana Tata Diospa munayninman jina ruwasqankurayku. Basaqa Tata Diosta phiñacherqa Jeroboanpa ayllun jina mana allinta ruwaspa. Chayrayku Diosqa Jeroboanpa ayllunta jina Basáj ayllunta tukucherqa.

Elawan, Zimriwan Israel suyuta kamachinku

⁸ Judapi kuraj kamachej Asa iskay chunka sojtayoj watataña kamachishajtin, Basáj churin Elaqa Israelpi kamachiyta qallarerqa. Paytaj iskay watata Tirsapi kamacherqa.

⁹ Chaywanpis Zimriqa, pichus kuraj kamachejpa maqanaku carretankunamanta khuskanninta kamachej karqa, chay runaqa Eláj contranta oqharikorqa. Uj kuti Elaqa Tirsapi mayordomon Arsaj wasinpi ujyaspa machaykorqa.

¹⁰ Chantá Zimriqa ujllata yaykuspa, payta wañurparicherqa. Judá suyupi kuraj kamachej Asa iskay chunka qanchisniyoj watataña kamachishajtin, Zimriqa Eláj qhepanta kamachiyta qallarerqa.

¹¹ Zimriqa kamachiyta qallariytawankama, Basáj tukuynin ayllunta wañurachicherqa, manataj ni uj qharillapis, wawqe masillanpis, ni kawsaqenpis qhepakorqachu.

¹² Ajinata Zimriqa Basáj tukuy ayllunta tukucherqa, imaynatachus Tata Diosqa Jehunejta Basajpa ayllunpa contranpi parlasqanman jina.

¹³ Ajinata Tata Diosqa Basata chantá churin Elata tukucherqa paykunaj juchallisqankurayku, chantá israelitakunata juchallichisqankurayku ima. Lantikunata yupaychasqankuwan Israelpa Tata Diosninta mayta phiñachisqanku.

¹⁴ Elá kamachishaspa wakin ruwasqan, tukuy ima ruwasqanpiwan, qhelqasqa kashan Israel suyumanta kuraj kamachejkunaj ruwasqankumanta willaj qhelqapi.

¹⁵ Judá suyupi Asa iskay chunka qanchisniyoj watataña kamachishajtin, Zimriqa Tirsapi Israelta kamachiyta qallarerqa. Chaywanpis chaypi pay qanchis p'unchayllata kamacherqa. Chaykamataj Israelmanta soldadokunaqa filisteokunaj llajtanku Gibetonpa contranpi muyuykuspa kasharqanku.

¹⁶ Chay soldadokunaqa uyarerqanku Zimri oqharikuspa, kuraj kamachej Elata wañuchisqanta. Chantá Israelmanta soldadokunaqa chay kikinpacha Omrita churarqanku Israel suyupi kamachinanpaj. Payqa soldadokunaj kamachejninku karqa.

¹⁷ Omritaj tukuynin israelitakunawan Gibetonmanta llojsimuspa, Tirsata muyuykorqanku maqanakunankupaj.

¹⁸ Jinapi Zimriqa llajtata jap'iykusqankuta rikuspa, kamachinan wasiman yaykuykuspa, wasiman ninata jap'iykucherqa, chaypitaj pay wañorqa.

¹⁹ Zimriqa mana Tata Diospa munayninman jinachu ruwasqa, astawanpis Jeroboán jina juchallisqa. Israelitakunatapis juchallichillasqataj, chayrayku payqa ajinata wañorqa.

²⁰ Zimri kamachishaspa wakin ruwasqan, tukuy ima ruwasqanpiwan, qhelqasqa kashan Israel suyumanta kuraj kamachejkunaj ruwasqankumanta willaj qhelqapi.

Omri Israel suyuta kamachin

²¹ Chantá israelitakunaqa iskay yuyayniyoj karqanku. Wakinkuna Ginatpa churin Tibnita kuraj kamachejta churayta munarqanku, wakintaj Omrita.

²² Omrita qhatejkunarí atiparqanku Ginatpa churin Tibnita qhatejkunata. Chantá Tibnita wañucherqanku, Omritataj kuraj kamachej kananpaj churarqanku.

²³ Judá suyumanta kuraj kamachej Asa kinsa chunka ujniyoj watataña kamachishajtin, Omriqa Israel suyupi kamachiyta qallarerqa, chunka iskayniyoj watatataj kamacherqa. Chay chunka iskayniyoj watamanta sojta watata Tirsapi kamacherqa.

²⁴ Omritaj Semer sutiyoj runamanta Samariapi orqota sojta chunka sojtayoj kilo qolqe metalwan ranterqa. Chaypitaj Samaria sutiyoj llajtata jataricherqa, chay orqoj ñawpa dueñon Semer sutiyoj kasqanrayku.

²⁵ Omriqa mana Tata Diospa munayninman jinachu ruwarqa, manachayqa, paymanta ñawpajta kamacherqanku, chaykunamanta nisqaqa astawanraj juchallerqa.

²⁶ Nabatpa churin Jeroboanpa ruwasqan kikin juchata ruwarqa, chayllawantaj israelitakunatapis juchallicherqa. Lantikunata yupaychaspa, Israelpa Tata Diosninta phiñacherqa.

²⁷ Omri kamachishaspa wakin ruwasqan, tukuy ima ruwasqanpiwan qhelqasqa kashan Israel suyumanta kuraj kamachejkunaj ruwasqankumanta willaj qhelqapi.

²⁸ Omri wañojtintaj, Samariapi ayanta p'amparqanku, paypa qhepantataj churin Ajab sutiyoj kamacherqa.

Ajab Israel suyuta kamachin

²⁹ Judá suyupi kuraj kamachej Asa kinsa chunka pusajniyoj watataña kamachishajtin, Omrij churin Ajabqa Israelpi kamachiyta qallarerqa. Payqa Israel suyuta Samariapi iskay chunka iskayniyoj watata kamacherqa.

³⁰ Omrij churin Ajabqa manapuni Tata Diospa munayninman jinachu ruwarqa. Paymanta ñawpajta kamacherqanku, chaykunamanta nisqaqa astawanraj juchallerqa.

³¹ Payqa Nabatpa churin Jeroboanpa jucha ruwasqanmantapis astawanraj juchallerqa. Casarakorqataj sidoniokunaj kuraj kamachejninku Etbaalpa ususin Jezabelwan. Chantá manaraj imapi Baal lantita yupaycharqa.

³² Baal sutiyoj lantipaj uj altarta, yupaychana wasitawan Samaria llajtapi ruwachiporqa.

³³ Ajabqa Asera nisqa lantitapis ruwachillarqataj. Paymanta ñawpajta kamacherqanku, chaykunamanta nisqaqa aswan millaytapuni ruwarqa, ajinata ruwaspataj, Israelpa Tata Diosninta mayta phiñacherqa.

³⁴ Ajab kamachishajtin, Betelmanta Jielqa Jericó llajtata watejmanta jataricherqa. Chay llajtata jatarichiyta qallarishajtin, kuraj kaj churin Abirán wañorqa. Llajtaj punkunta churashajtintaj, sullk'a kaj churin Segub wañullarqataj. Ajinata Nunpa churin Josuenejta Tata Diospa nisqan junt'akorqa.