Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Reyes 14 - DIOSPA QHELQACHISQ


Ajiasqa Jeroboanpa contranta parlan

1 Chaypachallataj Jeroboanpa churin Abías onqoykorqa.

2 Chantá Jeroboanqa warminta nerqa: Diosmanta sut'inchaj Ajiasqa Silopi tiyakun, pichus noqata niwarqa kay llajtaj kuraj kamachejnin kanayta. Silo llajtaman riy, uj jina p'achata churaykukuspa, ama pipis rejsisunankupaj noqaj warmiy kasqaykita.

3 Chunka t'antata, wakin tortillakunatawan, uj yuritupi abeja misk'itawan apapuy. Paywan tinkuspataj, tapukuy imaynachus kay wawanchej kananmanta, nispa.

4 Jeroboanpa warmenqa kikinta ruwaspa, Siloman Ajiaspa wasinman rerqa. Ajiasqa manaña rikuyta aterqachu, machu runaña kasqanrayku, ñawenqa chharpuña karqa.

5 Tata Diostajrí ñapis Ajiasta nisqaña: Kunanqa Jeroboanpa warmin jamusonqa uj jinamanta p'achallisqa, churin onqosqa kasqanmanta tapukusoj. Qantajrí kay jinata ninki, nispa.

6 Punkuta warmi yaykumushajtin, thaskisqanta uyarispa, Ajías nerqa: Jeroboanpa warmin, yaykumuy. Imaraykutaj uj jinaman tukuspa jamunkiri? Jatun llakiyta willasunayta Tata Dios niwan.

7 Kutispa, willamuy Jeroboanman: Israelitakunaj Tata Diosnenqa ajinata nin: Noqaqa runakunaj chawpinmanta oqharerqayki, churarqaykitaj Israel aylluyta kamachinaykipaj.

8 Davidpa ayllunmanta qhechuspa, qanman qorqayki. Qantajrí mana kamachiy David jinachu kanki. Payqa tukuy kamachisqayta kasuspa, tukuy sonqowan noqaj ñawpaqeypi cheqanta ruwaspa purerqa.

9 Qanmanta ñawpaj kaj kuraj kamachejkunamanta nisqaqa aswan sajra kajllatapuni ruwarqanki. Jinallataj metalmanta waj dioskunata, lantikunatawan ruwakuspa, wasanchawarqanki.

10 Chayrayku kunanqa aylluykita ñak'arichisaj. Mirayniykimanta tukuynin qharikunata tukuy Israel suyupi q'opata jina chinkachisaj.

11 Jeroboanpa ayllunmanta llajtapi wañojtinku ayankuta alqokuna mikhonqanku, campopi wañojkunatataj suwintukuna mikhonqanku, imaraykuchus ajinata nin Tata Diosqa, nispa.

12 Chantá Ajiasqa Jeroboanpa warminman nillarqataj: Qanrí, ripuy wasiykiman. Llajtaman yaykojtiykikama, wawayki wañuponqa.

13 Chantá tukuynin israelitakuna waqaspa, ayanta p'ampanqanku. Jeroboanpa ayllunmantaqa paylla Tata Diospa ñawpaqenpi allinpaj qhawarisqa karqa. Chayrayku pay sapallan p'ampasqa kanqa.

14 Tata Diosqa Israel suyupi waj kuraj kamachejta churanqa, paytaj Jeroboanpa ayllunta chinkachenqa. Chayta kunanpacha ruwanqa.

15 Imaynatachus t'uturata purej yaku thalarin, ajinata Tata Diosqa israelitakunata thalarparenqa. Payllataj israelitakunata wijch'onqa, kay chhika sumaj jallp'ata tatankuman qorqa, chaymanta. Éufrates mayumantapis aswan jaqaymanraj paykunata wijch'onqa, k'ullumanta Asera lantikunata ruwakuspa, Tata Diosta wasanchasqankurayku.

16 Tata Diosqa Jeroboán juchallisqanrayku chantá israelitakunata juchallichisqanrayku ima Israel suyuta ch'eqerachenqa, nispa.

17 Chantá Jeroboanpa warmenqa Tirsa llajtaman riporqa. Wasinman yaykushajtintaj, churin wañuporqa.

18 Tukuynin israelitakunataj waqaspa, wawaj ayanta p'amparqanku, Diosmanta sut'inchaj Ajiasnejta Tata Dios nisqanman jina.

19 Jeroboán kamachishaspa wakin ruwasqan, waj suyukunawan maqanakusqan, kamachisqan imaqa, Israel suyumanta kuraj kamachejkunaj ruwasqankumanta willaj qhelqapi qhelqasqa kashan.

20 Jeroboanqa iskay chunka iskayniyoj watata Israel suyupi kamacherqa, wañupojtintaj, churin Nadab cuentamanta kamacherqa.


Roboán Judá suyuta kamachin
( 2 Cr 12.1-16 )

21 Chaykama Salomonpa churin Roboanqa Judá suyupi kamachisharqa. Kamachiyta qallarishaspa, Roboanqa tawa chunka ujniyoj watayoj karqa, Jerusalenmantapachataj chunka qanchisniyoj watata kamacherqa. Chay llajtata Tata Diosqa Israelpa tukuynin llajtamanta ajllakorqa, chaypi sutin yupaychasqa kananpaj. Roboanpa mamanqa Amón suyumanta Noamá sutiyoj karqa.

22 Judá suyumanta kajkunaqa Tata Diospa ñawpaqenpi mana allintachu ruwarqanku, sinch'itataj payta phiñacherqanku. Ñawpa tatankoj juchallisqankumantapis astawanraj juchallerqanku.

23 Paykunaqa loma patapi altarkunata ruwarqanku. Chantá Asera lantikunata tukuynej orqo patapi, jatuchaj thansa sach'a urapipis sayachillarqankupuni.

24 Tukuy suyupi chay lantikunata yupaychana wasikunapi khuchichakoj qharikuna kallarqataj. Chantapis Tata Diosqa israelitakunaj ñawpaqenkumanta wijch'orqa, chaykunaj millay ruwasqankuta paykunapis ruwallarqankutaj.

25 Chaypacha Roboán phishqa watata kamachisqanmantaña, Egiptomanta kuraj kamachej Sisac sutiyoj Jerusalenpa contranpi maqanakoj jamorqa.

26 Chantá ima valorniyoj imakunachus Tata Diospa Templonpi, jinataj Roboanpa kamachinan wasipi ima waqaychasqa karqa, chay tukuyta jap'ispa, apakaporqa. Salomón qori purumanta escudokunata ruwachisqa, chaytapis apakapullarqankutaj.

27 Kuraj kamachej Roboantaj qorimanta karqa, chay escudokunaj cuentanpi broncemanta escudokunata ruwacherqa, kamachina wasita qhawaj soldadokunamantaj jaywarqa paykuna jallch'anankupaj.

28 Tata Diospa Templonman kuraj kamachej sapa kuti rejtin, soldadokunaqa chay escudokunata apaj kanku, chaymantataj qhawajkuna soldadokunaj wasinkuman saqej kanku.

29 Roboán kamachishaspa wakin ruwasqan, tukuy ima ruwasqanpiwan, qhelqasqa kashan Judá suyumanta kuraj kamachejkunaj ruwasqankumanta willaj qhelqapi.

30 Roboanwan, Jeroboanwanqa tukuy tiempo maqanakuspallapuni karqanku.

31 Roboán wañupojtintaj, ayantaqa p'amparqanku jatun tatan Davidpa llajtan nisqapi. Mamanqa Amonmanta Noamá sutiyoj karqa. Roboán wañupojtintaj, qhepanta churin Abián kamacherqa.

Revisión Biblia Quechua Boliviano © Sociedad Bíblica Boliviana, 2017.

Bolivian Bible Society
ကြှနျုပျတို့နောကျလိုကျပါ:



ကြော်ငြာတွေ