1 Reyes 11 - DIOSPA QHELQACHISQ

Salomón lantikunata yupaychan

¹ Kuraj kamachej Salomonqa faraonpa ususin warmin kashajtinpis, waj llajtayoj ashkha warmikunawan casarakorqa: Amonitakunamanta, moabitakunamanta, edomitakunamanta, sidoniokunamanta, jititakunamanta kajkunawan ima.

² Chay runakunamanta Tata Diosqa israelitakunaman nisqa: Ama paykunawanqa casarakunkichejchu, nitaj paykunapis qankunawan casarachunkuchu, imaraykuchus paykuna diosninkukunaman sonqoykichejta aysasonqachej, nispa. Chaywanpis Salomonqa chay waj llajtayoj warmikunawan casaraykorqa paykunata munakusqanrayku.

³ Tukuyninpi warminkunaqa 700 karqanku, waj warminkunataj 300. Chay warminkunataj paypa sonqonta Tata Diosmanta karunchacherqanku.

⁴ Salomón machu runaña kashajtin, warminkunaqa waj dioskunaman sonqonta kutiricherqanku. Ajinamanta payqa mana tatan David jinachu tukuy sonqowan Tata Diosta qhatikorqa.

⁵ Salomonqa sidoniokunaj diosninku Astoretta, amonitakunaj chay millay lantinku Milcontawan yupaycharqa.

⁶ Ajinamanta Salomonqa sajratapuni ruwarqa Tata Diospa ñawpaqenpi, manataj tatan David jinachu tukuy sonqowan Tata Diosta qhatikorqa.

⁷ Chantá Salomonqa Moabpa millay lantin Quemospaj uj altarta Jerusalenpa chimpan orqopi ruwacherqa. Amonitakunaj chay millay lantinku Molocpajpis altarta ruwachillarqataj.

⁸ Ajinallatataj chay tukuy waj llajtayoj warminkunapajpis altarkunata ruwachiporqa. Paykunataj chay altarkunapi inciensota q'oshñichispa, uywa ñak'asqatawan diosninkukunaman jaywaj kanku.

⁹ Chayrayku Tata Diosqa Salomonpaj phiñakorqa, paypa sonqon israelitakunaj Tata Diosninkumanta karunchakusqanrayku, pichus payman iskay kutita rikhurisqa, chaymanta.

¹⁰ Astawanpis Tata Dios kamachisqa waj dioskunata yupaychaspa ama purinanta, Salomontajrí mana kasorqachu.

¹¹ Chayrayku Tata Diosqa Salomonta nerqa: Mana allinta ruwasqaykirayku, kamachisqaytapis mana kasusqaykirayku, kamachishanki chay suyuta qhechususpa, ujnin kamachiykiman qopusaj.

¹² Chaywanpis mana qan kawsashajtiykichu chayta ruwasaj, tatayki Davidta munakusqayrayku. Churiykimanta qhechusaj,

¹³ mana tukuynin suyutachu. Uj ayllullata paykunaman saqepusaj, kamachiy Davidta munakusqayrayku, Jerusalén llajtata ajllakusqayraykutaj, nispa.

¹⁴ Jinataj Tata Diosqa uj awqata Salomonpa contranpi jataricherqa Hadad sutiyojta. Payqa Edommanta kuraj kamachejpa mirayninmanta karqa.

¹⁵ David kawsashasparaj, Edom llajtayojkunata maqanakupi atipaykusqa. Chantá soldadonkunaj kurajninku Joabqa wañusqakunata p'ampaj risqa. Chaypacha Edommanta tukuynin qharikunata wañuchisqanku.

¹⁶ Joabqa tukuynin israelitakunawan sojta killata Edompi tiyakusqanku, Edom llajtayoj qharikunata tukuchinankukama.

¹⁷ Chaywanpis edomita Hadadqa juch'uyllaraj kashajtin, tatanpa wakin kamachinkunawan Egiptoman ayqekusqa.

¹⁸ Madianmanta llojsispataj, Paranman chayasqanku, chaymanta runakunata kamachinkupaj jap'ispataj, paykunawan Egiptoman ripusqanku. Chantá kuraj kamachej faraonpaman risqanku, paytaj wasita, mikhunata, llank'ana jallp'akunatawan qosqa.

¹⁹ Hadadqa faraonwan mayta munachikorqa, paytaj Hadadta cuñadanwan casaracherqa, Tapenespa ñañanwan.

²⁰ Tapenespa ñañantaj Hadadpaj uj wawata paqarichikorqa, suticharqataj Genubat sutiwan. Chay wawa januk'asqa kajtin, faraonpa kamachinan wasipi uywasqa karqa, faraonpa wawankunawan khuska.

²¹ Chantá Hadad Egiptopi kashaspa, David wañupusqanta, soldadokunaj kurajninku Joabpis wañusqanta yacharqa. Chayrayku Hadadqa faraonta nerqa: Llajtayman kutipuyta munayman, nispa.

²² Faraontajrí kuticherqa: Imaraykutaj llajtaykiman ripuyta munankiri? Imamantataj kaypi pisichiykiri? nispa. Hadadtaj nerqa: Mana imapis pisiwanchu. Chaywanpis mañakuyki kutipojta saqenawaykita, nispa.

²³ Diosqa Salomonpa contranpi Eliadaj churin Rezón sutiyojta jatarichillarqataj. Payqa Soba suyumanta kuraj kamachej Hadad Ezerpa kamachin kashaspa ayqesqa.

²⁴ Rezonqa suwakunata tantaykusqa, chantá paykunaj kamachejninkutaj kasqa. Maypachachus David Sobamanta kajkunata atipaykusqa chaypacha, Rezonqa Damasco llajtaman tiyakapoj ripusqa. Paykunataj kuraj kamachejninkupaj churasqanku.

²⁵ Salomón kawsanankama Rezonqa Israelpa contranpi karqa. Siriata kuraj kamachej Hadadwan khuska Salomonta mana allintachu ruwarqa.

²⁶ Efraín ayllumanta Seredá llajtamanta, Nabatpa churin Jeroboanpis kuraj kamachejpa contranpi oqharikullarqataj. Payqa Salomonpa yanapajnin karqa, mamantaj uj warmisapa Serúa sutiyoj karqa.

²⁷ Pay kuraj kamachejpa contranpi oqharikunanpaj kay karqa: Salomonqa Milopi tatan Davidpa llajtanpa inti llojsimoj cheqanejpi wayq'ota jallp'awan junt'achisharqa, perqantataj oqharichisharqa.

²⁸ Jeroboán sumaj kallpayoj wapu runa kasqanta chantá sumaj k'uchi kasqanta ima rikuspa, Salomonqa payta churarqa Joséj mirayninmanta jatun ayllumanta mit'api ruwajkunata qhawananpaj.

²⁹ Jinataj uj kuti Jeroboanqa Jerusalenmanta jamushaspa, Silomanta Diosmanta sut'inchaj Ajiaswan tinkukorqa. Ajiasqa mosoj poncho jina qhatanawan churaykusqa kasharqa. Paykunataj iskaynillanku campopi kasharqanku.

³⁰ Chantá Ajiasqa chay mosoj ponchota jina qhatananta jap'ispa, chunka iskayniyojman k'uturarqa.

³¹ Jeroboantataj nerqa: Kay k'utusqaymanta chunkata jap'ikuy. Israelitakunaj Tata Diosnin kay jinata nisunki: Noqa Salomonpa kamachiynin suyuta qhechusaj, qanmantaj chunka jatun ayllukunata qosqayki.

³² Paytaj uj jatun ayllullawan qhepakonqa, kamachiy Davidta, Jerusalentawan munakusqayrayku, mayqentachus tukuynin Israel ayllukunamanta ajllakorqani, chay.

³³ Chayta ruwasaj, imaraykuchus Salomonqa noqata saqerpariwaspa, yupaychan sidonioj diosninku Astoretta, Moabpa diosnin Quemosta, amonitakunaj diosninku Moloctawan ima. Paypa ruwasqanqa mana sonqoypa munasqanman jinachu, kamachisqayta mana kasuwarqachu, nitaj nisqayta cheqanta ruwarqachu, imaynatachus tatan David junt'arqa, jinataqa.

³⁴ Chaywanpis paymanta mana tukuynin suyutachu qhechusaj. Aswanpis kawsanankama kamachinanta saqellasaj, kamachiy Davidta munakusqayrayku. Payta ajllakorqani, paytaj kamachisqayta, nisqaytawan kasuspa junt'arqa.

³⁵ Salomonpa churinmanta kamachinan suyutaqa qhechusaj, qanmantaj chunka jatun aylluyta qosqayki.

³⁶ Salomonpa churinmantajrí uj jatun ayllullata qosaj, kamachiy Davidpa ayllunmanta Jerusalenpi uj kuraj kamachej kanallanpajpuni, chay llajtata noqa ajllakorqani, chaypi sutiy yupaychasqa kananpaj.

³⁷ Noqataj qanta kamachinaykipaj churasqayki, munasqaykiman jina kamachinaykipaj, qantaj tukuy Israel suyupi kuraj kamachej kanki.

³⁸ Sichus kay tukuy kamachisusqayta uyariwanki, munasqayman jinataj purinki, cheqanta ruwaspa, kamachisqayta, nisqaytawan kasuspa, kamachiy David junt'arqa jinata chayqa, noqaqa qanwan kasaj. Aylluykimanta kuraj kamachejkunaqa kanqankupuni, imaynachus Davidpa ayllunmanta kanku ajinata, Israel suyutataj qanman jaywasqayki.

³⁹ Chayrayku noqaqa Davidpa mirayninta ñak'arichisaj, jinapis mana wiñaypajchu, nispa. Ajinata Tata Dios Ajiasnejta nerqa.

⁴⁰ Chaynejta Salomonqa Jeroboanta wañuchiyta munarqa. Chantá Jeroboanqa Egiptoman ayqekorqa, kuraj kamachej Sisacpaman, chaypitaj Salomón wañupunankama qhepakorqa.

Salomón wañupun

^41-42 Salomonqa Jerusalenpi tawa chunka kinsayoj watata Israel suyuta kamacherqa. Chantá tukuy ruwasqan, yachayninpis Salomonpa ruwasqanmanta willaj qhelqapi qhelqasqa kashan.

⁴³ Salomón wañupojtintaj, tatan Davidpa llajtan nisqapi ayanta p'amparqanku, qhepantataj churin Roboán kamacherqa.