1 Reyes 10 - DIOSPA QHELQACHISQ

Sabamanta qoyaqa Salomonta watukun

¹ Salomonqa manchay uyarisqa karqa Tata Dios yachayta qosqanrayku. Chayta uyarispa, Sabá suyumanta qoyaqa mana kutichiy atina tapuykunawan jamorqa.

² Payqa Jerusalenman ashkha runanwan chayamorqa. Camellokunapi chajnaykuspa, sumaj q'apashaj jawinata apamorqa, ashkha qorita, valorniyoj k'acha rumikunatawan. Salomonman chayamuspataj, qoyaqa imatachus sonqonpi yuyarqa, chay tukuyta taporqa.

³ Chantá Salomonqa tukuy tapusqanman kuticherqa, manataj imapis mana kutichiyta atisqan karqachu.

⁴ Chantá Sabá suyumanta qoyaqa Salomonpa tukuy yachayninta rikuspa, jinallataj wasita ruwachisqantapis rikuspa, t'ukorqa.

⁵ Rikullarqataj Salomonpa wasinpi sumaj mikhuykunata, yanapajninkunaj wasinkukunatawan, kamachinkunaj p'achankutawan, vino jaywajkunatawan, Tata Diospa Templonpi uywa ñak'asqa q'olachiykunatawan ima. Chayta rikuspataj, t'ukushaj qhepakorqa.

⁶ Kuraj kamachejmantaj nerqa: Llajtaypi kashaspa, uyarerqani ruwasqaykimanta, yachayniykimantawan. Cheqapuni kasqa chay uyarisqayqa.

⁷ Manataj noqaqa creerqanichu, noqa kikiy jamuspa ñawiywan rikunaykama. Chaywanpis mana khuskallantapis niwasqankuchu. Yachayniykeqa, kapuyniykipis uyarisqaymanta aswanraj kasqa.

⁸ Yachayniykimanta sapa p'unchay uyarispa, warmiykikuna, runaykikuna, kamachiykikunapis ima manchay kusisqachá kashanku.

⁹ Tata Diosniyki yupaychasqa kachun, pichus qanwan kusisqa kaspa Israel suyuta kamachinaykipaj churasunki, chay. Israel suyuta wiñaypaj munakusqanrayku payqa kuraj kamachej kanaykipaj, cheqa kajtataj ruwanaykipaj churasunki, nispa.

¹⁰ Chantá payqa kuraj kamachej Salomonman 3.960 kilo qorita, ashkha sumaj q'apashaj jawinata, ashkha valorniyoj rumikunatawan qorqa. Mana jayk'ajpis chay chhika sumaj q'apashaj jawinata Israel suyuman apamojchu kanku, kuraj kamachej Salomonman Sabamanta qoya qosqan jinataqa.

¹¹ Tiromanta kuraj kamachej Jiranpa jatuchaj barconkunapis Salomonpaj apamullarqataj Ofirmanta qorita, sandalomanta ashkha k'aspita, valorniyoj rumikunatawan.

¹² Chay sándalo k'aspimantataj Salomonqa Tata Diospa Templonpaj wicharinakunapi jap'ikunapaj ruwacherqa, jinallataj kamachej wasinpajpis. Takejkunapajpis chay kurkumanta arpakunata, waj tocanakunawan ima ruwachillarqataj. Manataj jayk'ajpis chay chhika sándalo k'aspitaqa apamojchu kanku, nitaj ujtawanpis kunankama rikukunñachu.

¹³ Salomontaj Sabá suyumanta qoyaman tukuy mañasqanta qorqa. Salomonpa qosqanqa wajllaraj karqa. Chantá Sabá suyumanta qoyaqa tukuynin kamachinkunawan ima llajtanman kutiporqa.

Salomonpa yachaynin, qhapajyasqantaj

¹⁴ Salomonpa sapa wata qori jap'isqanqa 22.000 kilo karqa.

¹⁵ Wajllaraj karqa ranqherokuna, Arabiamanta tukuynin kuraj kamachejkuna, Israel suyumanta kurajkunapiwan impuestota qoripi pagasqanku.

¹⁶ Kuraj kamachej Salomonqa qorimanta 200 escudokunata ruwacherqa, sapa escudomantaj sojta kilo qori yaykorqa.

¹⁷ Ruwachillarqataj 300 juch'uychaj escudokunatawan, sapa escudomantaj yaykorqa uj kilo khuskanniyoj qori. Chantá Cedromanta Kamachina wasi nisqaman chay escudokunata churacherqa.

¹⁸ Jinallataj marfilmanta uj jatun kamachina tiyanata ruwacherqa, chaytataj qoriwan lluch'iykucherqa.

¹⁹ Chay tiyanaqa sojta patillayoj karqa, wasa atikunantaj muyulla karqa, puraj ladonpitaj maki atikunayoj. Chaykunaj qayllanpi iskay leonkuna churasqa karqa.

²⁰ Chunka iskayniyoj leonkuna sapa ladopi sojtakama kallarqataj. Mana ni mayqen suyupipis chayman rijch'akoj kasqachu.

²¹ Kuraj kamachej Salomonpa tukuynin ujyananqa qorimanta karqa. Ajinallataj Cedromanta Kamachina wasi nisqapi chuwankunapis qorillamantataj karqa. Manataj qolqe metalmanta imapis karqachu. Salomonpa tiemponpi qolqe metalqa pisipaj qhawasqa karqa.

²² Salomonpa jatuchaj barconkunaqa Jiranpa barconkunawan khuska, sapa kinsa watamanta uj kutita Tarsismanta chayamoj kanku, kay imakunata apamuspa: Qorita, qolqe metalta, marfilta, k'usillukunata, pavo realkunatawan ima.

²³ Ajinata kuraj kamachej Salomonqa kay pachapi tukuynin kuraj kamachejkunata yachaypi, qhapaj kaypipis atiparqa.

²⁴ Tukuy runataj Salomonta rejsiyta munaj kanku, chay sumaj yachayta Dios payman qosqanta uyarinankupaj.

²⁵ Tukuytaj kay imakunata payman apamoj kanku: Qolqe metalta, qorita, p'achata, armata, sumaj q'apashaj jawinata, caballota, mulata ima.

Salomonqa caballokunata, carretakunatawan ranqheyan

²⁶ Salomonqa tantaykullarqataj carretakunata, caballopi purejkunatawan. Paypata tiyaporqa 1.400 carretakuna, 12.000 caballopi purej soldadokuna ima. Chaykunata churarqa carretakunata waqaychana llajtaman, wakintaj Jerusalenpi kuraj kamachejwan qhepakunankupaj.

²⁷ Kuraj kamachejtaj Jerusalenpi qolqe metalta rumita jinapuni tantaykorqa, pino kurkutapis k'ita higota jinapuni.

²⁸ Salomonpajqa Egiptomanta caballokunata apamoj kanku, imaraykuchus kuraj kamachej rantejninkukunaqa Ciliciakama rantej rej kanku.

²⁹ Egiptomanta apamusqa carretaqa 600 qolqe valej, caballokunataj sapa uj 150 qolqe valej. Salomonpa ranqheronkunamanta tukuy jeteokunaj kuraj kamachejninku, Siriamanta kajkunapis chay imakunata rantikoj kanku.