1 Reyes 1 - DIOSPA QHELQACHISQ

Kuraj kamachej David machuyan

¹ Kuraj kamachej Davidqa machu runaña karqa, unayniyojtaj. Chayrayku ashkha phulluwan qhataykojtinkupis, manaña q'oñikuyta atejchu.

² Chantá kamachinkuna payta nerqanku: Wiraqochiyku, noqayku qanpaj qharita mana rejsej sipasta mask'apusqayku qhawasunanpaj, qanwan khuska puñuspa q'oñichisunanpaj, nispa.

³ Paykuna tukuynin Israel suyupi mask'aspataj, Sunén llajtamanta Abisagta tarerqanku, chantá kuraj kamachejman pusamorqanku.

⁴ Chay sipas may alajita karqa, paytaj kuraj kamachejta qhawarqa, chantá kamachinpi karqa. Chaywanpis kuraj kamachejqa mana payta llankharqachu.

Adonías kuraj kamachej kayta munan

⁵ Chantá Davidpa ujnin warmin Jaguitpa churin Adoniasqa tatan Davidpa contranpi oqharikorqa: Kunanqa noqa kamachisaj, nispa. Chayrayku Adoniasqa wakichikorqa carretakunata, caballopi purej runakunata ima paywan khuska purinankupaj. Phishqa chunka runakunatawan mink'allarqataj paypa jark'akojninkuna jina ñawpaqenpi purinankupaj.

⁶ Chaykama Adoniaspa tatan Davidqa ni jayk'aj imamantapis k'amisqachu: Imaraykutaj chay jinata ruwashanki? nispa. Adoniastaj allin rijch'ayniyoj karqa, Absalonpa sullk'an.

⁷ Chantá Adoniasqa Seruyáj churin Joabwan, sacerdote Abiatarwan ima uj tratota ruwarqa, paykunataj Adoniasta yanaparqanku.

⁸ Chaywanpis sacerdote Sadoc, Joyadáj churin Benaías, Diosmanta sut'inchaj Natán, Simey, chantá Davidpa wapu soldadonkuna imaqa mana Adoniasman sayasqachu karqanku.

⁹ Chantá Adoniasqa jatun mikhuyta wayk'ucherqa, Zojélet chhanka chaynejpi, Roguel pujyu qayllanejpi, chaypajtaj ovejakunata, sumaj wirayachisqa wakakunatawan ñak'acherqa. Chaymantaj wajyarqa kuraj kamachejpa churinkunata, pikunachus paypata wawqenkunallataj karqanku, Judá jatun ayllumanta pikunachus kuraj kamachejpaj kamachinkuna karqanku, chaykunatawan.

¹⁰ Chaywanpis mana wajyarqachu Diosmanta sut'inchaj Natanta, Benaiasta, Davidpa wapu soldadonkunata, nillataj wawqen Salomontapis.

¹¹ Chantá Natanqa Salomonpa maman Betsabeman nerqa: Manachu yachanki Jaguitpa churin Adonías kuraj kamachejpa kamachinan tiyanapi tiyakuyta munashasqanta Israelta kamachinanpaj? Chaytataj David wiraqochinchejqa mana yachanchu.

¹² Kunanqa uyariway kay yuyaychasusqayta, churiyki Salomón, qanwan ima ama wañuchisqa kanaykichejpaj.

¹³ Kuraj kamachej Davidpaman yaykuspa, niy: Kuraj kamachejníy, manachu noqa kamachiykiman tiluspa niwarqanki: Noqaj qhepaytaqa churiyki Salomón kamachenqa, kamachinay tiyanaman tiyaykuspa, nispa? Imaraykutaj kunanqa Adonías kuraj kamachej jina chaypi tiyaykuyta munashanri? nispa.

¹⁴ Chantapis Natanqa nillarqataj: Kuraj kamachejwan parlashajtillaykiraj, noqapis qhepaykita yaykumuytawan, cheqapuni kasqanta nisaj, nispa.

¹⁵ Chaypacha Betsabeqa kuraj kamachejpa puñuna cuartonman yaykorqa, maypichus Sunenmanta Abisag kuraj kamachejta qhawasharqa ancha machuña kasqanrayku, chayman.

¹⁶ Kuraj kamachejman chimpaspataj, Betsabeqa pampakama k'umuykorqa, kuraj kamachejtaj payta nerqa: Imataj tiyanri? nispa.

¹⁷ Betsabetaj kuticherqa: Kuraj kamachejníy, qan Tata Diospa sutinrayku noqa kamachiykiman tiluspa, niwarqanki: Noqaj qhepaytaqa Salomón churiyki kuraj kamachej kanqa, kamachinay tiyanapi tiyaykuspa, nispa.

¹⁸ Kunantajrí Adoniasqa kuraj kamachej jina tiyaykuyta munashan, qantaj mana chaytaqa yachashankichu.

¹⁹ Bueykunata, wirayachisqa torillokunata, ashkha ovejatawan ñak'achispa, mikhunankupaj tukuynin churiykikunata, sacerdote Abiatarta, soldadokunaj kurajninku Joabtawan wajyachin. Kamachiyki Salomontarí mana wajyachinchu.

²⁰ Kunantaj, kuraj kamachejníy, tukuy israelitakuna suyashanku willanaykita, kamachinayki tiyanapi pichus tiyaykuspa kamachinanta.

²¹ Mana jina kanman chayqa, qan kuraj kamachejniy wañupojtiykeqa, noqawan, Salomón churiywan ima wañuchisqa kasqayku, nispa.

²² Jinata Betsabé kuraj kamachej Davidwan parlashajtillanraj, Diosmanta sut'inchaj Natán chayaykamorqa.

²³ Jinataj kuraj kamachejpa kamachinkuna payman willarqanku Diosmanta sut'inchaj Natán chayamusqanta. Natantaj kuraj kamachejpa ñawpaqenpi yaykuspa pampakama k'umuykukorqa.

²⁴ Natantaj nerqa: Kuraj kamachejníy, qanchu nerqanki: Noqaj qhepaypi Adonías kamachenqa, kamachinay tiyanapi tiyaykuspa? nispa.

²⁵ Kunantaj Adoniasqa bueykunata, wirayachisqa torillokunata, ashkha ovejatawan ñak'achin, mikhunankupajtaj wajyachin qanpa churiykikunata, soldadokunaj kurajninkukunata, sacerdote Abiatartawan. Paykunaqa mikhushanku, ujyashankutaj Adoniaspa ñawpaqenpi, qhaparirishankutaj: Kuraj kamachej Adonías jallalla jallalla, nispa.

²⁶ Chaywanpis mana wajyachiwarqaykuchu noqata, sacerdote Sadocta, Joyadáj churin Benaiasta, nitaj wawayki Salomontapis.

²⁷ Kuraj kamachejníy, ajinatapunichu kamacherqanki, kamachiykikunaman mana willaspalla, pichus qhepaykita kamachinanta? nispa.

David nin Salomón kuraj kamachej kananta

²⁸ Chantá kuraj kamachej Davidqa Betsabeta wajyamunankuta kamacherqa. Paytaj kuraj kamachejman chimpaykuspa, ñawpaqenpi sayarqa.

²⁹ Kuraj kamachejtaj tiluspa, nerqa: Tata Diospa sutinrayku tiluni, pichus tukuy llakiymanta qhespichiwarqa, payrayku:

³⁰ Kunanqa Salomón churiykipuni noqaj cuentaypi kamachenqa, paytaj tiyaykonqa kamachinay tiyanapi, imaynatachus Israelpa Tata Diosninpa sutinrayku tiluspa nerqaykiña, chayman jina, nispa.

³¹ Chantá Betsabeqa kuraj kamachejpa ñawpaqenpi pampakama k'umuykuspa, nerqa: Kuraj kamachejníy David, wiñaypaj kawsanaykita Dios munachun, nispa.

³² Kuraj kamachej David kamachillarqataj: Wajyamuychej sacerdote Sadocta, Diosmanta sut'inchaj Natanta, Joyadáj churin Benaiastawan, nispa. Paykuna chayamojtinkutaj,

³³ kuraj kamachejqa paykunata nerqa: Qankunawan, kamachiykunapiwan khuska noqaj mulaypi Salomonta Guijonman pusaychej.

³⁴ Jaqaypeqa sacerdote Sadoc, Diosmanta sut'inchaj Natanwan Salomonpa umanman aceitewan jawenqanku Israelpa kuraj kamachejnin kananpaj. Putututa waqachispataj, qhapariychej: Kuraj kamachej Salomón jallalla, jallalla, nispa.

³⁵ Chaymanta qankunaqa qhepanta jamunkichej, paytaj kamachinay tiyanapi tiyaykuspa, noqaj cuentaypi kamachenqa. Noqa paytaqa ajllani Israelpi, Judapiwan kamachinanpaj, nispa.

³⁶ Chantaqa Joyadáj churin Benaiasqa kuraj kamachej Davidta nerqa: Ajina kachun, kuraj kamachejníy. Tata Diosniyki ajina kananta kamachichun.

³⁷ Chantá imaynatachus Tata Dios qanwan karqa, ajinallatataj Salomonwanpis kachun. Paytaj Salomonpa kamachiynintapis qanpa kamachiyniykimanta aswan jatuntaraj ruwachun, nispa.

³⁸ Chaymantataj sacerdote Sadoc, Diosmanta sut'inchaj Natán, Joyadáj churin Benaiaswan, quereteokunawan, peleteokunapiwan ima urayk'orqanku. Salomontataj kuraj kamachej Davidpa mulanman lloq'aykuchispa, Guijonman pusarqanku.

³⁹ Sacerdote Sadoctaj Dioswan Tinkukuna Toldomanta uj wajrapi aceiteta apamuspa, Salomonpa umanman jawiykorqa. Sadoc putututa waqachejtintaj, chaypi tantasqa israelitakuna qhaparerqanku: Kuraj kamachej Salomón jallalla, jallalla, nispa.

⁴⁰ Chaymantaqa tukuyninku kuraj kamachej Salomonpa qhepanta putututa waqachispa rerqanku. May jatun kusiywan ch'ajwarispa, jallp'atapis kuyurichej jinapuni karqanku.

⁴¹ Adoniasqa tukuy wajyasqa karqanku, chaykunawan mikhuyta tukusqankumantaña, runaj ch'ajwasqankuta uyarerqanku. Joabtaj putututa waqashajta uyarispa, nerqa: Imajtintaj llajtapi chay jinatapuni ch'ajwashankuri? nispa.

⁴² Joab parlashajtillanraj, sacerdote Abiatarpa churin Jonatán chayamorqa. Adoniastaj payta nerqa: Qanqa jatunpaj qhawasqa runa kanki. Yaykumuy ari, sumaj willaykunatachá apamushanki, nispa.

⁴³ Chantá Jonatanrí Adoniasman willarqa: Mana allintachu willasqaykichej. Kuraj kamachej Davidqa Salomonta kuraj kamachej kananpaj churan.

⁴⁴ Chantá kuraj kamachej Davidpuni Salomontawan khuska sacerdote Sadocta, Diosmanta sut'inchaj Natanta, Joyadáj churin Benaiasta kacharqa, jinallataj quereteokunata, peleteokunatawan ima. Paykunaqa kuraj kamachej Davidpa mulanpi Salomonta lloq'aykucherqanku.

⁴⁵ Chantá Diosmanta sut'inchaj Natán, sacerdote Sadocwan Guijonpi Salomonta kuraj kamachej kananpaj aceitewan jawiykorqanku, chaymantataj kusisqa kutimorqanku. Chayrayku ari chay jinata tukuy israelitakuna mayta kusikushanku, chayta qankunapis uyarerqankichej.

⁴⁶ Chay jawa Salomonqa kamachina tiyanapi tiyaykunña.

⁴⁷ Kuraj kamachej Davidpa kamachinkunapis Davidta napaykoj rispa, nishanku: Diosqa sutiykimanta nisqaqa astawanraj Salomonpa sutinta uyarisqata ruwachun. Kamachiynintapis ajinallatataj qanpa kamachiykimanta nisqaqa aswan jatuntaraj ruwachun, nispa. Jinallataj kuraj kamachej Davidpis Diosta kay jinata yupaychan:

⁴⁸ Israelpa Tata Diosnenqa yupaychasqa kachun, aylluymanta ujnin kajta kamachinay tiyanapi tiyashajta rikuchiwasqanrayku, nispa.

⁴⁹ Jinapi Adoniaspa wajyakusqankuna manchaywan kharkatirispa, sapa ujninkupis ñanninkuta riporqanku.

⁵⁰ Adoniastaj kuraj kamachej Salomonta manchachikuspa, altarpa wajranmanta jap'iykakamorqa.

⁵¹ Chaytataj Salomonman willarqanku: Adoniasqa qanta manchachikususpa, altarpa wajrankunamanta jap'iykuspa kashan, nintaj: Tiluwachun kuraj kamachej Salomonqa mana wañuchinawanta, nispa.

⁵² Salomontaj nerqa: Sichus payqa allin runa jina purenqa chayqa, mana pipis imananqachu. Sitajchus mana allinta ruwanqa chayrí, wañuchisqa kanqa, nispa.

⁵³ Chantá kuraj kamachej Salomonqa Adoniasta altarmanta pusamunankupaj kacharqa. Chaymantataj Adoniasqa Salomonpa ñawpaqenman rispa, pampakama k'umuykorqa. Salomontaj payta nerqa: Ripullay wasiykiman, nispa.