1 Pedro 4 - DIOSPA QHELQACHISQ

Diospa munasqanta ruwaspa kawsana

¹ Chayrayku imaynatachus Cristo kay pachapi kashaspa runa jina ñak'arerqa, ajinallatataj qankunapis ñak'arinaykichejpaj sonqoykichejpi wakichikuychej. Ajinaqa sichus qankuna Cristorayku ñak'arinkichej chayqa, juchallispa purinamanta t'aqakunkichej.

² Ajinaqa kay pachapi kawsanaykichejkamaqa manaña sonqoykichejpa munasqanman jinachu kawsankichej, manachayqa imata jina Diospa munasqanta ruwaspa kawsankichej.

³ Qankuna may chhika unaytaña Dioswan churanakojkuna jinallataj ruwaspa purerqankichej. Chaypacha purej kankichej sajra purikuypi, khuchiriyopi, machakuykunapi, machasqamanta imaymanata ruwanapi, millay lantikunata yupaychanapi ima.

⁴ Kunanrí qankuna manaña paykunawan khuska sutin oqhariy mana atina millayta ruwanapi purejtiykichej, paykuna t'ukunku. Chantataj mana allin kajta qankunamanta parlanku.

⁵ Chaywanpis paykuna chaykunamanta Diosman cuentata qonqanku, pichus kawsajkunata, wañusqakunatawan juzgananpaj wakichisqa kashan, chayman.

⁶ Chayraykullataj kunan pikunachus wañusqaña kashanku, chaykunamanpis sumaj willaymanta willasqa karqa. Paykuna tukuy runakuna jinallataj wañunanku karqa chaypis, kunanqa Santo Espiritunejta Dioswan khuska wiñaypaj kawsanqanku.

⁷ Tukuy imaj tukukuynin qayllapiña kashan. Chayrayku qankunaqa allin yuyayniyoj jina kawsakuychej, amataj Dioswan parlarikunamanta qonqapuychejchu.

⁸ Tukuy imamanta astawanqa qankunapura tukuy sonqo munakuychej, imaraykuchus munakoyqa may chhika juchata qonqayman churan.

⁹ Jinallataj qankunapura wasiykichejman kusisqa wajyarinakuychej, mana thutuspalla.

¹⁰ Sapa ujniykichejman Dios uj imata ruwanapaj atiyta qosorqachej, qankunataj chaywan ujkuna ujkunata yanapakuychej. Sumaj mayordomokuna jina Diospa imaymana k'acha yanapayninta allinta apaykachaychej.

¹¹ Pichus Diospa nisqanmanta parlananpaj atiyta jap'ejqa Dios kikinpis paynejta parlashanman jina parlachun. Pichus wajkunata yanapananpaj atiyta jap'ejqa Dios kallpa qosqanman jina yanapachun, Jesucristonejta tukuy imapi Tata Dios jatunchasqa kananpaj. Chantá Jesucristopis tukuy atiyniyoj kasqanrayku wiñay wiñaynintinpaj jatunchasqallataj kachun. Ajina kachun.

Jesucristorayku ñak'arichisqa kashaspapis kusikuna

¹² Munasqa wawqe panaykuna, sinch'i ñak'arichisqa kashaspapis ama chaymanta t'ukuychejchu, imajtinchus chayqa kananpi kashan.

¹³ Aswanpis kusikuychej, imaraykuchus ajinata ñak'arishaspa, Cristoj ñak'arisqanpi paywan khuska ñak'arishankichej. Ajinamanta Cristo jatun kayninpa lliphipiyninpi rikhurimojtin, qankuna may jinatapuni kusikunkichej.

¹⁴ Sichus pipis Cristopi atinikusqaykichejrayku qankunata turiyasunkichejman chayqa, kusikuychej, imaraykuchus Diospa jatun atiyniyoj Espíritun qankunawanpuni kashan.

¹⁵ Ñak'arichisqa kaspapis, ama runa wañuchi kasqaykichejraykuchu kachun, nitaj suwa kasqaykichejraykuchu. Amallataj mana allin kajta ruwaychejchu, nillataj wajkunaj kawsayninkumanpis sat'ikuychejchu.

¹⁶ Sichus pipis Cristojta kasqanrayku ñak'arichisqa kanman chayqa, ama p'enqakuchunchu, aswanpis Cristoj sutinta apasqanmanta Diosta jatunchachun.

¹⁷ Diospa juicion p'unchay chayamunña, paytaj noqanchej aylluntaraj ñawpajta juzgawasunchej. Dioschus ayllunta juzgayta qallarin chayqa, Jesucristomanta sumaj willayta mana jap'ikuyta munajkunawan, imataj kanqari?

¹⁸ Cheqanta ruwaj runachus ñak'ayllata qhespichisqa kanqa chayqa, Dioswan churanakojkuna, jinataj juchasapakuna imapitaj paranqankuri?

¹⁹ Ajinaqa pikunachus Diospa munasqanta ruwasqankurayku ñak'arichisqa kajkunaqa Diospa makinman kawsayninkuta churachunku. Chayta ruwachunku, imaraykuchus pay nisqanta junt'an, chantá tukuy kaj chhikata ruwarqa. Jinallataj allin kajta ruwaspallapuni kachunku.