1 Pedro 2 - DIOSPA QHELQACHISQ

¹ Chayrayku qankunaqa kay jina millay ruwaykunata saqeychej: Tukuy imaymana q'otiriyota, puraj uya kayta, envidiakuyta, runaj contranpi tukuy imaymana rimakuytawan ima.

² Imaynatachus ñuñoj wawaqa lecheta may jinata munan, ajinallatataj qankunapis mana imawan chhapusqa Diospa simi nisqanta munaychej, chaynejta qhespichisqa kasqaykichejpi runayanaykichejpaj.

³ Ajinata ruwaychej, imajtinchus Tukuyta Kamachej Diospa k'acha kayninwan misk'ichikorqankichejña.

Cristoqa kawsashaj rumi jina

⁴ Qankunaqa Tukuyta Kamachej Jesusman qayllaykuychej, imajtinchus payqa Diospa Templonpi kawsashaj aswan sumaj rumi jina. Paytaqa runakuna qhesacharqanku, Diostajrí payta ajllaspa jatuncharqa, may valorniyoj rumi jina kananpaj.

⁵ Qankunapis kawsashaj rumi jina kajtiykichej, Diosqa qankunawan mana rikukoj templonta perqachashan. Jinallataj juchamanta t'aqasqa sacerdotekunapis kallankichejtaj. Ajinaqa Santo Espirituman jina jaywanakunata Tata Diosman jaywankichej, chaykunatataj Diosqa Jesucristonejta tukuy sonqo jap'ikun.

⁶ Chayrayku Diospa Qhelqachisqanpi nillantaj: Noqaqa may valorniyoj ajllasqa esquina rumita Sionpi churani. Pichus chaymanta jap'ikojqa mana p'enqachisqachu kanqa, nispa.

⁷ Qankuna Diospi atinikojkunapaj chay rumeqa may valorniyojmin. Mana Paypi atinikojkunamantarí Diospa Qhelqachisqanpi nin: Wasichajkunaj qhesachasqanku rumeqa sumaj esquina rumiman tukun, nispa.

⁸ Wajnejpi nillantaj: Chay rumeqa misk'achej rumiman tukun, urmachej rumimantaj, nispa. Chay rumipi ashkha misk'anku, imaraykuchus Diospa nisqanta mana jap'ikuyta munankuchu. Chayraykumin misk'anankupaj churasqa karqanku.

Diospa ayllun

⁹ Qankunarí Diospa ajllakusqan ayllu kankichej, Kuraj Kamachejpa sacerdotenkuna, juchamanta t'aqasqa runakuna, Diospatapuni kanaykichejpaj t'aqasqa ima. Chayrayku qankuna Diospa t'ukuna may sumaj ruwasqanmanta willayta atinkichej, pichus laqhamanta sumaj k'anchayninman wajyasorqachej, chaypa ruwasqanmanta.

¹⁰ Qankuna ñawpajtaqa mana ayllunchu karqankichej, kunantajrí Diospa ayllunña kankichej. Ñawpajtaqa Dios mana khuyakusorqachejchu, kunantajrí Diospa khuyakusqanña kankichej.

Diosta qhatejkuna jina allinta puriychej

¹¹ Munasqa wawqe panaykuna, qankuna kay pachapi waj llajtayojkuna jina kankichej. Chayrayku tukuy sonqo mañakuykichej: Ama juchallinaman aysaj sonqoykichejpa munasqanta kasuychejchu, imaraykuchus chaykuna sonqoykichejpa contranpi sayaykunku.

¹² Jinallataj Diosta mana qhatejkunaj ñawpaqenkupi allinta puriychej. Paykuna kunan mana allin kajta qankunapaj rimanku, millayta ruwajkunapis kawajchej jina. Chaywanpis allin ruwasqaykichejta rikuspa, paykuna Diosta jatunchanqanku, Dios juzganan kashan, chay p'unchay chayamojtin.

Kamachejkunata k'umuykukoj sonqowan qhawana

¹³ Tukuyta Kamachej Jesusta munakusqaykichejrayku kamachejkunata respetowan qhawaychej, kuraj kamachejpis kachun,

¹⁴ chayrí waj kamachejkunapis kachunku. Paykunata kuraj kamachej churan mana allinta ruwajkunata jasut'inankupaj, allinta ruwajkunatataj jatunchanankupaj.

¹⁵ Diosqa qankuna allin kajta ruwanaykichejta munan, ajinamanta mana yuyayniyoj nitaj mana imata yachaj runakunaj thawtisqankuta ch'inyachinaykichejpaj.

¹⁶ Qankunaqa kacharichisqa kankichej. Chaywanpis Diospa wata runallanpuni kankichej. Ajinaqa kacharichisqa kasqaykichejrayku ama yuyaychejchu mana allin kajta ruwaspa puriyta atillasqaykichejta.

¹⁷ Tukuy runata respetowan qhawaychej. Jesucristota qhatej masiykichejtapis munakuychej. Diostapis may jatun respetowan qhawaychej, jinallataj kuraj kamachejtapis jatun respetowan qhawallaychejtaj.

Wata runakunajta imachus ruwananku

¹⁸ Wata runakuna, qankunapis patronniykichejta tukuy sonqo kasuychej. Mana k'acha sonqoyojkunallatachu kasuychej, manachayqa millay sonqoyoj runakunapis kachunku.

¹⁹ Ichapis allin kajta ruwashajtiykichejpis, manakajmanta ñak'arichisunkichejman. Sichus llamp'u sonqowan chayta awantankichej Diospata kasqaykichejrayku chayqa, Dios qankunawan sonqo junt'asqa kanqa.

²⁰ Sichus mana allin kajta ruwasqaykichejmanta jasut'isqa kaspa ch'inlla awantankichej chayqa, ima allintaj kanman pacienciawan ñak'arisqaykichejri? Aswanpis sichus allinta ruwasqaykichejrayku ñak'arichisqa kaspa llamp'u sonqowan awantankichej chayrí, chaypachamá Diosqa qankunawan sonqo junt'asqa kanqa.

²¹ Diosqa allin kajta ruwanaykichejpaj wajyasorqachej. Cristopis noqanchejrayku ñak'arerqa, chayta yachaspa noqanchejpis pay jina pacienciawan ñak'arinanchejpaj.

²² Cristoqa mana jayk'ajpis juchallerqachu, nitaj pitapis llullakuspa q'otiyarqachu.

²³ Runakuna Cristota turiyashajtinku, payqa mana kutichikorqachu. Ñak'arichisqa kashaspapis, mana nerqachu chaymanta pagachikunanta. Aswanpis cheqanta juzgaj Juezpa makinman churakorqa.

²⁴ Ajinamanta pay kikin ukhunpi juchanchejta k'aspi cruzpi aparqa, noqanchej juchallinapaj wañuspa, cheqanta ruwaspa kawsananchejpaj. Paypa ukhun khallarasqa kasqanraykutaj qankuna qhaliyachisqa kankichej.

²⁵ Ñawpajta qankuna chinkasqa ovejakuna jina karqankichej. Kunantajrí Cristoman kutirikunkichejña, paytaj michej jina qankunamanta allinta qhawashan.