1 Corintios 9 - DIOSPA QHELQACHISQ

Jesuspa kuraj kachankunaqa runa jina qhawasqa kananku

¹ Manachu noqa imatachus munasqayta ruwayta atiyman? Manachu Jesuspa kuraj kachankunamanta ujnin kani? Manachu Tukuyta Kamachej Jesusninchejta rikorqani? Manachu qankunapis noqa willasqayrayku Diosman kutirikorqankichej?

² Ichapis wajkunapaj mana Jesuspa kuraj kachanchu kani. Chaywanpis qankunapaj Jesuspa kuraj kachan kani, imajtinchus Tukuyta Kamachej Jesuspa kachan kasqayqa qankunapi sut'i yachakun.

³ Noqaj contraypi rimajkunaman kay jinata kutichikuni:

⁴ Manachu Cristomanta yachachisqaykurayku wawqe panakunamanta mikhunata, ujyanata ima jap'ikuyta atiyku?

⁵ Noqaykoqa sapa ujpis atillaykutaj warmiykuwan khuska maymanpis riyta, imaynatachus Jesuspa waj kuraj kachankuna, chantá Jesuspa wawqenkunapis, Pedropis ima warminkuta pusaykachakunku, ajinata.

⁶ Chayrí noqawan, Bernabellawanchu, kawsanaykupaj llank'anayku tiyan, Diospa chajranpi llank'ashaspapis?

⁷ Pitaj soldado kanman qolqellanwantajri? Pitaj uva sach'ata mallkispa poqochisqanmanta mana mikhunmanchuri? Chayrí, pichus ovejata michejqa manachu ovejanmanta ch'awaspa lecheta ujyanman?

⁸ Ajinata nispaqa, noqa mana yuyasqallaytachu nishani. Manachu Moisespa kamachisqanpi ajinallatataj nin?

⁹ Moisespa kamachisqanpi nin: Ama trillaj bueyman ñukuta churankichu, nispa. Ajinata Dios nispa, bueykunallamantachu qhawaspa nin?

¹⁰ Dios ajinata nispaqa, noqaykumanta qhawaspa nerqa. Arí, noqaykurayku chay kamachisqa qhelqasqa karqa. Pichus llank'ajqa llank'an, trillajpis trillan, poqochisqanmanta payman chayajta jap'iyta suyaspa.

¹¹ Noqayku qankunaman Jesucristomanta sumaj willayta willaspa tarpuspa jinarqayku. Chayrayku tarpusqaykumanta kawsanaykupaj mikhunata, ujyanata ima t'inkata jina jap'iyta atiyku.

¹² Sichus qankuna waj yachachejkunaman kawsanankupaj qonkichej chayqa, manachu noqaykupis kawsanaykupaj qankunamanta astawanraj jap'iyta atiykuman? Chaywanpis chayta jap'iyta atishaspa mana jinatachu ruwarqayku, astawanqa tukuy imata awantakullarqayku, Cristomanta sumaj willay willasqa kananpaj ama ima jark'atapis churanaykupaj.

¹³ Manachu yachankichej Templopi imachus ruwanapi ruwaysikojkunaqa Diosman jaywasqamanta mikhusqankuta? Jinallataj altarpi jaywajkunapis manachu altarpi kaj ofrendamanta wakinta jap'illankutaj?

¹⁴ Ajinallatataj Tukuyta Kamachej Jesús kamacherqa sumaj willayta willaspa purejkunaman kawsanankupaj qonankuta, pikunachus chay sumaj willayta jap'ikunku, chaykuna.

¹⁵ Noqarí kawsanaypaj qonawaykichejta mana jayk'ajpis mañakorqaykichejchu. Kunanpis manallataj kawsanaypaj qonawaykichejraykuchu kay jinata qhelqamushaykichej. Noqaqa aswanpis wañupuyta munayman, mana pagachikuspalla willasqaymanta jatunchakunayta manaraj pipis qhechushawajtin.

¹⁶ Jesusmanta sumaj willaytachus willani chayqa, mana imamanta jatunchakunay kanchu. Noqaqa munaspa mana munaspa ruwanaypuni tiyan, Dios kamachiwasqanrayku. Ay noqamanta imachus kanman, manachus sumaj willaymanta willayman chayqa.

¹⁷ Munasqayraykullachus willarayman chayqa, pagachikuyta atiyman. Chaywanpis kamachiwasqanta junt'anayrayku willarashani, imaraykuchus Dios willaranayta kamachiwarqa.

¹⁸ Jina kajtenqa, imataj noqaj t'inkayri? T'inkayqa kaymin: Cristomanta sumaj willayta mana paganawankuta suyaspalla willarasqaymanta kusikuyniy. Chayrayku sumaj willaymanta willaspa, mana paganawankuta mañakunichu.

¹⁹ Noqa mana pejpa wata runanchu kani. Chaywanpis, kunanqa tukuypa wata runanman tukuni, astawan ashkha runata Cristoman pusanaypaj.

²⁰ Judiokunawan kashaspa, judío jina kawsarqani, judiokunata Cristoman pusanaypaj. Moisespa kamachisqanta kasojkunawan kashaspataj, noqaqa chay kamachisqakunata kasuspa kawsarqani. Noqaqa manaña Moisespa kamachisqanpa atiyninpichu kashani. Chaywanpis kamachisqakunata kasuspa purerqani, Moisespa kamachisqanta kasojkunata Cristoman pusanaypaj.

²¹ Mana judío kajkunarí Moisespa kamachisqanta mana junt'ankuchu. Jinallataj noqa paykunawan kashaspa, paykuna jina purini, paykunata Cristoman pusanaypaj. Ajinata nispaqa, mana nishanichu Diospa kamachisqanta qhesachasqayta. Aswanpis Cristoj kamachisqanta kasuni.

²² Diospi atinikuypi manaraj sinch'ita sayajkunawan kashaspaqa, noqa pisi kallpayoj jina kani, paykunata Cristoman pusanaypaj. Ajinamanta paykuna imaynachus kasqankuman jina tukuni, jinataj atisqayta ruwani wakillantapis qhespichinayrayku.

²³ Noqa chay tukuyta ruwani ashkha runakuna Cristomanta sumaj willayta uyarinankupaj, jinallataj noqapis chay sumaj willay runapi imatachus ruwasqanmanta jap'inaypaj.

²⁴ Qankuna yachankichej llallinakupeqa tukuy t'ijusqankuta. Chaywanpis pichus atipajlla t'inkata jap'in. Qankunapis ajinata t'ijuriychej, t'inkata jap'inaykichejpaj jina.

²⁵ T'ijurispa llallinakupaj wakichikojkunaqa tukuy, imachus mana yanapanqachu, chayta mana ruwankuchu. Ajinata paykuna wakichikunku ch'akipoj pillullata jap'inankupaj. Noqanchejrí mana jayk'aj ch'akipoj pilluta jap'inanchejpaj wakichikunchej.

²⁶ Chayrayku noqapis t'ijuni, maymanchus chayanay kashan, chayman chayanaypaj. Tinkupi maqanakojkunaqa mana wayrallatachu sajmanku. Ajinallatataj noqapis mana qhasipajchu imatapis ruwani.

²⁷ Aswanpis t'ijupi tinkoj jina tukuy imapi ukhuywan kasuchikuni, mana munasqanta ruwaspa. Manachus jinata ruwayman chayqa, wajkunaman Jesusmanta yachachej kashaspapis, noqa kikiy qhesachasqa kayman.