1 Corintios 7 - DIOSPA QHELQACHISQ

Casarakunamanta yuyaychaykuna

¹ Kunantaj cartapi tapumuwasqaykichejman kutichisqaykichej. Arí, qharipaj allin kanman warmiwan mana puñuykuspalla kakunan.

² Chaywanpis, ama khuchichakuspa purinaman urmaykunapaj aswan allin kanman qhareqa warmiyoj kanan, jinallataj warmipis qosayoj kanan.

³ Qosaqa warminwan imachus ruwananta junt'achun, jinallataj warmipis qosanwan imachus ruwananta junt'allachuntaj.

⁴ Warmeqa kikin ukhunmanta mana dueñochu, manachayqa qosan. Nillataj qosapis ukhunmanta dueñochu, manachayqa warmin.

⁵ Chayrayku qhari warmeqa puñuykukunaykichejta ama jark'anakuychejchu. Qhari warmi parlarikuspa, ichapis mana unaypajchu puñuykukuyta saqewajchej, Dioswan parlarikuspa kanaykichejpaj. Chaymanta qhari warmi jina watej puñukapunallaykichejtaj tiyan, ama Kuraj Supay juchallichisunaykichejpaj mana kakuyta atisqaykichejrayku.

⁶ Chayta nispaqa, noqa yuyaychashallaykichej, manataj kamachishaykichejchu.

⁷ Noqa munayman mana warmiyojkuna, jinataj warmisapakuna noqa jina mana casaraspalla kakunankuta. Chaywanpis Diosqa sapa ujman imata ruwananpaj atiyta qon. Ujmanqa atiyta qon casarakunanpaj, ujmantaj atiyta qon mana casaraspalla kakunanpaj.

⁸ Mana warmiyojkunaman, mana qosayojkunaman, chantá warmisapakunaman imaqa noqa kayta nini: Allin kanman noqa jina mana casaraspalla kakunaykichej.

⁹ Manachus kakuyta atinkichej chayrí, aswan walej casarakunaykichej. Aswan walejmin casarakoyqa warmi munaywan, chayrí qhari munaywan q'oñirispa atipachikunamanta nisqaqa.

¹⁰ Chaywanpis warmiyojkunata, jinataj qosayojkunata mana noqachu kamachini, manachayqa Tukuyta Kamachej Jesús: Warmeqa qosanmanta ama t'aqakuchunchu.

¹¹ T'aqakun chayrí, mana wajwan casaraspa kakuchun, manachayrí qosanwan allinyakuchun. Jinallataj qosa kajpis ama warminta saqerparichunchu, nispa.

¹² Wajkunaman noqalla kayta yuyaychani, manari Tukuyta Kamachej Jesuschu. Sichus mayqen wawqej warmin mana Diosman kutirikoj kaspa, munanman qosanwan khuska tiyakuyllatapuni chayqa, qosanqa ama warminta saqerparichunchu.

¹³ Sitajchus uj warmej qosan mana Diosman kutirikoj kaspa, warminwan khuska tiyakuyllatapuni munanman chayqa, amallataj warmin qosanta saqerparichunchu.

¹⁴ Chayqa ajina, imaraykuchus Diosman mana kutirikoj qosaqa Diospaj allinpaj qhawasqa, warmin Diosta qhatikoj kasqanrayku. Ajinallataj Diosman mana kutirikoj warmipis Diospaj allinpaj qhawasqa, qosan Diosta qhatej kasqanrayku. Manachus jina kanman chayqa, wawankukunapis ch'ichipaj qhawasqa kankuman. Kunanrí paykunaqa Diospaj t'aqasqa kanku.

¹⁵ Sitajchus Diosman mana kutirikoj qosa, chayrí Diosman mana kutirikoj warmipis ripuyta munan chayqa, ripuchun. Jina kajtenqa, wawqepis panapis warminta qosanta ripojta saqellachun. Mana chayraykuchu wawqepis, chayrí panapis ñak'arinan tiyan, imaraykuchus Diosqa allinpi kawsakuyman wajyawarqanchej.

¹⁶ Warmikuna, manachu reparankichej qosaykichej ichapis qankunarayku qhespichisqa kanankuta? Jinallataj qosakuna, manachu reparankichej ichapis qankunarayku warmiykichej qhespichisqa kanankuta?

¹⁷ Qharikuna, chayrí warmikuna imaynachus karqanku maypachachus Dios paykunata wajyarqa chaypacha, ajinallapuni kakuchunku. Noqaqa tukuy iglesiakunapi kajkunapaj kayllatapuni kamachini.

¹⁸ Sichus pitapis circuncidasqa kashajtin Dios wajyan chayqa, ajinallapuni kakuchun. Sitajchus uj runata Dios wajyarqa mana circuncidasqa kashajtin chayqa, ama circuncidachikuchunchu.

¹⁹ Ajinaqa uj qhari circuncidasqa kanan, chayrí mana circuncidasqa kanan mana aswanchu. Aswanqa Diospa kamachisqanta junt'ana.

²⁰ Ajinaqa, sapa ujta imayna kashajtinchus Dios wajyarqa, ajinalla qhepakuchun.

²¹ Wata runa kashaspachu wajyasqa karqanki? Chaymanta ama llakikuychu. Chaywanpis sichus kacharichisqa kayta atinki chayqa, atisqaykita ruway kacharisqa kanaykipaj.

²² Sichus pipis wata runa kashaspa Tukuyta Kamachej Cristota qhatinanpaj wajyasqa karqa chayqa, kunanqa Tukuyta Kamachej Cristota kasunanpaj kacharichisqaña. Jinallataj sichus pipis kacharisqa kashaspa wajyasqa karqa chayqa, kunanqa Cristoj wata runanña.

²³ Diosqa qankunata rantikunanpaj ashkha preciota pagarqa. Chayrayku amaña runakunaj wata runanman tukuychejchu.

²⁴ Wawqe panakuna, ujtawan nisqaykichej: Imayna kashaspachus sapa uj wajyasqa karqa, ajinallapuni Diospa ñawpaqenpi kakuchun.

²⁵ Manaraj casarakojkunapaj Tukuyta Kamachej Jesucristo mana imatapis kamachiwarqachu. Aswanpis noqa imaynatachus yuyasqallayta niykichej, Tukuyta Kamachej Jesucristo khuyakuyninpi jap'ikunapaj jina yuyayta qowasqanrayku.

²⁶ Kunan tiempo kawsay llakiylla kasqanrayku, aswan walej sapa ujpis imaynachus kashanku, ajinalla kakunanku.

²⁷ Casarasqachu kanki? Ama warmiykimanta t'aqakuychu. Manachu casarasqa kanki? Ama casarakuyta munaychu.

²⁸ Casarakunki chaypis, mana juchallinkichu. Sipaspis casarakun chayqa, manallataj juchallinchu. Chaywanpis, kunan casarajkuna llakiyta rikonqanku kunan tiempo mana allinchu kasqanrayku. Noqataj mana munaymanchu chay llakiykunata rikunaykichejta.

²⁹ Wawqe panakuna, kayta niyta munaykichej: Kay pachapi kawsananchejqa manaña unaychu. Chayrayku kunanmanta ñawpajmanqa warmiyojkuna ama warmiyoj kasqallankupichu yuyachunku.

³⁰ Waqajkunapis manapis waqankumanchu jina kachunku, kusikojkunapis manapis kusikunkumanchu jina. Imata rantikojkunapis manapis imata rantikunkumanchu jina kakuchunku.

³¹ Kay pachapi tukuy imayoj kaspa chhika patapi kawsajkunaqa ama chaykunamanta anchata ch'ipakuchunkuchu, imaraykuchus kay pachaqa askamalla tukukaponqa.

³² Mana munaymanchu imaynachus kashasqaykichejmanta chhikatapuni llakikunaykichejta. Mana warmiyojqa Tukuyta Kamachej Jesuspaj ruwananpi astawan yuyan, imaraykuchus payta kusichiyta munan.

³³ Warmiyojtajrí warminta uywananpaj imatachus ruwananpi yuyan, imaraykuchus warminta kusichiyta munan. Ajinaqa sonqon iskay yuyaypi kashan.

³⁴ Jinallataj mana qosayoj warmi, chayrí sipas warmipis Tukuyta Kamachej Jesuspaj ruwananpi yuyanku, ukhunku, sonqonkupis chayllapajpuni t'aqasqa kasqankurayku. Qosayojrí wasinpi imachus ruwananpi yuyan, qosanta kusichiyta munaspa.

³⁵ Chayta niykichej, mana jark'ata churayta munaspachu, manachayqa allinniykichejpaj. Noqa munayman imachus yanapasonqachej Tukuyta Kamachej Jesuspa munasqanta allinta junt'anaykichejpaj, chayta ruwanaykichejta. Chayrayku ama imapis jark'asunaykichejmanta allinta qhawakuychej.

³⁶ Ichapis uj qhari uj sipaswan casarakunanpaj parlasqa kashaspa, unaytaña suyachikushasqanta qhawanman, jinataj warmi munayninwan atipachikunanpaj jina kashasqanta reparanman. Ajina chayqa, munaspa casarakapuchun, imaraykuchus casarakoyqa mana juchachu.

³⁷ Pitajchus tukuy sonqo ninman mana casarakunanta, jinataj munayninwan mana atipachikunanta chayqa, ama casarakuchunchu. Ajinata ruwaspaqa, allinta ruwan.

³⁸ Chayrayku, pichus casarakun, chay runaqa allinta ruwan. Chantá, pitajchus mana casarakunchu chayrí, aswan allinta ruwan.

³⁹ Qosayoj warmeqa qosan kawsanankama paywan ujchasqa kashan. Qosan wañupun chayrí, piwanchus munasqanwan casarakuyta atin. Jinapis chay qhareqa Jesucristota qhatej kanan tiyan.

⁴⁰ Chaywanpis noqaj yuyasqayman jinaqa, aswan allin kanman manaña casaranan. Ajinata ninaypajqa, yuyani Diospa Espíritun yuyaychashawasqanta.