1 Corintios 6 - DIOSPA QHELQACHISQ

Jesusta qhatejkunapura quejanaku

¹ Sichus qankunamanta mayqellanpis Diosta qhatej masinwan ima jawa ch'ajwachinakunku chayqa, imaraykutaj Diosta mana qhatej juezman rinkichej ch'ajwata allinchananpaj, manataj Diosta qhatejkunamanchu?

² Manachu yachankichej qhepanejman Diosta qhatejkuna Diosman mana kutirikojkunata juzgananchejta? Qankunachus Diosta mana qhatejkunata juzgankichej chayqa, manachu kunan atinkichej mana kasu ruwana imakunata juzgaytaqa?

³ Chayrí, manachu yachankichej aswan qhepaman angelkunatapis juzgananchejta? Jina chayqa, astawanraj ari runapura ch'ajwachinakuy rikhurejta allinchayta atinkichej.

⁴ Ajinaqa, sichus qankuna ukhupi ima jawa ch'ajwachinakuy tiyan chayqa, imajtintaj Diosta mana qhatej juezkunaman rinkichejri? Chay juezkunataqa wawqe panakuna mana respetowanchu qhawanku, mana iglesiamantachu kasqankurayku.

⁵ Chaytaqa qankunata p'enqachinaypaj nini. Manachu qankuna ukhupi pillapis yachayniyoj kanman, Diosta qhatejkunapura ch'ajwachinakojtinku allinchananpaj?

⁶ Qankuna ch'ajwachinakuspa, mana phiñanakullankichejchu, aswanpis Diosman mana kutirikoj juezkunata mask'ankichej, ch'ajwachinakusqaykichejta allinchananpaj.

⁷ Ajinaqa, qankunapura quejanakuspa, millayta pantaykunkichejña. Imaraykutaj mana ch'inllamanta pacienciakunkichejchu, pipis mana allin kajta ruwasojtiykichejri? Aswan allin kanman imaykichejtapis qhechuspa apakapojta saqenallaykichej.

⁸ Chaywanpis qankuna kikiykichej mana cheqan kajta ruwankichej, aswanpis Diosta qhatej masiykichejmanta suwankichejraj.

⁹ Manachu yachankichej mana cheqan kajta ruwajkunaqa Diospa kamachiyninman mana yaykunankuta? Ama q'otiyachikuychejchu: Khuchichakuypi purejkuna, lantikunata yupaychajkuna, warminkuta qosankuta wasanchaspa wajwan khuchichakojkuna, qhari kashaspa warmiman tukojkuna, qharipura jinanakojkunapis Diospa kamachiyninman mana yaykonqankuchu.

¹⁰ Jinallataj Diospa kamachiyninman mana yaykonqankuchu suwajkuna, mich'a kajkuna, machajkuna, maldicejkuna, chantá q'otiyajkuna ima.

¹¹ Ñawpajta qankunamanta wakin ajina karqankichej. Kunanrí llimphuchasqaña kankichej, juchamanta t'aqasqaña, cheqan runapajña qhawasqa ima Tukuyta Kamachej Jesuspa atiyninnejta, chantá Diosninchejpa Espiritunnejta ima.

Ukhunchejqa mana khuchiriyopi purinapajchu

¹² Qankuna ninkichej: Noqaqa imatachus munasqayta ruwayta atini, nispa. Ari, ajinapuni chayqa. Chaywanpis mana tukuy munasqanchejqa walejchu. Noqapis imatachus munasqayta ruwayta atillanitaj. Chaywanpis imatachus munasqaywan mana apaykachachikusajchu.

¹³ Jinallataj ninkichej: Mikhunaqa wijsapaj, wijsataj mikhunata jap'inapaj, nispa. Chayqa jinapuni. Diostajrí, iskayninta chinkachenqa. Chaywanpis qankunaqa mana niyta atinkichejchu ukhuykichejqa khuchiriyopi purinapaj kasqanta. Manachayqa ukhuykichej ruwasqa karqa Tukuyta Kamachej Jesuspa munasqanta ruwanaykichejpaj, imajtinchus runaj ukhonqa paypajtamin.

¹⁴ Chayrayku, imaynatachus Dios Tukuyta Kamachej Jesusta wañusqamanta kawsaricherqa, ajinallatataj noqanchejtapis jatun atiyninwan kawsarichiwasun.

¹⁵ Manachu yachankichej qankunaj ukhuykichejqa Cristoman ujchasqa kasqanta? Jinaqa, pipis Cristoman ujchasqa kashaspa, atinmanchu uj phisu warmiwan ujchakuyta? Manapuni.

¹⁶ Chayrí, manachu yachankichej pichus phisu warmiwan puñuykojqa paywan ujllaman tukusqanta? Diospa Qhelqachisqanpi nin: Iskayninku uj runa jinalla kanku, nispa.

¹⁷ Pichus Tukuyta Kamachej Jesuswan ujchakojrí paywan ujlla kashan.

¹⁸ Chayrayku qankuna khuchichakuspa purinamanta ayqeychej. Millay khuchiriyopi purina waj juchamanta nisqaqa runaj ukhunpaj astawan llakiyta apamun.

¹⁹ Manachu yachankichej ukhuykichejqa Santo Espíritoj templon kasqanta? Payqa qankunapi tiyakun. Diosmin Santo Espiritunta qosunkichej, chayraykutaj ukhuykichejqa manaña qankunajtachu.

²⁰ Dios ashkha preciota pagaspa, qankunata rantikusorqachej. Chayrayku qankuna ukhuykichejwan Diospa munasqanta ruwaspa, payta jatunchaychej.